Thaburi 91 - ÎVUKU RÎA ÛVORO MWARO

Ngai nîke Mûgitîri wetû

¹ Mûndû ûrîa wîthithaga kûrî Ngai-Mûnene, ûrîa ûtûûraga rungu rwa kîruru Kîam Ngai mwene vinya wonthe,

² nîakaamwîra atîrî, “We Ngai-Mûnene mbûragîra kûrî we na nîwe ûngitagîra; Ngai wakwa ûrîa nîîvokaga.”

³ Ngai nîagaakûvonokia kuuma mûtegorî, na kuuma kûrî mîrimû mîcûku.

⁴ Ngai nîagaagûkunîkîra na mathagu make; na ûkethagîrwa ûrî mûgitîre ûrî varî ke; wîvokeku wake ûgaakûgitagîra na ûgakûrûîrîra.

⁵ Ndûgetigîra ûgwati wa ûtukû, kana kûtharîkîrwa wa rîmwe mûthenya;

⁶ kana mîthiro îrîa yûkaga ûtukû kana maûndû macûku marîa maûkaga mûthenya.

⁷ Andû ngiri îmwe nwa magwe vakuvî nawe, andû ngiri îkûmi magwe mwena waku wa ûrîo, nwatî gûtirî mûthiro ûgaagûkuvîvîria.

⁸ Nîûkûroria na metho maku we mwene, wone ûrîa andû arîa aganu maraverithua.

⁹ We nîûtuîte Ngai-Mûnene kûndû gwaku gwa kwîthitha, nîûtuîte ûrîa ûrî Îgûrû Mûno mûgitîri waku.

¹⁰ Kwoguo gûtirî ûndû mûcûku ûgaakûnyita, gûtirî mûthiro ûgaakuvîvîria nyomba yaku.

¹¹ Nîûndû Ngai nîakaatha araika ake, makûmenyagîrîre kûrîa kuonthe ûkethagîrwa ûkîthiî.

¹² Nîmagaagûkîrîria na njara ciao, nîguo magûrû maku matigativue nî mathiga.

¹³ Nîûgaakinyanga mînyambû na ciîmvuva, nîûgaakinyanga twana twa mînyambû na twa njoka.

¹⁴ Ngai augîte atîrî, “Nîngaavonokia mûndû wa wonthe ûmendete; nîngaagitîra mûndû ûrîa ûmbicî.

¹⁵ Rîrîa akaambîta nîngaamwîtîka; nîngethîrwa nake arî thînarî; nîngaamûvonokia na ndûme atîîke.

¹⁶ Nîngaatûma atûûre kavinda karaca, na nîngaamûvonokia.”