Zakaria 3 - ÎVUKU RÎA ÛVORO MWARO

Mûrathi nîwagîre na kîoneki kîa Mûthînjîri-Ngai ûrîa mûnene

¹ Ngai-Mûnene nîwacokire akîmonia kîoneki kîngî. Kîonekirî kîu nînonire Joshua Mûthînjîri-Ngai mûnene arûngamîte mbere ya mûraika wa Ngai-Mûnene. Nake Caitani aarûngamîte mwena wa ûrîo wa Joshua evarîrîtie kûmûthitanga.

² Nake mûraika wa Ngai-Mûnene nîwamwîrire atîrî, “Ngai-Mûnene arogûkûûma we Caitani! Ngai-Mûnene ûrîa ûthuurîte îtûûra rîa Jerusalemu arogûkûûma! Anga mûndû ûyû ndekariî ta karûkû gagîakana karutîtwe mwakirî?”

³ Joshua aarûngamîte mbere ya mûraika ekîrîte nguo ciarî na gîko.

⁴ Mûraika nîwerire arîa maarûngamîte mbere yake atîrî, “Rutani Joshua nguo icio irî na gîko.” Nîwacokire akîra Joshua, mûthînjîri-Ngai mûnene atîrî, “Taroria, nînakûthengutîria wîvia waku wonthe na nîngûgwîkîra nguo cia goro.”

⁵ Mûraika nîwacokire akîra andû arîa maatungatagîra Joshua atîrî, “Îkîrani Joshua kîremba kîtheru kîongo.” Kwoguo nîmeekîrire kîremba kîtheru kîongorî Kîam Joshua na makîmwîkîra nguo mûraika wa Ngai-Mûnene arûgamîte vo.

⁶ Mûraika wa Ngai-Mûnene nîwacokire akîra Joshua atîrî,

⁷ “Ngai-Mûnene mwene vinya wonthe augîte ûngîathîkîra maathani make na ûrûmagîrîre maûndû marîa akwathîte, nîagaakûva ûvoti wathanage hekarûrî yake na ivaarorî ciayo, na nîagaagwîtîkîria ûtungatage ta ûrîa aya marûngamîte ava matungataga.

⁸ Tathikîrîria waro, we Joshua Mûthînjîri-Ngai mûnene. Wa namue athînjîri-Ngai arîa mûtungataga vamwe nake tathikîrîriani. Mue oni a maûndû ma mavinda marîa magaaûka tathikîrîriani. Nîngûreta ndungata yakwa îrîa îtagwa Rûvûa.

⁹ Taroria, îthiga rîrîa mbigîte mbere ya Joshua, îgûrû rîarîo varî na mothiû mûgwanja. Îgûrû rîa îthiga rîu nîngaacora mandîko vo na nîngathengutia waganu wa vûrûri ûyû na mûthenya ûmwe.

¹⁰ Mûthenya ûcio wakinya, wa mûndû wa mûndû nîagetaga mûndû ûrîa mariganîtie nake athiî magekare rungu rwa mîthavibu na rungu rwa mîkûyû makenere thayû na ûgacîru wa vûrûri. Ûgo nîguo Ngai-Mûnene mwene vinya wonthe arauga.”