Thaburi 97 - ÎVUKU RÎA ÛVORO MWARO

Ngai nîke mûthamaki ûrîa mûnene

¹ Ngai-Mûnene nî arathana, kena we nthî. Kenani, mue icîgîrîra irîa irî îriarî!

² Matu na nduma nene nîimûthiûrûrûkîrîtie; athanaga na ûthingu na kîvooto.

³ Mwaki ûthiîcaga ûrî mbere yake, ûthiîcaga ûkîvîvagia nthû ciake irîa irî vakuvî.

⁴ Rûveni rwake rwîkagîra ûtheri nthî yonthe; nthî îrwonaga îkainaina.

⁵ Irîma irarûkaga ta mûvûra irî mbere ya Ngai-Mûnene, mbere ya Mwathani wa nthî yonthe.

⁶ Îgûrû nî rîanagîrîra ûthingu wake, nao andû onthe nî monaga riiri wake.

⁷ Andû onthe arîa magoocaga mîvuanano nî maconorithagua, arîa metîîaga na ngai cia maveeni; ngai cionthe ciînamagîrîria nthî ikagooca Ngai-Mûnene.

⁸ Andû a Zayuni nîakenu; andû onthe a Juda nî marakûngûîra, nîûndû wa ûrîa, we Ngai-Mûnene ûtucanagîra ciira.

⁹ We Ngai-Mûnene, nîwe wathaga nthî yonthe; ûrî mûnene gûkîra ngai cionthe cia mîvuanano.

¹⁰ Ngai-Mûnene nîendete andû arîa mathûrîte maûndû macûku, nîamenyagîrîra ûtûûro wa andû ake, nîamavonokagia kuuma kûrî andû arîa aganu.

¹¹ Ûtheri ûtheragîra mûndû ûrîa mûthingu, na nîûretage gîkeno kûrî arîa atheru ngoro.

¹² Mue andû onthe arîa athingu, kenani nîûndû wa Ngai-Mûnene; na mûmûcokerie ngatho nîûndû wa maûndû marîa ekîte.