2Atha 16 - ÎVUKU RÎA ÛVORO MWARO

Ahazi mûthamaki wa Juda

¹ Mwakarî wa îkûmi na mûgwanja (17) Peka, mûvîcî wa Remalia arî mûthamaki wa Isiraeli, Ahazi mûvîcî wa Jothamu nîwatuîkire mûthamaki wa Juda

² arî na ûkûrû wa mîaka mîrongo îîrî (20). Nîwathanire arî Jerusalemu îvinda rîa mîaka îkûmi na îtandatû (16). Ndeeka maûndû marîa maakenagia Ngai-Mûnene ta ûrîa îthe Daudi eekîte.

³ Nwatî eekire maûndû ta marîa meekagwa nî athamaki a Isiraeli. Wana nwa warutire mûvîcî arî îgongoona rîa îtega rîa kûvîvua kûrî mûvuanano, wata ûrîa andû a mavûrûri marîa Ngai-Mûnene eengataga maume vûrûrirî ûrîa andû a Isiraeli maatonyaga meekaga. Ûndû ûcio warî mûcûku mûno.

⁴ Ahazi nîwarutagîra magongoona na akavîvîria ûbani kûndû kûrîa gûtûgîru, irîmarî, na rungu rwa mîtî îrîa mîruru.

⁵ Rezini, mûthamaki wa Sîria na Peka, mûthamaki wa Isiraeli nîmaatharîkîre îtûûra rîa Jerusalemu na makîrîthiûrûrûkîria, nwatî matiavoota Ahazi.

⁶ Vîndî îo, mûthamaki wa Edomu nîwocire rîngî îtûûra rîa Elathi, na akîngata andû a Judea arîa maatûûraga kuo. Andû a Edomu nîmaatûûrire îtûûrarî rîa Elathi na nwa kuo matwîre nginya ûmûnthî.

⁷ Kwoguo Ahazi nîwatûmire anjaama kûrî Tigilathi Pilesa mûthamaki wa Asîria makamwîre atîrî, “Nie nîrî ndungata yaku, ûka ûmvonokie kuuma kûrî mûthamaki wa Sîria na kuuma kûrî mûthamaki wa Isiraeli arîa marantharîkîra.”

⁸ Ahazi nîwocire sîlûva na thaavu irîa ciarî hekarûrî vamwe na indo cia vata cia nyomba ya mûthamaki na agîitûmana irî kîveo kûrî mûthamaki wa Asîria.

⁹ Mûthamaki wa Asîria nîwathîkîre Ahazi, na nîwathiîre marî na athigari ake a mbaara na makîtharîkîra îtûûra rîa Damesiki. Nîwarînyitire, akîûraga mûthamaki Rezini na akîvira andû Kiri marî mîgwate.

¹⁰ Rîrîa mûthamaki Ahazi aathiîre Damesiki gûtûnga Tigilathi Pilesa, mûthamaki wa Asîria, nîwonire metha ya kîgongoona îrîa yarî Damesiki. Mûthamaki Ahazi nîwatûmîre mûthînjîri-Ngai Uria mûvano wa metha îo ya kîgongoona vamwe na mbica yayo yonanîtie viû ûrîa îtumîtwe.

¹¹ Kwoguo mûthînjîri-Ngai Uria nîwatumire metha ya kîgongoona îkariî ta îrîa yarî Damesiki viû, na akîmîrîkia mbere ya mûthamaki Ahazi acoka kuuma Damesiki.

¹² Rîrîa mûthamaki aacokire kuuma Damesiki, nîwethîrîrie metha ya kîgongoona îrî ndîku. Nîwathiîre metharî îo ya kîgongoona na akîrutîra îtega îgûrû rîayo.

¹³ Nîwarutîre vo îtega rîake rîa kûvîvua, îtega rîa irio cia mûgûnda, nîwetûrûrire îtega rîa ndivei, na akîminja nthakame ya matega make ma thayû îgûrû rîayo.

¹⁴ Ahazi nîwarutire metha ya kîgongoona ya gîcango îrîa yamûrîrîtwe Ngai-Mûnene, îrîa yarî gatagatî ka metha yake ya kîgongoona na hekarû na akîmîvira mwena wa rûgûrû wa metha yake ya kîgongoona.

¹⁵ Mûthamaki Ahazi nîwacokire akîatha mûthînjîri-Ngai Uria atîrî, “Tûmagîra metha îno nene yakwa ya kîgongoona rîrîa ûkûruta matega ma kûvîvua kîraûko, matega ma irio cia mûgûnda kîvwaî, îtega rîa kûvîvua rîa mûthamaki na îtega rîake rîa irio cia mûgûnda, îtega rîa kûvîvua rîa andû onthe, îtega rîao rîa irio cia mûgûnda, îtega rîao rîa ndivei, na ûminjage îgûrû rîayo nthakame yonthe ya kîgongoona. Nwatî nînie ngaatûmagîra metha ya kîgongoona ya gîcango rîrîa ngwaria na Ngai-Mûnene.”

¹⁶ Mûthînjîri-Ngai Uria nîwekire maûndû mau monthe wata ûrîa aathîtwe nî mûthamaki Ahazi.

¹⁷ Mûthamaki Ahazi nîwarutire itugî cia gîcango irîa ciatûmagîrwa hekarûrî, na akîruta irîa ciaigîrîrîtwe îgûrû rîacio; nîwacokire akîruta îtangi rîa gîcango kuuma îgûrû rîa mîvuanano îkûmi na îîrî ya ndegwa cia gîcango na akîrigîrîra îthigarî rîa mûcingi.

¹⁸ Mûthamaki Ahazi nîwatharirie vandû vatûgîru varîa vaatûmagîrwa nî mûthamaki mûthenya wa thavatû na akîvinga mûrango ûrîa mûthamaki aatonyagîrîra akîthiî hekarûrî. Ekire ûguo nîûndû wa mûthamaki wa Asîria.

¹⁹ Maûndû mengî monthe marîa Ahazia eekire nîmandîke Îvukuurî rîa Maûndû ma Tene ma Athamaki a Juda.

²⁰ Ahazi nîwakwire na akîthikwa mbîrîrarî cia athamaki îtûûrarî rînene rîa Daudi; nake mûvîcî Hezekia nîwatuîkire mûthamaki vuva wake.