2Atha 8 - ÎVUKU RÎA ÛVORO MWARO

Mûndûmûka ûrîa Mûshunemu nîwacokire

¹ Elisha nîwerîte mûndûmûka ûrîa watûûraga Shunemu, ûrîa aariûkîtie mûvîcî atîrî, “Ûkîra mûrî na andû a nyomba yaku na mûthiî kûndû kwîngî, nîûndû Ngai-Mûnene nîagûtûma kûgîe na yûra vûrûrirî îvinda rîa mîaka mûgwanja.”

² Kwoguo mûndûmûka ûcio nîwekire wata ûrîa erirwe nî Elisha. Ke, na andû a mûciî wake nîmaathiîre vûrûrirî wa Filisiti na magîtûûra kuo îvinda rîa mîaka mûgwanja.

³ Mîaka mûgwanja yathira, mûndûmûka ûcio nîwacokire vûrûrirî wa Isiraeli kuuma vûrûrirî wa Afilisiti, na akîthiî kûria mûthamaki amûcokerie nyomba na mûgûnda wake.

⁴ Nîwethîrîrie mûthamaki akîaragia na Gehazi ndungata ya Elisha. Mûthamaki eraga Gehazi atîrî, “Tambîra maûndû monthe manene marîa Elisha ekîte.”

⁵ Vîndî wa îo Gehazi eraga mûthamaki ûrîa Elisha aariûkîtie mûndû, wa rîmwe, ng'ina wa kaana karîa kaariûkîtue nîwaûririe mûthamaki amûcokerie nyomba na mûgûnda wake. Nake Gehazi nîwerire mûthamaki atîrî, “Mwathi wakwa mûthamaki ûyû nîke mûndûmûka warî na mûvîcî ûrîa Elisha aariûkirie!”

⁶ Mûthamaki nîwaûririe mûndûmûka ûcio ûvoro ûcio; nake mûndûmûka nîwamwîrire wata ûrîa Gehazi aamwîrîte. Kwoguo mûthamaki nîwetire ndungata îmwe yake na akîmîra atîrî, “Cokeria mûndûmûka ûyû indo cionthe irîa ciarî ciake vamwe na irio cionthe cia mîgûnda irîa ciakethetwe îvinda rîa mîaka mûgwanja kuuma rîrîa aaumire vûrûrirî ûyû nginya ûmûnthî.”

Elisha na mûvîcî wa Hadadi, mûthamaki wa Sîria

⁷ Elisha nîwathiîre Damesiki vîndî îrîa mûvîcî wa Hadadi, mûthamaki wa Sîria aarî mûrwaru. Rîrîa mûthamaki eerirwe atî Elisha aarî kûu,

⁸ nîwerire Hazaeli, ndungata yake atîrî, “Oca kîveo ûthiî nakîo kûrî Elisha na ûmwîre ambûrîrie kûrî Ngai-Mûnene kana nîngûvona mûrimû ûyû.”

⁹ Kwoguo Hazaeli nîwocire kîveo na akîthiî gûtûnga Elisha. Aathiîre na indo cionthe mbaro cia kuuma Damesiki aikuuîte na mbarathi mîrongo îna (40). Rîrîa Hazaeli aakinyire kûrî Elisha, nîwamwîrire atîrî, “Ndungata yaku, mûvîcî wa Hadadi, mûthamaki wa Sîria andûma mbûke ngûrie kana nîakûvona mûrimû ûcio arwarîte.”

¹⁰ Elisha nîwacokirie atîrî, “Thiî ûmwîre nîakûvona; nwatî Ngai-Mûnene nîanguûrîrîtie atî nama nîagûkua.”

¹¹ Elisha nîwaroririe Hazaeli ûthiûrî wake na vinya nginya Hazaeli akîgua nthoni, na wa rîmwe Elisha nîwatumûkire na kîrîro.

¹² Hazaeli nîwaûririe Elisha atîrî, “Mwathi wakwa, ûrarîra nîkî?” Nake Elisha nîwacokerie Hazaeli atîrî, “Nîûndû nîmbîcî maûndû macûku marîa ûgeeka andû a Isiraeli: nîûkavîvia matûûra mao marîa magitîre, ûûrage anake ao, ûûrage ciana ciao, na nîûgaatarûra nda cia aka a Isiraeli arîa marî mavu.”

¹³ Hazaeli nîwaûririe Elisha atîrî, “Nie mwathi makwa nîrî û, atî nwa mbîke ûndû ûcio mûnene ûguo?” Nake Elisha nîwacokirie atîrî, “Ngai-Mûnene nîanguûrîrîtie atî nîûgaatuîka mûthamaki wa Sîria.”

¹⁴ Hazaeli nîwaumire kûrî Elisha na agîcoka rîngî kûrî mwathi wake, na mwathi wake akîmûria atîrî, “Elisha auga atîa?” Nake Hazaeli nîwamûcokerie atîrî, “Ambîra nama, nîûkûvona.”

¹⁵ Nwatî mûthenya ûcio wîngî, Hazaeli nîwocire mûrengeti, akîûrinda manjîrî na akîovania mûthamaki ûthiû naguo na agîkua. Hazaeli nîwacokire agîtuîka mûthamaki wa Sîria vuva wa Benihadadi.

Jehoramu, mûthamaki wa Juda

¹⁶ Mwakarî wa gatano Joramu, mûvîcî wa Ahabu arî mûthamaki wa Isiraeli, Jehoramu, mûvîcî wa Jehoshafati nîwatuîkire mûthamaki wa Juda.

¹⁷ Jehoramu aatuîkire mûthamaki aarî na ûkûrû wa mîaka mîrongo îthatû na îîrî (32) na aathanire arî Jerusalemu îvinda rîa mîaka înana (8).

¹⁸ Mûka aarî mwarî wa Ahabu. Kwoguo nîwekire maûndû macûku wata marîa meekagwa nî andû a nyomba ya Ahabu na athamaki a Isiraeli. Nîwevîrie Ngai-Mûnene,

¹⁹ nwatî Ngai-Mûnene ndenda gûcûkangia Juda nîûndû nîwerîrîte ndungata yake Daudi atî njiarwa ciake nîitûûra ciathanaga.

²⁰ Vîndî ya ûthamaki wa Jehoramu, andû a Edomu nîmaaregire kwathwa nî mûthamaki wa Juda na nîmaathuurire mûthamaki wao.

²¹ Kwoguo Jehoramu na anene ake onthe a ikaari ciake cia mbaara nîmaambîrîrie rûgendo ûtukû na makîthiî Zairi, na makîûraga andû a Edomu arîa maamûthiûrûrûkîrîtie. Nwatî athigari a mbaara a Edomu nîmaaûrire makîthiî kwao mîciî.

²² Kwoguo andû a Edomu nîmaaregire kwathagwa nî mûthamaki wa Juda nginya ûmûnthî. Îvindarî wa rîu nwarîo andû a îtûûra înene rîa Libuna wanao maareganire na wathani wa Juda.

²³ Maûndû mau mengî monthe marîa Jehoramu eekire mandîkîtwe îvukuurî rîa maûndû ma tene ma Athamaki a Juda.

²⁴ Kwoguo Jehoramu nîwakwire na akîthikwa mbîrîrarî cia methe make kûu îtûûrarî rîrîa înene rîa Daudi; nake Ahazia, mûvîcî nîwatuîkire mûthamaki vuva wake.

Ahazia, mûthamaki wa Juda

²⁵ Mwakarî wa îkûmi na îîrî Joramu, mûvîcî wa Ahabu arî mûthamaki wa Isiraeli, Ahazia, mûvîcî wa Jehoramu nîwatuîkire mûthamaki wa Juda.

²⁶ Ahazia aarî na ûkûrû wa mîaka mîrongo îîrî na îîrî (22) rîrîa aatuîkire mûthamaki, na aathanire arî Jerusalemu îvinda rîa mwaka ûmwe. Ng'ina eetagwa Athalia, ûrîa warî ûcûwe wa Omuri, mûthamaki wa Isiraeli.

²⁷ Ahazia aarî mûthoniwe wa mûciî wa Ahabu na nîwekire maûndû marîa mekagwa nî andû a nyomba ya Ahabu. Kwoguo Ahazia nîwevîrie Ngai-Mûnene wata ûrîa andû a nyomba ya Ahabu meekire.

²⁸ Mûthamaki Ahazia nîmaaûnganire na mûthamaki Joramu na makîthiî kûrûa na mûthamaki Hazaeli wa Sîria. Mbaara îo yarûîrwe Ramothu kûu Gileadi, na Joramu nîwativirue nî andû a Sîria.

²⁹ Mûthamaki Joramu nîwacokire îtûûrarî înene rîa Jezireeeli nîguo akavorere ironda kuo, nake Ahazia mûvîcî wa Jehoramu mûthamaki wa Juda nîwathiîre Jezireli kûmûcerera nîûndû aarî mûrwaru.