Thaburi 98 - ÎVUKU RÎA ÛVORO MWARO

Ngai, mûthamaki wa nthî

¹ Inîrani Ngai-Mûnene rwîmbo rûcerû, nîûndû nîekîte maûndû ma magegania! Vinya wake na ciîko ciake ntheru nîitûmîte avootane.

² Ngai-Mûnene nîonanîtie ûvootani wake, nîonanîtie vinya wake wa kûvonokania kûrî ndûrîrî.

³ Nîendete andû a Isiraeli na arî mwîvokeku kûrî o. Andû onthe a nthî nîmonete ûvootani wa Ngai wetû.

⁴ Andû onthe a nthî inîrani Ngai-Mûnene mûrî na gîkeno, mwinîreni nyîmbo cia kûmûkumia mûrî na gîkeno.

⁵ Inani mûkumie Ngai-Mûnene mûkîvûraga inanda! mûkumieni na mîgambo mîaro ya inanda.

⁶ Vuvani tûrumbeta na coro, inîrani Ngai-Mûnene, mûthamaki mûrî na gîkeno.

⁷ Îria na nyamû cionthe irîa itûûraga kuo nîciugîrîrie; nthî na arîa onthe matûûraga kuo, nîmaine.

⁸ Mue nyûnjî vûrani mvî; mue irîma inani mûkenete,

⁹ mûrî mbere ya Ngai-Mûnene, nîûndû nîaûkîte gûtuîra nthî ciira. Ke agaatuîra andû na waragania na kîvooto.