2Atha 2 - ÎVUKU RÎA ÛVORO MWARO

Elija Nîwavirirwe Îgûrû

¹ Vîndî îrîa kavinda gaakinyire ka Ngai-Mûnene kûvira Elija îgûrû na rûkûngi rûnene rwavurutanaga na vinya, Elija na Elisha maarî rûgendorî maumîte Giligali.

² Marî njîrarî Elija nîwerire Elisha atîrî, “Nakûthaitha wîkarage ava nîûndû Ngai-Mûnene nîandûmîte nthiî Betheli.” Nwatî Elisha nîwamwîrire atîrî, “Nevîta na Ngai wakwa ûrîa ûtûûraga mwoyo na wata ûrîa we mwene ûgûtûûra mwoyo, atî tî ngûtiga.” Kwoguo nîmaathiîre Betheli.

³ Gîkundi Kîam arathi arîa maatûûraga Betheli nîmaathiîre kûrî Elisha na makîmûûria atîrî, “Nîwîcî atî Ngai-Mûnene nîakûthengutia mwathi waku varî we ûmûnthî?” Nake Elisha nîwacokirie atîrî, “Îî, nîmbicî, tigani kwaria ûvoro ûcio.”

⁴ Elija nîwacokire akîra Elisha atîrî, “Nakûthaitha wîkarage ava nîûndû Ngai-Mûnene nîandûmîte nthiî Jeriko.” Nwatî Elisha nîwamwîrire atîrî, “Nevîta na Ngai wakwa ûrîa ûtûûraga mwoyo na wata ûrîa we mwene ûgûtûûra mwoyo, atî tîngûtiga.” Kwoguo nîmaathiîre Jeriko.

⁵ Gîkundi Kîam arathi arîa maatûûraga Jeriko nîmaathiîre kûrî Elisha na makîmûûria atîrî, “Nîwîcî atî Ngai-Mûnene nîakûthengutia mwathi waku varî we ûmûnthî?” Nake Elisha nîwacokirie atîrî, “Îî, nîmbîcî, nwatî tûtige kwarîrîria ûndû ûcio.”

⁶ Elija nîwacokire akîra Elisha atîrî, “Nakûthaitha îkaraga ava nîûndû Ngai-Mûnene nîandûmîte nthiî rûnjîrî rwa Jorodani.” Nwatî Elisha nîwamwîrire atîrî, “Nevîta na Ngai wakwa ûrîa ûtûûraga mwoyo na wata ûrîa we mwene ûgûtûûra mwoyo atî, tî ngûtiga.” Kwoguo wa oîrî nîmaathiîre Jorodani,

⁷ na andû mîrongo îtano (50) a gîkundi Kîam arathi nîmaamarûmîrîre. Elija na Elisha nîmaarûngamire vakuvî na rûnjî rwa Jorodani nao arathi acio makîrûngama varacaraca nao.

⁸ Elija nîwacokire akîruta nguo yake ya îgûrû, akîmîkûnjakûnja na akîringa manjî nayo. Manjî nîmaagaûkanire maita maîrî na ke mwene na Elisha nîmaaringîre nthî nyûmû.

⁹ Maringa rûnjî, Elija nîwerire Elisha atîrî, “Mbîra ûrîa ûkwenda ngwîkîre mbere ya nthengutue kûrî we.” Nake Elisha nîwaugire atîrî, “Nakûthaitha ûngaîre gîcunjî Kîam roho waku maita maîrî.”

¹⁰ Elija nîwamwîrire atîrî, “Nîwavoya ûndû mûrito.” Nwatî nîûkûgwata îgai rîu ethîrwa nîûkûmona ngîthengutua kûrî we; nwatî ethîrwa tî ûmona, tîûvewa mo.

¹¹ Mathiîte wa ûguo wa makîaragia, wa rîmwe gîkaari Kîamrîrîmbûkaga ta mwaki kîgucîtue nî mbarathi ciarîrîmbûkaga ta mwaki nîgîaûkire karîgatî kao oîrî, na Elija nîwavirirwe îgûrû nî rûkûngi rûnene rwavurutanaga na vinya.

¹² Elisha nîwonire gîkaari kîu na akiugîrîria atîrî, “Ûûi vava, ûûi vava! Mûndû ûrî vinya, ûrîa ûrûagîrîra Isiraeli! Nîwathiî!” Nwatî Elisha ndaacoka kwona Elija rîngî. Elisha nîwacokire akîgwata nguo ciake ke mwene na agîitembûrania icunjî igîrî.

¹³ Nîwacokire agîoca nguo ya Elija îrîa yagwîte kuuma gwî ke, agîcoka nayo na akîrûngama rûtere rwa rûnjî rwa Jorodani.

¹⁴ Nîwaringire manjî na nguo ya Elija na akîûria atîrî, “Ngai-Mûnene, Ngai wa Elija arî kû?” Nîwacokire akîringa manjî rîngî. Manjî nîmaagaûkanire maita maîrî, na Elisha akîthiî mûringo ûcio wîngî.

¹⁵ Rîrîa gîkundi Kîam arathi mîrongo îtano arîa maarî Jeriko maamwonire, nîmaaugire atîrî, “Elisha arî na roho wa Elija!” Nîmaathiîre kûmûtûnga na makînamîrîria mothiû mao nthî mbere ya Elisha,

¹⁶ na makîmwîra atîrî, “Tue ndungata ciaku, tûrî ava tûrî arûme mîrongo îtano (50) marî vinya. Twakûthaitha ûtwîtîkîrie tûthiî tûgacarie mwathi waku. Nwa kwîthîrwa Roho wa Ngai-Mûnene ûthiîre nake na wamûtiga vandû îgûrû rîa kîrîma, kana vandû Kîamndarî.” Nake Elisha nîwamerire atîrî, “Naarî, tîmûthiî.”

¹⁷ Nwatî nîmaamûringîrîrie nginya akîgua nthoni na akîmetîkîria mathiî. Arûme acio mîrongo îtano nîmaathiîre na magîcaria Elija îvinda rîa mîthenya îthatû, nwatî matiamwona.

¹⁸ Nîmaacokire kûrî Elisha, ûrîa wetererete arî Jeriko na akîmaûria atîrî, “Kinthî ndiamwîrire mûtikathiî?”

Ciama irîa Elisha aaringire

¹⁹ Arûme amwe a îtûûra rîa Jeriko nîmeerire Elisha atîrî, “Taroria, îtûûra rîîrî nî rîaro wata ûrîa mwathi wetû ûreyonera, nwatî manjî ma kuo tî maro wana mûthetu wa kuo nî mûgînju.”

²⁰ Nake Elisha nîwamerire atîrî, “Ndetereni mbakûri njerû na mwîkîre cumbî ndaarî yayo.” Kwoguo arûme acio nîmaamûvirîre mbakûri.

²¹ Elisha nîwacokire akîthiî kîthimarî Kîam manjî, agikia cumbî kîthimarî kîu na akiuga atîrî, “Ngai-Mûnene augîte, atî ‘nînatheria manjî mama, na kuuma ûmûnthî kûthiî na mbere makethagîrwa marî maro na matigaatûma kûgîa gîkuû, na ndîthia ciakuo na andû matikavuna.’ ”

²² Kwoguo kuuma vîndî îo manjî mau matûûraga marî matheru, wata ûrîa Elisha aaugire.

²³ Elisha nîwaumire Jeriko na akîthiî Betheli. Arî njîrarî, tûvîcî tûnini nîtwaumire na kûu îtûûrarî rînene tûkîmûthekerera tûkiugagîrîria atîrî, “Uma gûkû, kîvara gîkî! Uma gûkû, kîvara gîkî!”

²⁴ Elisha nîwevûgûrire. Na rîrîa oonire tûvîcî tûu, nîwatûrumire na rîîtwa rîa Ngai-Mûnene. Ngatûnyi igîrî cia nga nîciaumire na kûu kîthakarî na ikîûraga tûvîcî mîrongo îna na twîrî gatagatî ga tûvîcî tûu.

²⁵ Elisha nîwathiîre na mbere na agîkinya Kîrîmarî gîa Karimeli, na vuvarî nîwacokire Samaria.