2Mak 13 - ÎVUKU RÎA ÛVORO MWARO

Menelau nîwaûragirwe

¹ Mwakarî wa 149 Judasi na andû ake nîmaanyitire ndûmîrîri atî, Anitioku Eupatori arî na gîkundi kînene Kîam athigari a mbaara nîwaûkîte kûtharîkîra Judea.

² Anitioku maaûkîte na Lîsia ûrîa wamûgitagîra na aarî mûnene wa thirikari. Wa mûndû aarî na gîkundi kînene Kîam athigari a mbaara a Kîngiriki arîa maathiîcaga na magûrû ngiri îgana na îkûmi (110,000), na arîa maathiîcaga matûîte mbarathi ngiri ithano na magana mathatû (5,300), njogu mîrongo îîrî na igîrî (22), na ikaari cia kûguucua nî mbarathi magana mathatû (300) ciarî na mviû mbûgî.

³ Menelau nîwetukanîre na andû acio, na njîra ya ûvinga akîringîrîria Anitioku mathiî na mbere. Ndeekaga ûguo nîûndû wa wagîrîru wa vûrûri wake, nwatî mworoto wake warî wa acokue wîrarî wa mûthînjîri-Ngai mûnene.

⁴ Nwatî Mûthamaki wa athamaki nîwatûmire Anitioku anyitwe nî marakara nîûndû wa Menelau. Rîrîa Lîsia oonirie Anitioku atî Menelau nîke warî kiumo Kîam mathîna mau monthe, Anitioku nîwathanire Menelau avirwe îtûûrarî rîetagwa Berea na akaûragîrwe kuo kûringana na mîtugo ya kûndû kûu.

⁵ Îtûûrarî rîu kwarî na nyomba yatumîtwe ndaca ya ûraca na îgûrû wa mita mîrongo îîrî na igîrî (22). Nyomba îo yethagîrwa îcûrîte mûu. Kûthiûrûrûkîria nyomba îo na mwena wa ndaarî kwarî na ngathî cienamîte na kûu mûu warî.

⁶ Andû arîa maathitangagwa nîûndû wa kûruma ngai ciao cia mîvuanano kana îvîtia rîngî wa rîonthe îcûku, maaviragwa nyombarî îo ndaca vau îgûrû magaikua kûu mûurî na magakua.

⁷ Ûguo nîguo Menelau aaûragirwe na ndaanathikwa.

⁸ Ûguo nîguo aagîrîrwe nî gwîkwa nîûndû nîwavîtîrîtie metha ya kîgongoona maita meengî kîrîa mwaki wakîo na mûu wethagîrwa ûrî mûtheru.

Mbaara vakuvî na îtûûra rîa Modeini

⁹ Mûthamaki arî na mwîtîîo mûnene aaûkîte akîvangaga ûrîa agwîka Ayahudi maûndû macûku gûkîra marîa îthe aamekîte.

¹⁰ Nwatî rîrîa Judasi aamenyire ûguo, nîwerire andû ake mavoe Mwathani ûtukû na mûthenya makîria ya ûrîa maanavoya mbere nîguo amatethie. Aamerire ûguo nîûndû maarî ûgwatirî wa kûrwa nî watho wao, vûrûri, na hekarû yao îrîa ntheru,

¹¹ nîguo ndagetîkîrie andû a ndûrîrî arîa marumaga Ngai wao mamacuna vûrûri ûrîa maambîrîrîtie kûthondeka.

¹² Maathiririe mîthenya îthatû mamamîte na îvu mûtheturî makîrîraga na makenyerekia makîvoyaga Mwathani amatethie. Judasi nîwacokire akîmarîria na ciugo cia kûmaûmîrîria na akîmera mekare mevarîrîtie.

¹³ Vuva wa kûgîa ndundu na athuuri a Ayahudi, Judasi nîwatuire aumagare athiî evokete ûtethio wa Ngai akarûe na mûthamaki Anitioku na athigari ake a mbaara mbere ya matharîkîra Judea manyita Jerusalemu.

¹⁴ Marîkia kwiga maûndû marîa maatuire kûrî Ngai ûrîa waûmbire îgûrû na nthî, nîwerire athigari ake marûe marî na ûcamba wana ethîrwa nî gûkua nîûndû wa watho wao, hekarû, Jerusalemu na mîtugo ya vûrûri wao. Nîmaacokire magîtuma magema mao vakuvî na îtûûra rîa Modeini.

¹⁵ Judasi nîwerire athigari ake marûe makiugaga, “Ûvootani ûrî na Ngai.” Nîwathuurire gîkundi Kîam athigari arîa maarî njamba na agîcoka akîtharîkîra mwena ûrîa warî na îgema rîa mûthamaki ûtukû na akîûraga athigari nthû ngiri igîrî, na akîûraga njogu îrîa yatongoragia na mûndû ûrîa wathiîcaga amîtûîte.

¹⁶ Mûthiiarî nîmaatigire nthû ciao varîa ciambîte magema imakîte na ciagagîte, na Judasi na andû ake magîcoka makîthiî mavootanîte.

¹⁷ Maûndû mau meekîkire karuorarî mbere ya riûa rîratha nîûndû nîmaagitîrîtwe nî Mwathani.

Anitioku wa Gatano nîwarûthire kîrîkanîro na Ayahudi

¹⁸ Ûmîrîru ûcio wa Ayahudi nîweguithirie mûthamaki Anitioku ûndû na ûgîtûma ecirie wara ûrîa angîvûthîra nîguo atharîkîre mîena ya Ayahudi.

¹⁹ Nîwatharîkîre Bethisura îtûûra rîa Ayahudi rîarî rîgitîre mûno na agîcokithua. Nîwacokire akîrîtharîkîra rîngî na akîvootwa.

²⁰ Judasi nîwaviragîra athigari arîa maagitagîra îtûûra rîu indo cia mbaara irîa maavataraga,

²¹ nwatî mûthigari ûmwe wa Kîyahudi wetagwa Rodokusi nîwaumbûrire nthitho yao kûrî athigari nthû. Nake nîwamenyekanire, akînyitwa na akîûragwa.

²² Mûthamaki Anitioku nîwageririe vîndî ya kaîrî kûrûtha kîrîkanîro na andû a Bethizuri na megwithania nîwarutire athigari ake a mbaara kûrîa maambîte magema. Nîwacokire akîthiî akîtharîkîra Judasi na andû ake, nwatî akîvootwa.

²³ Mûthamaki Anitioku nîwanyitire ndûmîrîri atî Filipu, ûrîa aatigîte Anitiokia arûngamagîrîre thirikari nîwamûgarûrûkîte. Mûthamaki nîwarakarire na agîîta Ayahudi nîguo mathondeke kîrîkanîro Kîam thayû nao. Marîkia kwîguithanîria maûndûrî marîa maaragîrîria nîwamerîrîre na mwîvîtwa atî akamaroragîrîria na njîra mbaro. Nîwacokire akîruta îgongoona na akîonania gîtîîo gîa hekarû na akîruta iveo na ûtana nîûndû wayo,

²⁴ na akîamûkîra Judasi Makabii na gîtîîo. Mûthamaki akîthuura Hegemonide atuîke mûnene wa vûrûri ûrîa ûrî gatagatî ka îtûûra rîa Putolemai nginya îtûûra rîa Gerari,

²⁵ nake agîcoka akîthiî Putolemai. Nao andû a kûu nîmaarakarîte mûno nîûndû wa kîrîkanîro kîu maathondekete na Ayahudi na nîmeendaga kîtharue.

²⁶ Nwatî Lîsia nîwarûngamire îgûrû vandû vatûgîru na akîarîria andû, na akîgitîra kîrîkanîro kîu na ûvoti wake wonthe. Arîkia kûmegwithia na kûmavoreria, na magîtîkania nake, nîwacokire akîthiî Anitiokia. Ûguo nîguo mûvango wa mûthamaki Anitioku wa kûtharîkîra Judea wavaraganire na agîcoka na vuva.