2Mak 15 - ÎVUKU RÎA ÛVORO MWARO

Mûvango mûcûku wa Nikanoru

¹ Rîrîa Nikanoru aamenyire atî Judasi na andû ake maarî vûrûrirî wa Samaria, nîwathondekire mûvango wa kûmatharîkîra mûthenya wa thavatû. Vîndî îo ndangîatûnganire na ûgwati na andû methagîrwa mavurûkîte.

² Ayahudi arîa maaringîrîrîtue kûmûrûmîrîra nîmaamûthaithire ndagetîkîre gwîka ûndû ûcio ûtarî wa ntha wa kûûragana. Nîmaamûrire ave gîtîîo kûrî mûthenya ûrîa Ngai ûrîa wonaga indo cionthe aaûveere gîtîîo na akîwamûra kuuma kûrî mîthenya îo îngî yonthe.

³ Nake Nikanoru, mûndû wa mana nîwaûririe kana nîkwa kûrî na mûthamaki îgûrû rîa ûrîa wamathîte mathîkagîre mûthenya ûcio wa thavatû.

⁴ Nao Ayahudi acio nîmaamûcokerie atîrî, “Mwathani ûrîa ûtûûraga mwoyo, na wathanaga îgûrû nîke ke mwene watwathire tûtîîage mûthenya ûcio wa thavatû.”

⁵ Nikanoru nake nîwamacokerie atîrî, “Nie nînie mwathani wa nthî, kwoguo namwatha mwoce indo cienyu cia mbaara mwîke ûrîa mûthamaki augîte.” Kûnarî ûguo ndaavota kûvingia mûvango ûcio wake mûcûku.

Judasi nîwavarîrie athigari ake a mbaara kûthiî kûrûa

⁶ Nikanoru nîwarîtie arî na mwîyambo atî nîagaatumithia kîndû gîa kûririkananagia ûrîa aavootire Judasi.

⁷ Nwatî Judasi Makabii nîwetîkîtie atarî na mathangania atî Mwathani nîakûmûtethia.

⁸ Kwoguo nîwerire andû ake maûmîrîrie na matigetigîre kûtharîkîrwa nî andû a ndûrîrî. Nîwamerire maririkane ûrîa mbererî maatûmîrwe ûtethio kuuma îgûrû na mevoke Mwene Vinya Wonthe na nîakûmava ûvootani wana îvinda rîîrî.

⁹ Nîwamaûmîrîrie na ciugo irîa ciandîkîtwe mavukurî ma watho na ma arathi. Nîwamaririkanirie mbaara irîa maanavootana na makîgîa na vinya wa kûrûa.

¹⁰ Rîrîa aavarîrie andû ake kûrûa, nîwamavere mawatho make. Nîwacokire akîmonithia ûrîa andû a ndûrîrî mataarî evokeku, nîûndû matiavingagia irîkanîro irîa maarîkanîrîte.

¹¹ Judasi nîwanengerire wa mûndû indo cia mbaara na njîra ya kûmarîria ciugo cia gûtûma magîa na ûmîrîru akîmera matikevoke matumû na ngo. Akîmakenia onthe amera kîroto aarotete na Kîamvanaga ta kîoneki na maagîrîrwe nî kwiga mwîvoko wao varî kîo.

¹² Kîonekirî kîu oonete Oniasi ûrîa mbererî îo warî Mûthînjîri-Ngai mûnene, mûndû mwaro na watîîtwe nî andû, warî mwînyivia na mûvoreri. Nîwecî kwaria waro na nîwathomithîtue kuuma arî mûnini ûvoro wa mûtûûrîre mwaro. Aamwonire aûkîrîrîtie njara ciake akîvoera rûrîrî ruonthe rwa Ayahudi.

¹³ Agîcoka akîona vaumîra mûndû wîngî warî na njuîrî njerû nîûndû wa ûkûrû wake na wakûvewa gîtîîo na wonekaga arî na wathani mûnene.

¹⁴ Oniasi nîwaririe na akiuga atîrî, “Ûyû nî Jeremia mûrathi wa Ngai. Nîwendete andû ao, Ayahudi, amavoyagîra vîndî cionthe na akavoera îtûûra rîrîa rîtheru.”

¹⁵ Jeremia nîwakûnjûrire njara yake ya ûrîo na akînengera Judasi rûviû rwa njûra rwa thaavu na akîmwîra atîrî,

¹⁶ “Rûviû rûrû rwa thaavu nî rûtheru na nî kîveo kuuma kûrî Ngai. Rwoce ûthiî ûkanange nthû ciaku naruo.”

¹⁷ Ciugo icio mbaro ciarirue nî Judasi nîciatûmire andû onthe meyûmîrîrie na magîe na ûcamba, nao anake makîgîa na vinya wa kûrûa ta andû agima. Ayahudi magîtua atî matigate kavinda wana kanini, nwatî mathiî makatharîkîre nthû ciao na ûcamba makîonanaga metho kwa metho. Îtûûra rîao, ndini yao, na hekarû yao ciarî thînarî.

¹⁸ Kîmako Kîamo kînene gîtiarî kûrî aka ao na ciana, kana andû ao na arîa maaciaranîrîtue nao, nwatî Kîamrî kûrî hekarû.

¹⁹ Nao arîa maatigirwe îtûûrarî Jerusalemu meciragia ûrîa gûgatuîkîka mbaara îo îrî kîvarorî.

²⁰ Andû onthe meetererete mone nî ûrîkû ûkaavootana. Nthû nwa ciakuvagîrîria marî na athigari ao arîa maathiîcaga matûîte mbarathi mavangîtwe mîena yoîrî, na njogu ciao ikaigwa waro.

²¹ Judasi Makabii nîwaroririe na akîona wîngî wa athigari a mbaara arîa maarî mbere na indo cia mbaara mîthemba mîngî, na njogu ciarî na ûcamba mûno. Agîcoka akîambararia njara ciake na îgûrû na akîvoya Mwathani ûrîa wîkaga maûndû ma magegania, nîûndû Judasi nîwamenyaga Mwathani nîavecaga ûvootani arîa mavatarîte, na tî arîa marî na athigari eengî.

²² Judasi aavoire akiugaga atîrî, “We Mwathani, nîwatûmire mûraika waku rîrîa Hezekia aarî mûthamaki wa Judea na akîûraga athigari a mbaara a Senakeribu ngiri îgana na mîrongo înana na ithano (185,000).

²³ Na rîu, Mwathani wa îgûrû, tûma mûraika waku mwaro amakie na ekîre nthû cietû guoya.

²⁴ Nîûndû wa ûvoti waku mûnene, cûkangia andû aya matakûvecaga gîtîîo na maûkîte kûtharîkîra andû aku arîa ûthuurîte.” Judasi auga ciugo icio nîwarîkirie mavoya make.

²⁵ Nikanoru na andû ake maakuvagîrîria makîvuvaga tûrumbeta na makinaga nyîmbo cia mbaara.

²⁶ Judasi na andû ake maatonyire mbaararî kûrûa na nthû ciao makîvoyaga Ngai amatethie.

²⁷ Kwoguo, Ayahudi maarûaga na njara na makîvoyaga Ngai na ngoro na makîûraga nthû ciao andû ngiri mîrongo îthatû na ithano (35,000). Gîkeno Kîamo Kîamrî kînene nîûndû wa ûtethio ûcio Ngai aamaveere.

²⁸ Rîrîa maarîkirie kûvootana na magîcoka makenete, nîmoonire Nikanoru agûîte nthî arî mûkuû na arî na indo ciake cionthe cia mbaara.

²⁹ Nîmaaugîrîrie makenete na rûthiomi rwao na magîkumia Ngai.

³⁰ Judasi Makabii vîndî cionthe aarûagîrîra andû ao na vinya wake wonthe na ngoro yake yonthe. Nîwamendete mûno na akenda vûrûri wao kuuma arî mûndû mûnini. Kwoguo nîwathire andû ake matinie kîongo Kîam Nikanoru njara yake ya ûrîo na maivire Jerusalemu.

³¹ Rîrîa maakinyire kuo Judasi nîwetire andû onthe vandû vamwe na akîra athînjîri-Ngai marûngame mbere ya metha ya kîgongoona. Nîwacokire agîtûmana andû arîa maarî nyombarî ya kwîthitha îrîa yatumîtwe na nthingo cia vinya metwe.

³² Nîwamoonirie kîongo na njara ya mwimwa nî irî ûcio tî Nikanoru, njara îrîa aakûnjûrire na mwîtîîo orotete hekarû ntheru ya Ngai mwene vinya wonthe.

³³ Nîwatinirie rûrîmî rwa Nikanoru ûcio ûtaavecaga Ngai gîtîîo, na akiuga atî nîarwikîria iconi rûtuîke irio cia cio. Nakîo kîongo akiuga gîcuurue mwena wa hekarû ûtuîke ûira wa mwîgatho wa Nikanoru.

³⁴ Nao andû onthe makîroria na îgûrû magîkumia Mwathani ûcio wonanîtie ûvoti wake na akagitîra hekarû yake ndîkagwatue gîko.

³⁵ Judasi nîwacuririe kîongo Kîam Nikanoru rûthingorî rwa nyomba ya kwîthitha îrîa yatumîtwe na nthingo cia vinya nîguo andû onthe magîe na ûira wa ûtethio wa Mwathani.

³⁶ Na andû onthe nîmaavîtûkirie na ngoro îmwe atî mûthenya ûcio ûririkanagwe na ûkûngûagîrwe mwaka wa mwaka, mbere ya mûthenya wa Moridekai. Mûthenya ûcio nî mûthenya wa îkûmi na kathatû wa mweri wa îkûmi na kaîrî ûrîa wîtagwa na rûthiomi rwa Sîria Adari.

Kûrîkia

³⁷ Ûguo nîguo maûndû ma Nikanoru maavanire. Kuuma vîndî îo îtûûra rîa Jerusalemu rîthîrîtwe rîrî rîa Ayahudi. Kwoguo nîngûrîkîria rûgano rwakwa ava.

³⁸ Angîthîrwa nîrwandîke na njîra mbaro rûtakûvîngîcithanua, kîu nîkîo gîkeno gîakwa. Angîthîrwa rwandîkîtwe kîthogothogo, ûguo nîguo nie nîngîravotire.

³⁹ Tîwaro kûnyua ndivei îrî yonga kana rîngî kûnyua manjî marî monga, nîûndû ndivei îtukanîtue na manjî nî îcamaga waro mûno na nîîtûmaga mûndû acanjamûke. Naruo rûgano rwaro rwandîkîtwe na njîra îrîa nginyanîru nîrûkenagia ûrîa ûrarûthoma. Ûvoro wakwa wakinya vau.