2Mak 3 - ÎVUKU RÎA ÛVORO MWARO

Oniasi na Simoni nîmaakararanirie

¹ Rîrîa Oniasi (ûyû nî Oniasi wa kathatû mûvîcî wa Simoni wa kaîrî) aarî Mûthînjîri-Ngai ûrîa mûnene, îtûûra rîtheru rîa Jerusalemu rîarî na thayû, ûthiîi wana mbere na mawatho nîmaarûmagîrîrwa na njîra mbaro. Maûndû mama monekete nîûndû Oniasi aarî mûndû mûthingu na ndendeete maûndû macûku.

² Athamaki nîmaavete hekarû gîtîîo na nîmaarutaga iveo cia goro mûno nîûndû wa yo.

³ Wana mûthamaki Seleukusi, (Seleukusi ûyû nî wa kana ûrîa na rîîtwa rîngî eetagwa Filopatori, mûvîcî wa Anitioku wa kathatû), ûrîa warî mûthamaki wa Asia na nîwarutaga gîcunjî kîmwe Kîam mbeca cia gooti irîa aaûnganagia nîûndû wa kûrîva mavûthîri monthe ma magongoona.

⁴ Nwatî mûndû ûmwe wetagwa Simoni wa mûvîrîga wa Benjamini, ûrîa warî mûmenyereri wa maûndû ma hekarû nîmaaregire kwîgucana na Mûthînjîri-Ngai mûnene nîûndû wa thoko cia îtûûra rînene.

⁵ Rîrîa aaremirwe nî kûvoota Oniasi mîariorî, Simoni nîwathiîre kûrî Apoloni wa kuuma Tariso ûrîa vîndî îo aarî mûnene wa Sîria nene,

⁶ na akîmwîra atî kîgîna Kîam hekarû Kîamrî na mbeca nyîngî mûno itangîtarîka. Nîwamwîrire atî mbeca icio tî cia mavûthîri ma magongoona, kwoguo nîciagîrîrwe cigwe rungu rwa watho wa mûthamaki.

Heliodoru nîwatûmirwe Jerusalemu

⁷ Rîrîa Apolonia aacemanirie na mûthamaki, nîwamwîrire ûrîa eerîtwe ûvoro wîgiî mbeca icio. Nake mûthamaki nîwathire Heliodoru ûrîa warî mûrûngamîrîri wa maûndû make athiî agîîre mbeca icio.

⁸ Heliodoru nîwaûkîrire wa rîmwe na akîambîrîria rûgendo athiîte kûrîa aatûmîtwe. Heliodoru aathondekete takwa aathiîte kûrorereria matûûra ma Sîria nene, nwatî rûgendo rwake rwarî rwa kûvingia ûrîa aathîtwe nî mûthamaki.

⁹ Rîrîa aakinyire Jerusalemu nîwanyitirwe ûgeni waro nî Mûthînjîri-Ngai mûnene wa îtûûra rîu. Heliodoru nîwerire Mûthînjîri-Ngai mûnene kîrîa gîatûmîte aûka, na nîwamûririe kana ûvoro ûcio eerîtwe warî wa ma.

¹⁰ Mûthînjîri-Ngai mûnene nîwamûtaarîrie na akîmwîra atî kwarî na mbeca ciaigîtwe nîûndû wa aka a ndigwa na ciana cia ngoriai,

¹¹ na mbeca imwe nacio ciarî cia Hirikanu mûvîcî wa Tobiasi, mûndû wavetwe gîtîîo mûno. Nîwaugire atî mbeca icio cionthe ciarî sîlûva ya ûrito wa kilo ngiri îkûmi na ithatû (13,000), na thaavu kilo ngiri ithathatû na magana matano (6,500).

¹² Nîwathiîre na mbere kuga atî gûtingîvoteka wana vanini kûvîtîria andû arîa maarî na mwîvoko wa ûtheru na ûgitîri wa mbeca ciao hekarûrî îrîa îvetwe gîtîîo nthî yonthe.

Heliodoru nîwavangire gûtonya hekarûrî

¹³ Nwatî Heliodoru, nîûndû aathîtwe nî mûthamaki nîwaringîrîrie atî nwa nginya mbeca icio ciocwe na ikaigwe kîgînarî Kîam mûthamaki.

¹⁴ Kwoguo nîwatuire mûthenya wa kûthiî hekarûrî akarûngamîrîre mbeca icio itarwe. Ûndû ûcio nîwatûmire îtûûra rîonthe rînegene.

¹⁵ Athînjîri-Ngai mekîrîte nguo ciao cia ûthînjîri-Ngai, nîmaaturumithirie mothiû mao nthî mbere ya metha ya kîgongoona makîvoya Ngai agitîre mbeca icio nîûndû nîwavecanîte watho wa kûgitîra mbeca irîa ciaigîtwe hekarûrî.

¹⁶ Mûndû wa wonthe wonaga Mûthînjîri-Ngai mûnene nîwegucaga ûrûrû ngororî, nîûndû kûgarûrûka kwa ûthiî wake na gûtukia kîthithi nîkwonanagia ûrîa arî na kîeva.

¹⁷ Nîwagîre na guoya mwîngî nginya mwîrî wake ûgîtetema, na andû arîa maamwonaga nîmoonaga kîeva kîrîa aarî nakîo ngororî.

¹⁸ Andû nîmaaumire kwao nyomba na îvenya na makîûngana ikundi nîguo mavoe marî vamwe, nîguo hekarû ndîkagwatue mûgiro.

¹⁹ Aka nao mekîrîte nguo cia macakaya ithûri nîmecûrire tûcîrarî twa îtûûra. Amwe a erîtu arîa matetîkîrîtue mauma nyomba nîmaateng'erire na makîthiî mîîrîgarî, amwe makîthiî nthingorî, na engî makîthiî kûrorereria marî ndiricarî.

²⁰ Acio onthe, wa varîa mûndû aarî nîmaavoyaga Ngai maûkîrîrîtie njara ciao.

²¹ Warî ûndû wa kwîguîrwa ntha kwona andû onthe maturumithîtie mothiû mao nthî na wa kwona gîtangîko kîrîa Kîamrî na Mûthînjîri-Ngai mûnene.

Mwathani nîwagitîre hekarû yake

²² Rîrîa andû onthe maavoyaga Mwathani mwene vinya wonthe agitîre mbeca irîa maanengeretwe maimenyagîrîre,

²³ Heliodoru nîwathiîre mbere na mûvango ûrîa watuîtwe.

²⁴ Ke na mûthigari ûrîa wamûgitagîra nîmaakinyire varîa kîgîna Kîam hekarû Kîamigîtwe. Mwathani wa maroho na mavinya monthe nîwatûmire kûgîe na kîoneki Kîam mwanya Kîam vinya wa Ngai. Andû onthe arîa maarî na ûcamba na maathiîcanîtie na Heliodoru mona ûguo nîmaanyitirwe nî kîmako na makîthirwa nî vinya.

²⁵ Nîûndû kîonekirî kîu, nîmoonire mbarathi na mûndû ûrîa wathiîcaga amîkarîrîte aarî na indo cia mbaara cia thaavu na aarî wa kûmakania. Matandîko ma mbarathi îo maarî ma goro mûno. Wa rîmwe mbarathi îo nîyavinyûrîre Heliodoru na îkîmûringa na magûrû ma mbere akîgwa nthî.

²⁶ Anake aîrî wa nao moonekaga marî na vinya mûno, na mekîrîte nguo cia goro, wa nao nîmaaumîrire na makîrûngama varî Heliodoru. Ûmwe aarûngamire mwena wake wa ûrîo na ûcio wîngî akîrûngama mwena wake wa ûmotho, na makîmûriva matakûmûcaîra.

²⁷ Nîwagwîre nthî wa rîmwe na akîringîka, nao andû ake nîmaamwocire na makîmwigîrîra îtaratîrî,

²⁸ makîmûkuua na makîmûruta nja. Kavinda gatarî karaca mûndû ûyû atoonyire kûrîa kwigagwa kîgîna arî na gîkundi kînene Kîam andû vamwe na arîa maamûgitagîra nwatî ndangîvota gwîtethia. Onthe nîmeetîkirie vinya mûnene wa Ngai.

Oniasi nîwavoere Heliodoru avone

²⁹ Heliodoru aamamîte na îvu, atangîvota kwaria nîûndû wa îvooru rîu kuuma kûrî Ngai na atarî na mwîvoko wa kûvona.

³⁰ Andû nîmaakumirie Ngai nî gîko Kîam magegania kîu eekîte nîûndû wa nyomba yake. Nayo hekarû îrîa vau kavererî yecûrîtwe nî guoya na andû makagega, nîyecûrirwe nî gîkeno na kûrûgarûga nîûndû Ngai-Mûnene nîwamaumîrîrîte.

³¹ Arata a Heliodoru nîmaaûririe mûthînjîri-Ngai Oniasi avoe Ngai ûrîa ûrî îgûrû mûno nîguo acokerie mûndû ûcio warî vakuvî gûkua mwoyo.

³² Mûthînjîri-Ngai mûnene nîwetigagîra mûthamaki ndagaîcirie atî nwa kwîthîrwe kûrî ûndû mûcûku Ayahudi meekîte mûndû ûcio, kwoguo nîwarutire îgongoona nîguo Ngai avonie mûndû ûcio.

³³ Mûthînjîri-Ngai mûnene wa akîrutaga îgongoona rîu rîa kûvorovia mevia, anake arîa aîrî maaûkîte na makîrûngama varî Heliodoru, na mekîrîte nguo wa irîa meekîrîte mbere. Nao nîmaaugire atîrî, “Cokeria Oniasi mûthînjîri-Ngai ûrîa mûnene ngatho nîûndû kethîrwa tî ke ndûngîrî mwoyo.

³⁴ Menya atî nî Ngai wa îgûrû wakûverithia. Thiî ûkeere andû onthe ûrîa Ngai arî vinya mûnene.” Na mauga ûguo nîmaathiîre na matiacoka kwonwa rîngî.

Heliodoru nîwakumirie Ngai

³⁵ Heliodoru nîwacokire akîrutîra Mwathani îgongoona na akîîvîta mîvîtwa mîîngî mbere yake nîûndû wa kûvonokia mwoyo wake. Nîwacokire akiugîra Oniasi ûvoro na akiuma kûu akîthiî marî na athigari ake a mbaara kûrî mûthamaki.

³⁶ Nîwathiîre na akîîra andû onthe ûrîa oonire maûndû marîa Ngai mwene vinya wonthe eekîte.

³⁷ Mûthamaki nîwaûririe Heliodoru mûndû ûrîa oonaga arî mwagîrîru wa gûtûmwa athiî Jerusalemu rîngî, nake nîwaugire atîrî;

³⁸ “Angîthîrwa ûrî na nthû yaku, kana mûndû ûrenda kûgarûra thirikari yaku mûtûme kuo. Mûndû ûcio angîkaavonoka aûre agaacoka arî mûrive mûno, nîûndû kûndû kûu kûthiûrûrûkîrîtue nî vinya wa Ngai wa mwanya.

³⁹ Ngai ûrîa wîkaraga îgûrû ke mwene nîke ûgitagîra kûndû kûu na nîacûkangagia mûndû wa wonthe ûngîûka kûgûcûkangia.”

⁴⁰ Rûu nîruo rûgano rwa Heliodoru na ûrîa kîgîna Kîam hekarû Kîamgitîrîtwe.