1Ath 5 - ÎVUKU RÎA ÛVORO MWARO

Îkaragani mwîvarîrîtie nîûndû wa gûka kwa Mwathani

¹ Ariû na aarî a îthe wetû, gûtirî na vata ya kûmwandîkîra ûvoro wîgiî ciathî na mavinda marîa maûndû mama magekîka.

² Nîûndû nîmwîcî waro atî Mwathani agaaûka gûtarî mûndû ûkûmwîrîgîrîra wata ûrîa mwîi aûkaga ûtukû.

³ Rîrîa andû makeethîrwa makiugaga, “Tûrî na thayû na tûrî agitîre,” nîmagaacûkangua wa rîmwe wata ûrûrû ûrîa ûkaga kûrî mûndûmûka agîciara. Andû matikaavota kûra.

⁴ Nwatî mue, ariû na aarî a îthe wetû mûtirî ndumarî na mûtiagîrîrwe nî kwîthîrîrua nî mûthenya ûcio ta ûrîa mwîi aûkaga gûtarî mûndû ûkûmwîrîgîrîra.

⁵ Muonthe mûrî andû a ûtheri na a mûthenya. Tûtirî a ûtukû kana a nduma.

⁶ Kwoguo tûtiagîrîrwe nî kwîthîrwa tûmamîte ta andû arîa engî, twagîrîrwe twîthagîrwe twîîguîte na tûterigîtwe.

⁷ Nîûndû ûtukû nîrîo andû mamamaga, ûtukû nîrîo andû manyunyaga njovi makarîwa.

⁸ Nwatî tûrî andû a mûthenya. Kwoguo nîtwagîrîrwe nîgwîkara twîîguîte. Twagîrîrwe nîgwîkîra wîtîkio na wendani nîguo ituîke ta ngo ya cuuma ya kûgitîra kîthûri, na tûgîe na mwîrîgîrîro wa kûvonoka ûrî ta ngovia ya cuuma twîkîrîte ya kûgitîra kîongo.

⁹ Ngai ndaatûthuura nîguo atûverithie nîûndû wa kûmûrakaria, nwatî aatûthuurire nîguo tûgîe na ûvonokio na njîra ya Mwathani wetû Jesû Kristû.

¹⁰ Jesû aakwire nîûndû wetû nîguo tûtûûrage vamwe nake, wana ethîrwa tûrî mwoyo kana tûrî akuû.

¹¹ Kwoguo ûmanagîrîriani na mwîkanagîre vinya wata ûrîa mûreka rîu.

Mataaro ma mûthiia na Ngethi

¹² Ariû na aarî a îthe wetû, tûramûthaitha mûvecage gîtîîo andû arîa marutaga wîra na vinya gatagatîrî kenyu. Acio nîo mamûtongoragia na mamûtaaraga ûvororî wîgiî mûtûûrîre wa Ûkristiano.

¹³ Mavecageni gîtîîo kînene na mûmendage nîûndû wa wîra ûcio wao. Îthagîrwani mûrî na thayû gatagatîrî kenyu.

¹⁴ Ariû na aarî a îthe wetû, tûramûthaitha mûkanagie igûta itige ûgûta, ûmagîrîriani iguoya, tethagiani arîa matarî na vinya na mûkiragîrîrie andû onthe.

¹⁵ Geragiani kwona atî gûtirî mûndû wana ûmwe gatagatîrî kenyu ûkarîvagia naaî na naaî, nwatî vîndî cionthe geragiani gwîka ûndû ûrîa mwaro kûrî andû onthe.

¹⁶ Kenagani vingo cionthe.

¹⁷ Voyagani mûtagûtigithîrîria

¹⁸ na mûcokagie ngatho maûndûrî monthe. Ûguo nîguo Ngai endaga mûtûûre mue arîa mwîtîkîtie Jesû Kristû.

¹⁹ Mûtikavorie mwaki wa Roho;

²⁰ na mûtikanyarare ûrathi.

²¹ Tuîragiani maûndû monthe; menyagîrîrani maûndû marîa maro,

²² na mûragîre maûndû monthe macûku.

²³ Ngai ûrîa ûtûvecaga thayû aromûtua atheru na njîra cionthe. Ke aromwiga mûrî agima roho, mîoyo na mîîrî yenyu nîguo mûkethîrwa mûtarî na ûcuke rîrîa Mwathani wetû Jesû agaaûka.

²⁴ Nake ûrîa ûmwîtaga nî agwîka ûguo nîûndû nîmwîvokeku.

²⁵ Ariû na aarî a îthe wetû, tûvoyagîreni.

²⁶ Kethiani ariû na aarî a îthe wetû onthe na ngethi ntheru cia kûmumunyana.

²⁷ Nînîramûthaitha na rîîtwa rîa Mwathani mûthomere etîkia onthe maarûa îno.

²⁸ Wega wa Mwathani wetû Jesû Kristû nîwîkare namue.