2Mak 6 - ÎVUKU RÎA ÛVORO MWARO

Ayahudi nîmaanyaririrwe nîûndû wa wîtîkio wao

¹ Vuva wa kavinda kanini, mûthamaki nîwatûmire mûthuuri ûmwe waumîte îtûûrarî rîa Athene athiî akaringîrîrie Ayahudi matiganîrie ndini yao na mîtugo ya gîtene ya methe mao.

² Nîwamwathîte akagwatie hekarû ya Jerusalemu gîko na amîamûre îtagwe “hekarû ya zeu ngai ya Olîmupia.” Nayo hekarû îrîa yarî kîrîmarî Kîam Gerizimu amîamûrîre zeu ngai îrîa îtagwa mûrata wa ageni nîûndû nîguo andû a kûu maamîtaga.

³ Maûndû mau ma kûvinyanîrîria maarî macûku mûno na ma kwîguithia andû kîeva.

⁴ Hekarûrî nîgwatuîkîte kûndû gwa kûnyunyagîrwa njovi na gwa gwîkagîrwa maûndû marîa macûku nî andû a ndûrîrî. Wana nîmaaûkaga na aka a maraa na makamenyanagîra nao kîîmwîrî kûu hekarûrî, na makaretaga indo cia magongoona irîa itagîrîrîte.

⁵ Metharî ya kîgongoona gwecûrîte maruta ma indo irîa irî mûgiro irîa itetîkîrîtue nî watho.

⁶ Andû matiaigaga mîthenya ya thavatû, kana makûngûîra irugo irîa ciakûngûagîrwa nî methe ma tene, na gûtirî mûndû ûngîavotire kuga atî ke nî Mûyahudi.

⁷ Wa mweri wa mweri rîrîa mûthamaki agûkûngûîra mûthenya wake wa gûciarwa, Ayahudi maaviragwa na vinya makîrivagwa makarîe mara marî marûrû ma nyamû irîa irutîtwe cia magongoona. Na rîrîa gûgûkûngûîrwa kîrugo Kîam Dionisio, ngai ya ndivei, Ayahudi meeragwa na vinya mekîre ngovia cia maûa ma kîthaka na mathiî marûmanîrîrîte nîguo mave ngai îo gîtîîo.

⁸ Putolemî nîwataaranîte na gûkîvîtûkua atî, matûûra ma Kîngiriki marîa maarî gûkuvî mone atî Ayahudi nîmarûmîrîra maûndû mau na marîe irio icio cia magongoona.

⁹ Na Ayahudi arîa matakaarûmîrîra mîtugo ya Kîngiriki maûragwe. Kwoguo, andû nîmoonaga waro atî mavinda ma thîna maarî makinyu.

¹⁰ Kwa mûvano, aka aîrî nîmaanyitirwe nîûndû nîmaaruithîtie twana twao. Aka acio maathiûrûrûkirue îtûûrarî rîonthe na twana tûu twao tûcurîtue nyondorî ciao, na vuvarî magikua nthî na ciongo kuuma îgûrû rîa rûthingo rwa îtûûra.

¹¹ Ayahudi engî nao arîa maagomanîte vandû îkurungurî nîguo makûngûîre thavatû na njîra ya nthitho nîmaacukanîrîrwe kûrî Filipu. Onthe nîmaavîvirue vamwe na nîûndû wa wîtîkio wao matianerûîrîra nîûndû nîmaavete mûthenya ûcio wa thavatû gîtîîo.

Mwathani nî averithanagia na nîegucanagîra ntha

¹² Nîngûria arîa marathoma îvuku rîîrî matikaûrwe nî vinya nîûndû wa mathîna mau, nwatî mamenye atî mavera ta mama matiarî ma gûcûkangia nwatî maarî ma gûtûma andû etû magîe na mîtugo mîaro.

¹³ Kûverithia wa rîmwe mûndû ûrîa wîkaga maûndû marîa macûku nîta kûmwîguîra ntha gûkîra kûmwiga îvinda îraca.

¹⁴ Nîûndû Mwathani etagîrîra akirîrîrîtie ndûrîrî irîa ciîngî ithiî na mbere kwîvia na vuvarî akaiverithia, nwatî tîguo ekaga natue,

¹⁵ tue atûverithagia atambîte gweterera twîvia mûno.

¹⁶ Kwoguo, Mwathani nîatwîgucagîra ntha vîndî cionthe. Wana ethîrwa nîatûverithagia na mîthiro, ndatiganagîria andû ake.

¹⁷ Twamwîra maûndû mau tûkîenda wa kûmûririkania, rîu gatûthiî mbere na rûgano rwetû.

Eliazaru nîwakuire nîûndû wa wîtîkio wake

¹⁸ Kwarî na mûthuuri mûkûrû wetagwa Eliazaru na warî mwarimû wa watho, na nîwavetwe gîtîîo mûno. Mûndû ûcio nîwaringîrîrue arîe nyama cia ngûrwe na vinya.

¹⁹ Nwatî mûndû ûcio nîwonire atî nîkava gûkua arî na gîtîîo gûkîra gûtûûra mwoyo mûndû etukanîtie na maûndû marî na mûgiro. Kwoguo nîwatuîrîre nyama îo nthî na akîîvira ke mwene varîa vaaverithanagîrua.

²⁰ Eekire ûguo nîguo onie andû ûrîa magîrîrwe nî kûgîa na ûcamba wa kûrega kûrîa irio irîa itagîrîrîte wana ethîrwa nwa gûtûme mûndû aûragwe.

²¹ Andû arîa maarûngamîrîrîte îgongoona rîu rîareganîte na watho nîmaathiîcaga kûrî Eliazaru nîûndû maarî arata ake. Nîmaamûviraga vandû keverirî na makamûthaitha avire nyama îrîa ke agîrîrwe nî kûrîa nîguo aveenererie atî ararîa nyama cia kîgongoona irîa mûthamaki aathanîte irîwe.

²² Gwîka ûguo nîkûngîatûmire ekwe maûndû maro nîûndû wa ûrata wao nake wa kuuma tene, na ndangîaûragirwe.

²³ Nwatî Eliazaru nîwatuire îtua rîrîa rîagîrîrwe gûtuuwa nî mûthuuri warî mûtîîkanu na wa ûkûrû wake. Aakinyîtie ûkûrû wa kûgîa na mbuî na atûûrîte mûtûûrîre mwaro kuuma arî mûnini. Kûringana na watho mûtheru wa Ngai akîmera wa rîmwe, “Mbûragani wa rîu.”

²⁴ Eliazaru nîwathiîre na mbere na akiuga atîrî, “Mûndû wa ûkûrû ta wakwa ndagîrîrwe nî kûveenania ta ûguo, nîûndû andû eengî arîa ethî matigecirie atî nîndiganîrîtie wîtîkio wakwa nîrî na ûkûrû wa mîaka mîrongo kenda ngagîa na wîtîkio wîngî mûgeni.

²⁵ Nîngîveneereria atî nîkûrîa nîrarîa nyama cia magongoona nîguo ndûûre mwoyo gwa kavinda kanini, andû ethî nwa mavîtithue nînie na njonorithie ûkûrû wakwa.

²⁶ Nîûndû wana ethîrwa îvinda rîîrî nwa ndege kûverithua nî andû, nwatî kûnarî ûguo, ndikaaûrîra îverithia rîa Ngai mwene vinya wonthe.

²⁷ Kwoguo, nîngînenganîra mwoyo wakwa rîu nîrî na ûcamba mbûragwe, ngoonania atî ûkûrû wakwa tîwa mana,

²⁸ na ûtuîke kîonereria kûrî andû ethî atî mûndû nîwagîrîrwe nî gwîtîkîra gûkua na njîra ya kwîyendera nîûndû wa mawatho marîa matheru na matîîkanu.” Na wa rîmwe arîkia kuga ûguo nîwathiîre varîa vaaverithanagîrua.

²⁹ Nao andû arîa na vau kavererî moonanîtie ta marî arata, nîmaamûgarûrûkire, nîûndû maûndû marîa aaririe meguire ta arî ma mûgûrûki.

³⁰ Arî vakuvî gûkua nîûndû wa ûrîa maamûrivire, Eliazaru nîwakaire augîrîrîtie na akiuga atîrî, “Mwathani nî aicî maûndû monthe atî wana ethîrwa nîngîravonokirue kuuma kûrî gîkuû, rîu nîraûmîrîria ûrûrû ûyû wonthe makîndiva. Nwatî ngororî yakwa nîrî na gîkeno kûthînua ûguo nîûndû nînîmûtîîte.”

³¹ Kwoguo Eliazaru aakwire na njîra îo. Nakîo gîkuû gîake gîa ûcamba nîgîatuîkire kîonereria Kîamro na gîa kûririkanagwa, tî andû ethî onga, wana nî vûrûri wake wonthe.