2Mak 7 - ÎVUKU RÎA ÛVORO MWARO

Ciana na ng'ina nîmaakuire nîûndû wa wîtîkio wao

¹ Vîndî îmwe anake mûgwanja na ng'ina nîmaanyitirwe, nake mûthamaki nîwathanire marivwe na maringîrîrue kûrîa nyama irîa itarî mbîtîkîrie cia ngûrwe.

² Ûmwe wao nîwaririe vandûrî vao na akiuga atîrî, “Nîndûî mwîrîgîrîrîte kûgwata kuuma maûndûrî mau monthe mûreka? Nîûndû tue nîtwîvarîrîtie gûkua gûkîra kuna watho wa methe metû.”

³ Mûthamaki nîwarakarire mûno nî ciugo icio na akîathana atî ngîo na mathavuria mavîvue nginya matunîve nî mwaki.

⁴ Ikîvîvua na îvenya, na mûthamaki akîatha andû ake atî mwanake ûcio warî mwarîrîria atinue rûrîmî na arutwe rûûo rwa kîongo, na atinue njara na magûrû, ng'ina na aa mûrwang'ina maroretie.

⁵ Rîrîa maamûtinangirie na agîtuîka ndangîvota gwîka wanarî atîa, mûthamaki nîwathanire mwanake ûcio wa akîvevaga avirwe rûgîorî rûmwe rwa irîa ciarî mwakirî na avîvue. Ndogo kuuma rûgîorî rûrîa rwamûvîvagia nîyanyaganirie kuonthe, nwatî anake acio engî atandatû na ng'ina nîmaaûmanîrîrie na magîkanîra ûcamba wa gûkua makiuga atîrî,

⁶ “Mwathani Ngai nîarona na nîagûtwîguîra ntha. Musa aatungire rwîmbo rwake rwa kwonia andû mavîtia marîa meekagwa na arîa maatiganagîria Mwathani akiuga atî, ‘Mwathani akegucagîra arîa mamûtungatagîra ntha.’ ”

⁷ Marîkia kûraga mwanake wa mbere na njîra îo, athigari nîmaaretire mûrwang'ina wa kaîrî varîa maaûragîre wa mbere. Nîmaambîrîrie kûmûruta rûûo rwa kîongo wana njuîrî na makîmûria atîrî, “Nîûkûrîa nyama îno ya ngûrwe kana nîwenda tûgûtinangie njara na magûrû?”

⁸ Mwanake ûcio nîwacokirie na rûthiomi rwake na akiuga atîrî, “Naarî.” Kwoguo nîwaverithirue wata mwanake ûrîa wa mbere.

⁹ Arî vakuvî gûkua nîwerire mûthamaki atîrî, “We mûragani, nîûratûûraga nwatî mûthamaki wa îgûrû na nthî nîagaatûriûkia tûtûûre tene na tene nîûndû twakua nîkwathîkîra watho wake.”

¹⁰ Vuva wa ûcio, athigari nîmaambanîrîrie na wa kathatû. Rîrîa eerirwe arute rûrîmî rwake na nja, nîwekire guo na îvenya na agîtambûrûkia njara ciake arî na ûcamba

¹¹ na akiuga aûmîrîrîtie atîrî, “Njara ino naveerwe nî Ngai, namo mawatho make marî na vata gûkîra njara ino. Nîngwîvoka atî nîakaanjokeria cio rîngî.”

¹² Nake mûthamaki na andû arîa maarî nake nîmaamakire mûno nî ûcamba wa mwanake ûcio, nîûndû kûverithua ndoonaga ûrî ûndû mûnene.

¹³ Rîrîa ûcio aakwire, nîmaambîrîrie kûverithia mwanake wa kana na njîra wata îo.

¹⁴ Na arî vakuvî gûkua nîwaugire atîrî, “Nîrî na gîkeno kûragwa nîûndû nîrî na kîîrîgîrîro gîa atî Ngai nîakaandiûkia rîngî. Nwatî we ndûkaariûkua!”

¹⁵ Nîmaacokire makînyita mwanake wa gatano na makîambîrîria kûmûverithia.

¹⁶ Nake nîwaroririe mûthamaki na akîmwîra atîrî, “We ûrî na ûvoti wa gwîka natue wa ûrîa ûngîenda wana ethîrwa ûrî mûndû watatue. Nwatî ndûgecirie atî Ngai nîatiganîrîtie andû etû.

¹⁷ Eterera na nîûkoona ûrîa Ngai agaakûverithia na vinya wake mûnene, we na njiarwa ciaku!”

¹⁸ Nao athigari nîmaaretire mwanake wa gatandatû. Atigarîtie vanini akua nîwaugire atîrî, “Mûtikaneveenie. Tûrathînua ûguo nîûndû nîguo kwagîrîrîte nîûndû nîtûvîtîrîtie Ngai wetû. Kîu nîkîo gîtûmîte twone maûndû mau monthe macûku.

¹⁹ Nwatî nwanginya ûkaaverithua nîûndû wa kûrûa na Ngai.”

²⁰ Ng'ina wa anake acio nîke warî wa mwanya gûkîra anake ake na wagîrîrwe nî kûririkanagwa. Wana ethîrwa nîwonire anake ake mûgwanja magîkua mûthenya wa ûmwe, nîwaûmîrîrie arî na ûcamba nîûndû nîwevokete Mwathani.

²¹ Anarî mûndûmûka nîwagîre na ûcamba na agîkîra anake ake vinya ta mûndûmûrûme akîmarîria na rûthiomi rwao na akîmera atîrî,

²² “Ndicî ûrîa wambîrîrie kûgîa mwoyo îvurî rîakwa. Tî nie nakûveere mwoyo na mîvevû, kana ciîga irîa ûrî nacio.

²³ Kwoguo, Ngai nîke waûmbire îgûrû na nthî, akîûmba mûndû, na indo cionthe irîa irî kuo. Ngai ûcio, nîûndû wa ntha ciake nîagaagûcokeria rîngî mwoyo na mîvevû nîûndû nîwendete mawatho make gûkîra ûrîa wîyendete we mwene.”

²⁴ Mûthamaki Anitioku eeciririe atî mûndûmûka ûcio nîkwa aamûnyûrûragia. Anitioku nîwageririe kûringîrîria mwanake ûcio warî mûnini atarî arakua etîkîre gûtiganîria mîtugo ya gîtene ya methe make. Wana nîweragîra mwanake ûcio na mwîvîtwa atî nîagûtûma atuîke mûtongu na agîe îgweta, na amûve wîra mûnene thirikarirî na atuîke mûrata wa mûthamaki.

²⁵ Mwanake ûcio ndaathikîrîria ciugo icio wana vanini. Mûthamaki nîwetire ng'ina wa mwanake ûcio na akîmûthaitha ataare mwana wake nîguo evonokie.

²⁶ Vuva wa kûmûthaitha mûno, ng'ina wa mwanake ûcio nîwetîkîrire gwîka ûguo.

²⁷ Ng'ina nîwenamîrîrie varî ke, nwatî aamwarîrie na rûthiomi rwao akîregana na maûndû ma mûthamaki ûcio mwaganu na akîmwîra atîrî, “Mwana wakwa mbîguîra ntha. Ririkana nekarire nawe mîeri kenda ûrî îvurî rîakwa na ngîkwongithia mîaka îthatû. Nîngûmenyererete na ngakûrera nginyagia ûmûnthî.

²⁸ Kwoguo nîngûkûthaitha mwana wakwa ûrorie îgûrû na nthî na wone indo irîa irî kuo, na ûmenye atî Ngai aaciûmbire kuuma kûrî indo gûtaarî. Wana andû ûguo nîguo maaûmbirwe.

²⁹ Ndûgetigîre mûragani ûyû. Nwatî kua wîyenderete na wonanie atî ûrî njamba ta aa mûrwanyûkwe, nîguo nîûndû wa ntha Ngai akaanjokeria we na aa mûrwanyûkwe rîngî.”

³⁰ Wa akîaragia, mwanake nîwaugire atîrî, “Wetererete ndûî? Ndingîathîkîra watho wa mûthamaki, nwatî nîmbathîkîra watho ûrîa Musa aveere methe metû.

³¹ We ûvangîte maûndû macûku ma mîthemba yonthe marîa ûgwîka Ahibirania, nwatî ndûgecirie atî nîûkûvonoka kûverithua nî Ngai.

³² Nîma tue tûraverithua nîûndû wa mevia metû.

³³ Ethîrwa nîtûrakarîtie Mwathani wetû ûrîa ûtûûraga mwoyo, nîagûtûverithia nîguo atûkanie na atûrûnge. Nwatî ndagûtûverithia kwa îvinda îraca, agaatwovera nîûndû tûrî ndungata ciake.

³⁴ We ûrî mûndû ûtarî mûtheru, mwaganu na mûng'endu gûkîra arûme onthe. Ndûkaîvenie atî nîûgûtuîka mûnene rîrîa ûkûverithia ciana cia Ngai.

³⁵ Ndûngîvonoka kûverithua nî Ngai mwene vinya wonthe ûrîa wonaga kûndû kuonthe na maûndû monthe.

³⁶ Nîûndû aa mûrwaiya vuva wa kûmîrîria mathîna gwa kavinda kanini nîûndû wa wîvokeku wao kûrî Ngai, rîu marî na mwoyo wa tene na tene. Nwatî we, nîûgaatuîrwa nî Ngai nîûndû wa mwîtîîo waku.

³⁷ Wata ûrîa aa mûrwaiya mekire, nînanenganîra mwîrî wakwa na mwoyo wakwa nîûndû wa mawatho ma methe metû. Nîngûvoya Ngai eguîre vûrûri wetû ntha na atûme we ûthînue na akûretithîrie mîrimû mîcûku nginya rîrîa ûgeetîkia atî ke wenga nîke Ngai.

³⁸ Nie na aa mûrwaiya tûrotûma marakara ma Ngai makinye mûthiia marîa matûmîte vûrûri wetû wonthe ûverithue.”

³⁹ Mûthamaki Anitioku nîwarakarirue nî ciugo irîa mwanake ûcio aaugire na akîathana averithue mûno makîria ya ûrîa aa mûrwang'ina maaverithîtue.

⁴⁰ Kwoguo mwanake ûcio nîwakuire etîkîtie Ngai na ndaatiganîria wîtîkio wake.

⁴¹ Vuva wa anake onthe gûkua, ng'ina nîwaûragirwe wanake.

⁴² Tiga maûndû mau twagweta megiî kûrîa nyama irîa itagîrîrîte cia magongoona na kûverithua mûno megane.