1Maû 19 - ÎVUKU RÎA ÛVORO MWARO

Daudi nîwavootire Aamoni na Aasîria

¹ Vuvarî mûthamaki Nahashi wa Aamoni nîwakwire. Nake mûvîcî Hanuni nîwatuîkire mûthamaki vuva wake.

² Nake Daudi nîwaugire atîrî, “Nîngûva Hanuni gîtîîo nîûndû îthe Nahashi nîwamvete gîtîîo.” Kwoguo Daudi nîwatûmire anjaama nîguo makaûmîrîrie Hanuni nîûndû wa îthe gûkua. Rîrîa maakinyire Aamoni kwa mûthamaki Hanuni,

³ atongoria a andû a Aamoni nîmeerire mûthamaki wao atîrî, “Ûreciria nî gîtîîo Kîam aguo gîtûmîte Daudi atûma anjaama nîguo maûke makûmîrîrie? Naarî! Amatûmîte maûke marî athigani a vûrûri nîguo makaaûvota!”

⁴ Kwoguo Hanuni nîwagwatire anjaama a mûthamaki Daudi, akîmenja nderu, agîtinîria nguo ciao gatagatî kîûnûrî na akîmera mathiî.

⁵ Rîrîa Daudi eerirwe ûvoro wao, nîwatûmire andû mathiî makamatûnge nîûndû nîmegucaga marî na nthoni mûno. Mûthamaki Daudi nîwaugire nîmekare Jeriko nginya rîrîa nderu ciao igaakûra nîguo macoke.

⁶ Andû a Aamoni nîmaamenyire atî nîmaavîtîrie Daudi. Kwoguo mûthamaki Hanuni na andû ake nîmaatûmanire sîlûva ya kilo ngiri mîrongo îthatû na inya (34,000) cia gûkombora ikaari cia mbarathi na andû a kûthiî na mbarathi kuuma Mesopotamia, Aram-maaka (nîkuo gwîtagwa Sîria) na Zoba.

⁷ Nao nîmaakomborire ikaari cia mbarathi ngiri mîrongo îthatû na igîrî (32,000). Nao athigari a Maaka na mûthamaki wao nîmaaûkire na makîamba magema mao vakuvî na Medeba. Andû a Aamoni wanao nîmaaumire matûûrarî mao na magîûka kûrûa.

⁸ Rîrîa Daudi eegwire ûguo, nîwatûmire Joabu na athigari onthe a mbaara arîa marî vinya.

⁹ Andû a Aamoni nîmaathiîre na makîîvarîria kûrûa marî kîvingorî gîa îtûûra rîa Raba. Nao athamaki arîa maathiîre gûtethia andû a Aamoni maarî kîvarorî mevarîrîtie.

¹⁰ Joabu nîwonire atî athigari nthû ciake nîcievarîrîtie kûmûtharîkîra kuuma na mwena wa mbere wana wa vuva. Kwoguo nîwathuurire athigari a Isiraeli arîa aro mûno na nîwamavangire makarûe na athigari a Sîria.

¹¹ Nake nîwavangire athigari acio engî marûngamîrîrîtwe nî mûrwang'ina Abishai, makarûe na athigari a Aamoni.

¹² Joabu nîwerire Abishai atîrî, “Ûngîkoona athigari a Sîria marî na vinya kûngîra, ûgaaûka ûndethie, nao Aamoni mangîkaagîa na vinya gûgûkîra ngaaûka ngûtethie.

¹³ Gîa na vinya na ûcamba na tûrûîrîre andû etû na matûûra ma Ngai wetû. Ngai-Mûnene nîagwîka ûrîa akwona kwagîrîrîte.”

¹⁴ Kwoguo Joabu na andû ake nîmaathiîre kûtharîkîra andû a Sîria, nao andû a Sîria nîmaaûrire.

¹⁵ Rîrîa athigari a Aamoni moonire andû a Sîria maûrîte, nîmaaûrire kuuma kûrî Abishai na magîcoka matûûrarî mao. Nake Joabu nîwacokire Jerusalemu.

¹⁶ Asîria mamenya atî nîmaavootirwe nî athigari a Isiraeli, nîmaatûmire anjaama mathiî magîre athigari a Sîria arîa maarî mwena wa îrathîro wa rûnjî rwa Farati. Athigari acio maarûngamagîrîrwa nî Shobaki ûrîa warî mûnene wa athigari a mûthamaki Hadadezeri wa Zoba.

¹⁷ Daudi erwa ûguo nîwaûnganirie athigari onthe a Isiraeli vamwe, na nîmaaringire rûnjî rwa Jorodani na nîwamavarîrie kûrûa na andû a Sîria. Mbaara nîyambîrîrie na

¹⁸ athigari a Sîria nîmaavootirwe na makîûra kuuma kûrî athigari a Isiraeli. Daudi nîwaûragire andû a Sîria ngiri mûgwanja (7,000) arîa maatwarithagia ikaari, na athigari arîa mathiîcaga na magûrû ngiri mîrongo îna (40,000) na akîûraga Shobaki ûrîa warî mûnene wa athigari a Sîria.

¹⁹ Rîrîa athamaki arîa maarî ndungata cia mûthamaki Hadadezeri moonire atî nîmavootwa nî Aisiraeli, nîmaarûthire kîrîkanîro Kîam thayû na Daudi na magîtuîka ndungata ciake. Asîria nîmaaregire gûgaatethia andû a Aamoni rîngî.