Thaburi 94 - ÎVUKU RÎA ÛVORO MWARO

Ngai nîke ûtucagîra andû onthe ciira

¹ We Ngai-Mûnene, wî Ngai wîrîvagîrîria; We Ngai ûrîa wîrîvagîrîria, wîyonanie!

² Rûngama, we ûtucagîra andû onthe ciira; verithia andû arîa etîi kûringana na ûrîa magîrîrwe!

³ We Ngai-Mûnene, nî nginya rî, nî nginya rî andû arîa aganu magûtûûra metîîaga?

⁴ Nî nginya rî eki naaî magûtûûra maragia ciugo cia gwîtîîa, andû arîa acûku magûtûûra metîîaga?

⁵ Nîmacûkangagia andû aku, we Ngai-Mûnene, nîmavinyagîrîria andû aku.

⁶ Maûragaga aka a ndigwa na ageni, na makaûraga ciana irîa itarî aciari;

⁷ maugaga atî, Ngai-Mûnene ndonaga, Ngai wa Jakovu ndamenyaga.

⁸ Mue andû aya aritu ûguo, ta îcirieni rîngî! Mue irimû ino, mûkaaûvîga rî?

⁹ Ûrîa waûmbire gûtû, anga ndegucaga? Ûrîa waûmbire ritho, anga ndonaga?

¹⁰ Ûrîa wathaga ndûrîrî, anga ndangîmaverithia? Ûrîa ûthomithagia andû, anga ndethagîrwa arî mûûgî?

¹¹ Ngai-Mûnene nîaicî meciria ma andû, nîaicî atî nî ma mana.

¹² Kûrathimwa nî mûndû ûrîa we Ngai-Mûnene ûrûngaga, mûndû ûrîa we ûthomithagia watho waku!

¹³ Nîûtûmaga agîe na ûvoreri vîndî ya thîna, nginya rîrîa ûkaaverithia andû arîa aganu.

¹⁴ Ngai-Mûnene ndagaatiganîria andû ake; ndagaatiganîria arîa athuurîte magatuîka ake.

¹⁵ Ciira nîûgaacoka rîngî gûtucagwa na kîvooto, na andû onthe arîa atheru ngoro nî makaarûmîrîra kîvooto kîu.

¹⁶ Nîûrîkû wandethirie kûrûa na andû arîa aganu? Nîûrîkû warî mwenarî wakwa ngîrûa na eki naaî?

¹⁷ Kethîrwa Ngai-Mûnene ndaandethia, nînîngîathiîre kwa arîa akuû na îvenya.

¹⁸ Rîrîa neguire ta nîngîtenderûka, wendo waku ûtathiraga nîwanyitîrîre, we Ngai-Mûnene.

¹⁹ Rîrîa negua ngîtangîka mûno ngororî, We Ngai-Mûnene ûnyûmagîrîria na ûgatûma ngîa na gîkeno.

²⁰ We ndûngînyitanîra na atucanîri ciira arîa aganu, arîa matungaga mawatho ma gûcûkangia kîvooto.

²¹ Manyitanagîra vamwe nîguo mathirie andû arîa athingu, na matucagîra andû arîa matarî na mavîtia maûragwe.

²² Nwatî Ngai-Mûnene nîke ûngitagîra, Ngai wakwa nîke ûngitagîra.

²³ Ngai nîakaaverithia andû nîûndû wa mavîtia mao, nîakaamathiria nîûndû wa waganu wao; Ngai-Mûnene, Ngai wetû nîakaamacûkangia viû.