2Mak 5 - ÎVUKU RÎA ÛVORO MWARO

Cioneki cia mbaara

¹ Îvindarî wa rîu, Antioku wa kana nîwatharîkîre Misiri rita rîa kaîrî.

² Na nîgwatuîkire atî îvinda ta rîa mîthenya mîrongo îna, îtûûrarî rîa Jerusalemu kuonthe andû nîmoonaga cioneki cia andû mathiîcaga matwîte mbarathi na mekîrîte nguo cia thaavu mavinyûrîte rîerarî. Andû acio maarî ikundi na maarî na indo cia mbaara, marî na matumû na macomorete mviû ciao.

³ Athigari a mbaara maatwîte mbarathi na mevarîrîtie kûrûa. Maatharîkanagîra mûthigari na mûthigari ûrîa wîngî. Ngo ciao ciaringithanagua na vinya, matumû maaikagua makaura ta mbura, na mîguî nîyaikagua. Nacio indo ciao cia mbaara cia mîthemba yonthe na matandîko ma mbarathi ma thaavu nîmaavenavenagia nî ûtheri wa riûa.

⁴ Kwoguo andû onthe nîmaavoyaga atî cioneki icio itûme mone maûndû maro.

Jasoni nîwatharîkîre Jerusalemu

⁵ Rîrîa kwambîrîrie kûgîa ûvoro wa maveeni atî Antioku nî mûkuû, Jasoni nîwocire andû makîria ya ngiri îmwe na wa rîmwe akîtharîkîra Jerusalemu. Athigari arîa meekarîte nthingorî nîmaacokithirue na vuva na mûthiiarî îtûûra rîa Jerusalemu nîrîagwatirwe, nake Menelausi nîwaûrîre vakuvî na varîa hekarû yatumîtwe.

⁶ Nwatî Jasoni nîwathiîre na mbere na kûûraga andû ao a Ayahudi atakûmeguîra ntha. Jasoni ndaamenyaga atî kûvoota andû a vûrûri wao warî ûndû mûcûku. Ke eeciragia nî nthû aravoota nwatî tî andû ao.

⁷ Kûnarî ûguo Jasoni ndaavota gwoca ûtongoria wa thirikari. Mûthiiarî mûvango ûcio wake mûcûku wamûretere gîconoko na akîûrîra vûrûrirî wa Aamoni.

⁸ Mûrîkîrîrio wake ndwarî mwaro. Nîwovirwe nî Areta, mûthamaki wa Arabu; aaûrûraga kuuma îtûûra rîmwe kûthiî rîrîa rîngî. Andû onthe methagîrwa makîmûvinyûria, na nîwamenetwe nîûndû nîwareganîte na watho wa vûrûri wao. Jasoni aarî mûnyarare nîûndû wa kûraga andû ao. Nîwathiîre kwîthitha Misiri

⁹ na agîcoka akîthiî Lakedemonia arî na mwîrîgîrîro atî nîakûnyitwa ûgeni nîûndû wa ûrîa maakonenie. Jasoni ûrîa waviraga andû îthamîriorî, nake aakuîrîre îthamîriorî.

¹⁰ Jasoni aaûragaga andû akîmatiga matarî na wa kûmathika ndaarî na mûndû ûngîamûcakaîre. Ndaathondekerwa îgongoona rîa mathiko wana kana athikwa mbîrîrarî cia methe mao.

Antioku nîwatharîkîre Jerusalemu

¹¹ Rîrîa ûvoro wa maûndû marîa meekîkîte Jerusalemu wakinyîre Mûthamaki, eeciririe nîkwa vûrûri wonthe wa Judea wagîte na thogothogo ya kûrega thirikari. Kwoguo, nîûndû wa marakara aumire Misiri na akîthiî akîtharîkîra Jerusalemu.

¹² Nîwathire athigari ake maûrage mûndû wa wonthe magatûngana nake matakûmwîguîra ntha na maûrage arîa makwîthitha nyomba.

¹³ Nîkwaûragirwe andû ethî na akûrû, anake na erîtu, athuuri na aka, na twana twa tûkenge.

¹⁴ Îvindarî rîa mîthenya îthatû nîkwaûragîtwe andû ngiri mîrongo înana (80,000). Andû ngiri mîrongo îna (40,000) maaûragîrîtwe mbaararî makîrûa, na engî ta acio nîmoocetwe na makendua marî ngombo.

¹⁵ Mûthamaki Antioku ndeeganîra nî ûguo eekire. Nîwatonyire hekarûrî îrîa yarî ntheru mûno gûkîra cionthe nthî yonthe atongoretue nî Menelausi ûrîa wakunyanîrîte ndini yao na vûrûri wao.

¹⁶ Nake mûthamaki arî na njara ngwatie gîko nîwocire indo irîa ntheru na iveo irîa ciarutîtwe nî athamaki engî nîûndû wa kwongerera riiri na gîtîîo gîa hekarû.

¹⁷ Antioku nîwagîre na gîkeno nîûndû wa kûvootana atakûmenya atî Mwathani nîwarakarîtue nî andû arîa maatûûraga Jerusalemu na nîwarekereretie hekarû gwa kavinda kanini îgwatue mûgiro nîûndû wa mevia mao.

¹⁸ Nwatî kethîrwa andû a Jerusalemu matietonyetie meviarî meengî, Antioku nîangîarivirwe na acokithue wa atonya atekîte gîîko kîu eekire gîcûku wata ûrîa Heliodoru ekirwe. Heliodoru aatûmîtwe nî mûthamaki Seleukusi athiî agatuîrie kîgîna gîa hekarû.

¹⁹ Ngai-Mûnene ndaathuura andû ake nîûndû wa hekarû yake, nwatî aathuurire hekarû nîûndû wa andû ake.

²⁰ Kwoguo hekarû nîyagwatirwe nî maûndû macûku marîa magwatire vûrûri, na vuvarî ikîgwatanîra maûndûrî maro marîa maacokire kwoneka. Ngai mwene vinya wonthe nîwamatiganîrîtie nîûndû wa marakara, nwatî rîrîa marakara maathirire nîwacokirie riiri wayo rîngî.

Jerusalemu nîyatharîkîrwe rîngî

²¹ Mûthamaki Antioku nîwakuire sîlûva ya kilo ngiri mîrongo îtandatû na igîrî (62,000 kg) kuuma hekarûrî na akiuma na îvenya athiîte Antiokia. Nîûndû wa mwîyambo ûrîa aarî naguo egucaga ta angîavîtûkîrîrie meri nthîrî nyûmû kana aringe îria na magûrû arî na athigari ake.

²² Akîthiî aatigire athuura anene a kûvinyîrîria andû. Jerusalemu aathuurire Filipu ûrîa waumîte Furegia na warî mûcûku mûno wana gûkîra Antioku ke mwene.

²³ Anderoniko nîke wathuurirwe arûngamagîrîre kîrîmarî Kîam Gerizimu. Na kwarî na Menelausi ûrîa wavinyagîrîria Ayahudi mûno wana gûkîra anene acio engî. Antioku nîwathûrîte Ayahudi mûno.

²⁴ Antioku nîwatûmire Apolonia, ûrîa warî mûnene wa athigari kuuma Mîsia arî na athigari a mbaara ngiri mîrongo îîrî na igîrî (22,000). Nîwamwathire akaûrage arûme onthe arîa maarî agima. Nao aka na tûmwanake twendue ta ngombo.

²⁵ Rîrîa Apolonia aakinyire Jerusalemu, nîwetuire atî aûkîte na thayû na agîeterera nginya mûthenya wa thavatû. Rîrîa oonire Ayahudi nîmavurûkîte, nîwacokire akîra athigari ake a mbaara mevange marigicîrîtie îtûûra marî na indo cia mbaara.

²⁶ Nîwaûragire andû onthe arîa maaumaga nja kûthiî kûmona na wa rîmwe agîtonya îtûûrarî arî na athigari acio a mbaara na makîûraga andû eengî mûno.

²⁷ Nwatî Judasi Makabii marî na andû engî kenda nîmaaûrire na makîthiî werûrî. Matûûraga irîmarî ta nyamû cia kîthaka na makarîcaga kîrîa kîonthe gîakûraga kûu kîthakarî.