2Mak 11 - ÎVUKU RÎA ÛVORO MWARO

Judasi Makabii nîwavootire Lîsia

¹ Vuva wa kavinda kanini, Lîsia ûrîa warangagîra mûthamaki na aarî wa mûciî wa mûthamaki nîwanyitire ûvoro wa ûrîa gwekîkîte.

² Nîwagomanirie vamwe athigari ngiri mîrongo înana (80,000) na athigari ake onthe arîa maathiîcaga matûîte mbarathi na akîthiî kûrûa na Ayahudi. Eendete gûtua îtûûra rîa Jerusalemu kûndû gwa gûtûûragwa nî Angiriki,

³ na hekarû ya Jerusalemu îrutage gooti wata ûrîa kûndû kwa ndûrîrî gwa kûvoyagîrwa gwekaga. Na aarî na mworoto atî wîra wa Mûthînjîri-Ngai mûnene nîkwa ûkendagua mwaka wa mwaka.

⁴ Lîsia ndamakagua nî vinya wa Ngai, nwatî nîwetîîaga nîûndû aarî na athigari a mbaara engî mûno arîa mathiîcaga na magûrû na engî mathiîcaga matûîte mbarathi, na njogu mîrongo înana (80).

⁵ Nîwathithûkîre Judea, na akîtharîkîra Bethizuri kûndû gwa kwîgitîra gwatumîtwe na nthingo cia vinya mûno. Bethizuri yarî kilomita mîrongo îthatû kuuma îtûûra rîa Jerusalemu.

⁶ Vîndî îrîa Judasi na andû ake maanyitire ûvoro atî Lîsia nîarathiûrûrûkîria kûndû kwao gwa kwîgitîra kûrîa gwatumîtwe na nthingo cia vinya, ke vamwe na andû ake nîwacakaire na makîrîra mûno onthe na makîthaitha Mwathani amatûmîre mûraika mwaro aûke amavonokie.

⁷ Makabii ke mwene nîke warî wa mbere gwoca indo cia mbaara, na akîûria andû acio engî merutîre mîoyo yao nîguo matethie Ayahudi acio engî. Kwoguo nîmaaumagarûkire onthe marî kîndû kîmwe na marî na ûcamba.

⁸ Na matarî marathiî varaca mûno na îtûûra rîa Jerusalemu, wa rîmwe nîvaaumîrire mûndû watûîte mbarathi ekîrîte nguo njerû na arî na indo cia mbaara cia thaavu akîmatongoria.

⁹ Nao onthe nîmaakumirie Ngai nîûndû wa kûmeguîra ntha, makîgîa na vinya mwîngî mûno ngororî wa kûtharîkîra andû onga wana nyamû cia kîthakarî irîa mbaganu mûno wana nthingo cia cuuma.

¹⁰ Nîmaathiîre na mbere mevangîte nîûndû wa mbaara marî vamwe na mûndû ûcio wa kûmatethia waumîte îgûrû, nîûndû Ngai nîwameguîrîrîte ntha.

¹¹ Nîmaarûgîre nthû ciao ta mînyambû na makîûraga athigari arîa maathiîcaga na magûrû ngiri îkûmi na îmwe (11,000), na arîa maathiîcaga matûîte mbarathi ngiri îmwe na magana matandatû (1,600), na magîtûma acio engî maûre.

¹² Eengî a arîa maaûrire nîmaagurarîtue na magata indo ciao cia mbaara. Lîsia ke mwene nîwaûrire aconokete mûno.

Lîsia nîwathondekire maûndû ma thayû na Ayahudi

¹³ Lîsia aarî mûndû mûûgî. Nîwacokire agîîciria mûno kîrîa gîatûmire avootwa nî Ayahudi, na akîmenya atî Ayahudi maamûvootire nîûndû maarûagîrîrwa nî Ngai ûrîa ûrî vinya. Kwoguo nîwatûmanire kûrî Ayahudi

¹⁴ na akîmathaitha metîkîre meguithanîrie maûndûrî monthe na njîra ya waragania, na atî nîakûthaitha mûthamaki etîkîre atuîke mûrata wao.

¹⁵ Nîûndû wa wagîrîru wa andû ake, Judasi Makabii nîwetîkîre maûndû mau monthe Lîsia aaûrîtie nîûndû wana mûthamaki nîwetîkîrîte maûndû marîa Judasi eerîte Lîsia na maarûa.

Maarûa ya Lîsia kûrî Ayahudi

¹⁶ Maarûa îrîa Lîsia aandîkîre Ayahudi yandîkîtwe atîrî: “Kuuma kûrî nie Lîsia nînamûkethia mue Ayahudi.

¹⁷ Andû arîa mwatûmire kûrî nie, Johana na Abusalomu, nîmaanginyîrie maarûa îrîa mwamatûmire mandetere na nîmambûrîtie mbîtîkanie na maûndû marîa mandîkîtwe maarûarî îo.

¹⁸ Nîmenyithîtie mûthamaki maûndû monthe marîa aagîrîrwe nî kûmenya, na nîetîkîrîte kûvingia marîa monthe mangîvoteka.

¹⁹ Ethîrwa nîmûkûthiî na mbere kwathîkîra thirikari, mavinda marîa magûka nîngaageria mûno gwîka maûndû ma kûreta wagîrîru wa rûrîrî rwenyu.

²⁰ Nîmbathîte andû akwa na anjaama aku macemanie nawe nîguo mwarîrîrie maûndû mau.

²¹ Mûrogîa na thayû. Tarîki mîrongo îîrî na inya, mweri wa Diosikorinithio, mwaka wa 148.”

Maarûa marîa mûthamaki aandîkîre Lîsia

²² Maarûa îrîa mûthamaki aandîkîre Lîsia yandîkîtwe atîrî: “Nie mûthamaki Anitioku nînagûkethia we Lîsia, mûrwaiya.

²³ Vava nîarîkîtie kûthiî nîguo magatûûrage na ngai cia methe metû ma tene. Kwoguo tûrenda andû arîa marî rungu rwa wathani wakwa mekage maûndû mao matakûthînua nî mûndû.

²⁴ Nîmenyete atî Ayahudi matirenda kûrûmîrîra mîtugo ya Kîngiriki ta ûrîa warî wendi wa vava, nwatî marenda kûrûmîrîra mîtugo yao, na nîmaûrîtie metîkîrue mamîrûmagîrîre.

²⁵ Wendi wetû nî atî vûrûri ûyû wîkare ûtakûthînua wata ndûrîrî irîa ciîngî na tûngîenda macokerue hekarû yao na marûmagîrîre mîtugo ya methe mao ma tene.

²⁶ Kwoguo nî waro ûmamenyithie îtua rîu na ûmere atî nie nîngûtuîka mûrata wao nîguo mamenye mîvango yetû na mekage maûndû mao makenete na matagwîtigîra.”

²⁷ Maarûa îrîa mûthamaki aandîkîre Ayahudi yandîkîtwe atîrî: “Kuuma kûrî mûthamaki Anitioku, nînamûkethia mue atongoria a Kîamma kînene Kîam Ayahudi wana Ayahudi acio engî.

²⁸ Ngwîvoka atî mûrî aro, wananie nîrî na ûgima wa mwîrî.

²⁹ Menelau nîamenyithîtie atî nîmûrenda gûcoka na kwenyu mûciî nîguo mûthiî mûgekage maûndû menyu mue ene.

³⁰ Kwoguo arîa onthe makwîthîrwa macokete mbere ya tarîki mîrongo îthatû cia mweri wa Kisanithiko nîngûmerîra atî nî arata na marî na rûtha,

³¹ na mûthiî na mbere kûrûmîrîra mawatho menyu ma irio, na mawatho mau mengî wata ûrîa mwamenyerete gwîka na gûtirî mûndû ûkaaverithua nîûndû wa ûndû ûrîa ekîte atakûmenya.

³² Nînatûma Menelau nîguo amwîkîre vinya.

³³ Mûrogîa na thayû. Tarîki îkûmi na ithano, mweri wa Kisanithiko, mwaka wa 148.”

Maarûa ya Aroma kûthiî kûrî Ayahudi

³⁴ Aroma wanao nîmaatûmîre Ayahudi maarûa yandîkîtwe ta ûû: “Tue Kuinito Memio na Tito Manio, arûngamîrîri a thirikari ya Roma, nîtwamûkethia mue Ayahudi.

³⁵ Tue nîtûgwîtîkania na maûndû monthe marîa Lîsia ûrîa wa mbarî ya mûthamaki amwîtîkîrîtie.

³⁶ Rîu tûthiîte Anitiokia, kwoguo maûndû marîa Lîsia aaugire atî nîmakwenda kûmenyithua mûthamaki, marîrîrieni waro. Mûcoke mûtûme mûndû kûrî tue narua atûmenyithie mawoni menyu nîguo natue tûkamenyithie mûthamaki ûrîa mûkwenda.

³⁷ Kwoguo îkani ûndû wana îvenya mûtûme andû maûke matûmenyithie matua menyu.

³⁸ Mûrogîa na thayû. Tarîki îkûmi na ithano, mweri wa Kisanithiko, Mwaka wa îgana rîa mîrongo îna na inyanya (148).”