Thaburi 99 - ÎVUKU RÎA ÛVORO MWARO

Ngai, mûthamaki mûnene

¹ Ngai-Mûnene nî mûthamaki, andû nî mateteme. Ekarîrîte gîtî Kîam ûthamaki îgûrû rîa Akerubi; nayo nthî nîîthingithe.

² Ngai-Mûnene nîke mûnene Zayuni; nîke ûkumagua mavûrûrirî monthe.

³ Andû onthe nîmakumie rîîtwa rîake rînene na rîa gwîtigîrwa! Ke nî Mûtheru!

⁴ We mûthamaki mwene Vinya Wonthe, mwendi ûthingu; Nîwonanîtie kîvooto Isiraeli; nîwonanîtie ûthingu na waragania.

⁵ Kumiani Ngai-Mûnene, Ngai wetû, Mûgooceni mûrî mbere ya gîtî gîake Kîam ûthamaki! Ke nî mûtheru!

⁶ Musa na Aroni maarî amwe a athînjîri-Ngai ake, Samueli wanake aarî ûmwe wa arîa maamûvoire; nîmaakaîre Ngai-Mûnene na nîwamegwire.

⁷ Nîwamaarîrie arî gîtugîrî gîa îtu; nîmaathîkîre kîrîra gîake na mawatho marîa aamaveere.

⁸ We Ngai-Mûnene Ngai wetû, nîwegwire mavoya ma andû aku, nîwamoonirie atî we wî Ngai wovanagîra, wana ethîrwa nîwamaverithagia nîûndû wa mevia mao.

⁹ Kumiani Ngai-Mûnene Ngai wetû, mûgooceni mûrî kîrîmarî gîake kîtheru! Nîûndû Ngai-Mûnene Ngai wetû nî mûtheru!