2Mak 10 - ÎVUKU RÎA ÛVORO MWARO

Hekarû nîyamûrirwe rîngî

¹ Judasi Makabii na arûmîrîri ake matongoretue nî Mwathani nîmaanyitire rîngî hekarû na îtûûra rîa Jerusalemu.

² Makîomomora metha cia magongoona irîa ciatumîtwe nî ageni kûrîa andû maatûnganaga, na makîomomora kûndû kûrîa gwatumîtwe gwa kûgoocagîrwa.

³ Nîmaatheririe hekarû na magîtuma metha îngî ya kîgongoona. Nîmaaringithanirie tûmathiga tûkiuma mwaki makîruta îgongoona rîa mbere vuva wa gwîkara îvinda rîa mîaka îîrî, makîvîvia ûbani, magîakia taa, na makiga mîgate îrîa mîamûre varîa yaigagwa.

⁴ Marîkia gwîka ûguo, nîmaamamire magîturumithia mothiû mao nthî na makîvoya Mwathani ndakaanamarekererie magîa mathînarî ta mau rîngî. Narîo mangîkaamûvîtîria, nîkava makaaverithua nîke nîûndû arî ntha vandû va kûverithua nî ndûrîrî itarî ntha na itamûvecaga gîtîîo.

⁵ Hekarû yatherirue mûthenya wa mîrongo îîrî na îtano wa mweri wa Kisilevu, mûthenya na mweri wata ûrîa hekarû yagwatirue mûgiro nî andû a ndûrîrî ciîngî.

⁶ Maakûngûîre kûtherua gwa hekarû îvinda rîa mîthenya înana marî na gîkeno ta ûrîa makûngûagîra kîrugo gîa tûnyomba makîririkanaga ûrîa kavinda gatarî karaca maaûrûraga irîmarî na makîraraga makurungurî ta nyamû cia kîthaka.

⁷ Magîoca mîragi îgemetue na maûa maro marîa matambaga na magîûkîrîria mvûa cia mîkîndû makîthiûrûrûka hekarû marûmanîrîrîte makinaga nyîmbo. Maainaga nyîmbo cia gûkumia na gûcokeria ngatho ûcio wamavotithirie kûtheria hekarû yake ke mwene.

⁸ Nao nîmetîkanirie na ngoro îmwe na makîvîtûkia atî vûrûri wonthe wa Ayahudi nwanginya ûkûngûagîre mîthenya îo wa mwaka.

Putolemî Makironi nîweitire

⁹ Ûcio nîguo warî mûrîkîrîrio wa Anitioku ûrîa wetagwa Epifane.

¹⁰ Rîu nîtûgûcoka kûmwîra ûvoro wa Anitioku Eupatori ûrîa warî mûvîcî wa mûndû ûcio ûtaatîîaga Ngai na tûmwîre na njîra nguvî maûndû macûku marîa maaumanire na mbaara irîa aarûithirie.

¹¹ Rîrîa Eupatori aatuirwe mûthamaki, nîwathuurire mûndû ûmwe wetagwa Lîsia arûgamagîrîre maûndû ma thirikari na atuîke mûnene wa Sîria îrîa nene na Foenike.

¹² Ûrîa warî mûnene wa Ayahudi mbere aarî Pitolemi Makironi na nîwamonetie wathani wa kîvooto. Nîwageretie kûmakenia nîguo athithîrîre maûndû macûku marîa mekîtwe Ayahudi.

¹³ Nîûndû wa ûguo, arata a Eupatori nîmaamûthitangire na makiuga atî Makori nî mûkunyanîrîri nîûndû nîwatiganîrîtie gîcîgîrîra gîa Kuporo kîrîa aaveetwe nî Filometori athage akîrûmîrîra Anitioku Epifane. Nîwaremirwe nî kûruta wîra ûrîa aagîrîrwe nî kûruta nîûndû andû onthe maamwîtaga mûkunyanîrîri, kwoguo nîwanyuire ndawa irî na ûrogi na agîkua.

Judasi Makabii nîwavootire andû a Idumea

¹⁴ Rîrîa Gorigia aatuîkire mûnene wa vûrûri wa Idumea, nîwacaririe athigari a kûrîvwa kuuma kûndû vûrûrirî wîngî na akatharîkagîra Ayahudi vîndî îrîa agîa na kamweke.

¹⁵ Vamwe na ûguo andû a Idumea arîa maarangagîra kûndû kûrîa gwatumîtwe na vinya gwa kwîgitîra nîmeekaraga makîthînagia Ayahudi. Nîmaamûkagîra arîa maavinyûrîtue makîthiî Jerusalemu na nîmaaigîte vûrûri ûrî na mbaara.

¹⁶ Kwoguo Judasi na andû ake nîmaavoire Ngai amatethie mbaararî. Nîmaacokire makiuma na îvenya na makîtharîkîra kûndû kûrîa kwarî kûgitîre gwa kwîthitha kwa andû a Idumea.

¹⁷ Nîmaamatharîkîre na vinya mûno nginya makînyita kûndû kûu na makîvoota arîa maarangagîra nthingo na makîûraga andû ngiri mîrongo îîrî (20,000).

¹⁸ Andû ta ngiri (9,000) kenda a Idumea nîmaaûrire na makîthiî kwîthitha nyombarî igîrî irîa ciatumîtwe cia kwîthitha. Kûndû kûu kwarî na indo cionthe irîa mangîendire nîûndû wa kwîgitîra rîrîa mangîrigicîrua.

¹⁹ Judasi Makabii nîwatigire Simoni, Josefu, Zakayo, na athigari ake a mbaara eganu a kûthiî na mbere kûrigicîria andû a Idumea. Ke nîwacokire akîthiî kûrîa eendekanaga na îvenya.

²⁰ Nwatî andû arîa maarî na Simoni nîmaagîre na ûkoroku wa mbeca na magîtîkîra kwamûkîra îvaki. Rîrîa maaverwe mbeca cia sîlûva kilo ngiri mîrongo îtandatû na inya (64,000) nîmaarekire andû amwe a Idumea mathiî.

²¹ Rîrîa Judasi Makabii aakinyîrwe nî ûvoro wa ûrîa gwekîkire, nîwagomanithirie vamwe atongoria a athigari ake a mbaara na akîthitanga andû acio. Aamathitangire atî nîmendetie andû ao mbeca na makîrekereria nthû ithiî icoke kûrûa nao.

²² Nîwaûragire andû acio maamûkîrîte mavaki, na agîcoka akîtharîkîra nyomba icio igîrî kûrîa andû a Idumea meethithîte na akîinyita.

²³ Kûrîa kuonthe Judasi aatharîkagîra nîwavootanaga. Atharîkîra nyomba icio igîrî cia kwîthitha ciarî ngitîre mûno nîwaûragire makîria ya arûme ngiri mîrongo îîrî (20,000).

Judasi nîwavootire Timotheo

²⁴ Timotheo nîwarûîte na Ayahudi na vau kavererî na akîvootwa nî Ayahudi. Nîwacokire agîcokanîrîria gîkundi kînene mûno Kîam athigari a mbaara a kûrîvwa a kuuma Asia na maathiîcaga matûîte mbarathi, na akîthiî erekerete Judea nîguo arînyite wa rîmwe.

²⁵ Rîrîa maakuvîvîrie, Judasi na andû ake nîmeeminjîrie mûu ciongo na magîkîra nguo cia macakaya na makîvoya Ngai.

²⁶ Nîmaamamire maturumithîtie mothiû mao nthî mbere ya metha ya kîgongoona na makîvoya Ngai amatethie arûe na nthû ciao kûringana na ûrîa eranîrîte wathorî wake.

²⁷ Rîrîa maarîkirie kûvoya, nîmoocire indo ciao cia mbaara na nîmaathiîre vandû vatarî varaca mûno kuuma îtûûrarî. Na maakuvîvîria nthû ciao nîmaarûngamire.

²⁸ Rîrîa gwakeere mbaara nîyambîrîrie gatagatî ga ikundi icio igîrî cia athigari a mbaara. Athigari a mbaara a Ayahudi maarî na ûûma wa kûvootana nîûndû meevokete Ngai-Mûnene nwatî tî vinya wao wa mbaara tu, nacio nthû ciao cievokete kûrûa na vinya.

²⁹ Mbaara ya caca mûno, nthû cia Ayahudi nîcionire îgûrû kwaumîra arûme atano athaka matûîte mbarathi na irî na mîkanda ya thaavu matongoreretie athigari a mbaara a Ayahudi.

³⁰ Andû acio atano maathiûrûrûkîrîtie Judasi mamûgitîrîte na indo ciao o ene cia mbaara na makamûgitagîra nîguo ndagaativue. Andû acio nîmaaikîrie nthû ciao mîguî ta mbura na mveni na nginya magîtiga kwona na makîagaga. Nao Ayahudi makîmatinangia tûcunjî,

³¹ na makîûraga athigari ngiri mîrongo îîrî na magana matano (20,500), na engî arîa maathiîcaga matûîte mbarathi athigari magana matandatû (600).

³² Timotheo ke mwene nîwaûrire akîthiî kwîthitha Gezeri kûndû kwarî kûgitîre mûno. Mûnene wa kûndû kûu eetagwa Kaereasi.

³³ Makabii na andû ake nîmaakenirue mûno nî ûndû ûcio, na nîmaarigicîrie kûndû kûu îvinda rîa mîthenya îna.

³⁴ Andû arîa maarî nyomba ndaarî nîmoonaga marî vandû vagitîre mûno, na makîruma Ngai irumi njûku mûno na makîmarîria mîario mîcûku.

³⁵ Nwatî mûthenya wa gatano tene gûtarî kûrathamburûkana, arûme ethî mîrongo îîrî kuuma gîkundirî Kîam athigari a mbaara nîmaarakarire nîûndû wa kûruma Ngai. Nîmaatonyire kûu kwarî kûgitîre marî na ûcamba na marakara na makîûraga mûndû wa wonthe maatûnganaga nake.

³⁶ Acio engî nîmaatonyire kuo mavîtûkîrîrîte rûthingorî na mwena ûcio wîngî na magîkûvîvia na mwaki. Nîmaavîvirie andû marî mwoyo acio maarumaga Ngai. Acio engî makîvunja mîrango na athigari a mbaara acio engî magîtonya na makînyita kûndû kûu kwarî gwa kwîthitha.

³⁷ Nîmaaûragire Timotheo ethithîte kîrikorî Kîam manjî, makîûraga mûrwang'ina Kaereasi na Apolofanesi.

³⁸ Marîkia gwîka maûndû mau monthe nîmaacokerie Ngai-Mûnene ngatho na makîmûkumia na nyîmbo nîûndû wa kwîguîra andû a Isiraeli ntha nyîngî na kûmava ûvootani.