2Mak 8 - ÎVUKU RÎA ÛVORO MWARO

Judasi Makabii nîwareganire na Angiriki

¹ Judasi ûrîa rîngî wetagwa Makabii, na arata ake nîmaathiîre na nthitho matûûrarî magîcokanagîrîria vamwe Ayahudi arîa maathiîte na mbere kûrûmia wîtîkio. Kwoguo nîmaaûnganirie andû ngiri ithathatû (6,000).

² Nîmaavoire Mwathani arorie andû ake arîa mavinyîrîrîtue nî mavûrûri monthe, na eguîre hekarû ntha îrîa yagwatîtue mûgiro nî andû arîa mataicî Ngai,

³ na eguîre îtûûra rîa Jerusalemu ntha rîrîa rîacûkangagua na rîarî vakuvî kûvaragana. Nîmaamûvoire egue kîrîro Kîam andû arîa maaûragîtwe,

⁴ aririkane tûkenge tûrîa twaûragîtwe na njîra njûku mûno tûtarî na mavîtia na ûrîa rîîtwa rîake rîtheru rîarumîtwe na onanie ûrîa athûrîte maûndû macûku.

⁵ Rîrîa Judasi Makabii aarîkirie kûthondeka gîkundi gîake Kîam athigari a mbaara, andû a ndûrîrî icio ciîngî matingîamûvotire nîûndû marakara ma Mwathani kûrî Ayahudi nîmaagarûrûkîte na magatuîka ntha.

⁶ Andû materîgîrîrîte, Judasi nîwatharîkagîra icagi na matûûra na akamavîvia na mwaki. Nîwanyitire kûndû kûrîa kwarî na vata na nthû nyîngî ikîûra.

⁷ Oonaga mavinda ma ûtukû marî maro mûno ma kûtharîkîra. Kûndû kuonthe andû nîmaaragia ûrîa aarî njamba.

Putolemî nîwathire Nikanoru akatharîkîre Judasi

⁸ Rîrîa Filipu, mûnene wa Jerusalemu oonire atî Judasi nîwagîcaga na ûvootani na nîwathiîcaga na mbere wa akîvootanaga, nîwandîkîre Putolemî ûrîa warî mûnene Sîria nene na Foinike maarûa. Aamwandîkîre nîguo aûke atethererie mûthamaki.

⁹ Nake Putolemî wa rîmwe nîwathuurire Nikanoru mûvîcî wa Paturokulo ûmwe wa arata a vata mûno a mûthamaki arî na athigari ngiri mîrongo îîrî (20,000) kuuma ndûrîrî mwanya mwanya mathiî makathirie rûrîrî ruonthe rwa Ayahudi. Putolemî nîwacokire akîthuura Gorigia, mûnene wa athigari a mbaara na waicî ûvoro wa mbaara mûno nîguo mathiî nake.

¹⁰ Mûthamaki Anitioku aarî na thirî wa gooti ya mûthamaki wa Roma ya mbeca cia sîlûva kilo ngiri mîrongo îtandatû na inyanya (68,000). Kwoguo, Nikanoru nîwagîre na mwîvoko atî Ayahudi arîa akaanyita akaamendia marî ngombo nîguo arîvîre mûthamaki thirî ûcio.

¹¹ Nîwatûmanire wa rîmwe matûûrarî marîa maarî rûtere rwa îria magaaûka magûre ngombo. Ngombo icio nî cia Ayahudi arîa akaanyita, na nîikendua na thogora mwaro. Ngombo mîrongo kenda ikeendagua thogora wa kilo îmwe ya sîlûva. Nwatî ndaamenyaga îvera rîrîa Ngai mwene vinya wonthe eetererete kûmûverithia narîo.

Judasi nîwamenyire mîvango ya Nikanoru

¹² Rîrîa Judasi amenyire atî Nikanoru na athigari ake a mbaara maarî njîrarî maûkîte kûtharîkîra Judea, nîwamenyithirie andû ake.

¹³ Arîa maarî na guoya na matetîkîtie atî Ngai nîarûngamagîrîra kîvooto nîmaaûrire na îvenya.

¹⁴ Nao arîa engî makîendia indo ciao cionthe irîa ciatigarîte na makîvoya Mwathani amavonokie kuuma kûrî Nikanoru mûndû ûtetigagîra Ngai na wamendetie marî ngombo wana mbere ya mbaara yambîrîria.

¹⁵ Nîmaavoire Ngai amavonokie, na ethîrwa ndakûmavonokia nîûndû wao, amavonokie nîûndû wa kîrîkanîro kîrîa aarîkanîre na methe mao. Na rîngî, nîûndû wa ûrîa ke aamathuurire matuîke andû ake na njîra ya rîîtwa rîake rîtheru na rîrî riiri.

¹⁶ Judasi nîwagomanirie athigari ake a mbaara vamwe marî andû ngiri ithathatû (6,000). Nîwamekîrire vinya na akîmera matigetigîre kana maûra nî guoya nîûndû wa nthû ciao kana wîngî wa andû a ndûrîrî magîûka kûrûa nao. Aamerire marûe na ûcamba

¹⁷ makîririkanaga maûndû macûku marîa andû a ndûrîrî meekîte hekarû, na ûrîa maatûmire îtûûra rîa Jerusalemu rînyarirîka na makîthiria mîtugo ya Kîyahudi.

¹⁸ Nîwamerire atîrî, “Andû acio mevokete indo ciao cia mbaara na ûcamba wao, nwatî tue twîvokete Ngai mwene vinya wonthe ûrîa ûrî na ûvoti wa kûthiria acio maratûtharîkîra wana kana nthî yonthe angînamia kîongo gîake.”

¹⁹ Nîwathiîre na mbere kûmaririkania ûrîa Ngai aatethirie methe mao ma tene. Nîwamerire atî vîndî ya Senakeribu nthû ngiri îgana rîa mîrongo înana na ithano (185,000) nîciathirirue,

²⁰ na rîrîa maarî Babuloni, Ayahudi ngiri inyanya (8,000) nîmaatethererie andû a Makedonia ngiri inya (4,000) maûmîrîtwe nî mbaara mûno na makîvoota andû a Galatia ngiri îgana rîa mîrongo îîrî (120,000) na magîtava indo nyîngî mavotithîtue nî Ngai.

Judasi nîwavootire Nikanoru

²¹ Ciugo cia Judasi nîciamaûmîrîrie mûno na agîtûma megue mevarîrîtie gûkua nîûndû wa ndini yao na vûrûri wao. Nîwacokire akîgaania athigari ake a mbaara ikundi inya.

²² Wa gîkundi aakîgaire kîrî Kîam andû ngiri îmwe na magana matano (1,500). Judasi nîwacokire akîthuura aa mûrwang'ina, Simoni, Josefu na Jonathani, wa mûndû aarî mûtongoria wa gîkundi kîmwe.

²³ Vuva wa ûguo nîwathuurire Eliazaru athome Îvuku rîrîa Rîtheru augîrîrîtie, na agîcoka akîra andû ake ciugo cia kûmatongoria mbaararî akiuga: “Ngai nîagûtûtethia.” Nîwacokire agîtongoria gîkundi Kîam mbere akîtharîkîra Nikanoru.

²⁴ Ngai mwene vinya wonthe nîwamatethirie kûrûa na nîmaaûragire nthû ngiri kenda (9,000) na engî eengî makîgurarua. Athigari nthû ciao arîa maatigarire magîcoka makîûra.

²⁵ Nîmaacunire andû arîa maaûkîte kûgûra andû a Ayahudi nîguo makamatue ngombo mbeca irîa maakuîte. Nîmaavinyûririe nthû ciao vandû va kavinda karaca, nwatî nîmaacokire gwatuka

²⁶ nîûndû kavinda ga kwambîrîria thavatû nîgaakuvîvîrîtie.

²⁷ Vuva wa kûngania indo cia mbaara irîa nthû ciao ciarî nacio na kûmaruta indo, nîmaacokire magîkûngûîra thavatû. Nîmaakumirie Ngai mûno na makîmûcokeria ngatho nîûndû wa kûmamenyerera nginya makîona mûthenya ûcio ke aamathuurîrîte ûrî wa mbere wa kûmonia ntha ciake.

²⁸ Thavatû yathira, nîmoocire indo imwe cia irîa maatavîte na makîva andû arîa maagurarîtue, aka a ndigwa na ciana cia ngoriai. Gîcunjî Kîam indo irîa ciatigarire nîmaaigaanîrie mîciî yao.

²⁹ Marîkia gwîka ûguo, nîmaavoire marî vamwe Mwathani ûrîa ûrî ntha ethagîrwe arî vamwe nao nîûndû o nî ndungata ciake.

Judasi nîwavootire Timotheo na Bakide

³⁰ Ayahudi nîmaarûire na athigari a mbaara a Timotheo na Bakide na makîûraga makîria ya athigari ngiri mîrongo îîrî (20,000). Nîmaagwatire nyomba ndaca nyîngî cia kwîgitîra na magîkuua indo nyîngî. Indo icio nîmaaigaanire o ene meganene, na makîgaîra aka a ndigwa, ciana cia ngoriai na arîa maagurarîrîtue mbaararî.

³¹ Nîmaaûnganirie indo cia mbaara irîa ciarî na nthû ciao waro na nîmaacigire kûndû kwaro. Indo icio ciîngî nîmaaivirire Jerusalemu.

³² Nîmaaûragire mûnene wa athigari a mbaara a Timotheo warî mwaganu mûno na wathînîtie Ayahudi mûno.

³³ Marî îtûûrarî rîrîa rînene rîa methe mao ma tene magîkûngûîra ûvootani wao, nîmaavîvirie andû marî mwoyo arîa maavîvîtie ivingo irîa ntheru. Gatagatî ka andû acio maarî Kalisithene na andû engî arîa maathiîte kwîthitha kanyombarî kanini. Ûguo nîguo andû acio maaverwe îvera rîrîa rîamaagîrîre nîûndû wa ûcûku wao.

³⁴ Nikanoru, mûndû warî mûcûku mûno ûrîa waretete andû ngiri îmwe (1,000) nîguo magûre Ayahudi,

³⁵ avootirwe nî nthû ciake irîa aanyararaga mûno ivotithîtue nî Mwathani. Nikanoru nîwarutire nguo ciake ciarî mbaro mûno, akîûra arî wenga ta ngombo yûrîte akîthiî nginya Anitiokia. Ûndû mûnene eekire nwa gûtûma athigari ake a mbaara onthe macûkangue.

³⁶ Kwoguo mûndû ûrîa wecirîtie atî nîakûrîva gooti rîa Aroma na mbeca irîa akanyita endia andû a Jerusalemu, nîwacokire agîtîkia atî Ayahudi maarî na mûmagitîri. Kwoguo Ayahudi matingîavootekire nîûndû nîmaathîkîrîte mawatho marîa maavetwe nî Ngai.