Thaburi 90 - ÎVUKU RÎA ÛVORO MWARO

ÎVUKU RÎA KANA Tha 90—106 Maûndû megiî Ngai na megiî andû

¹ We Mwathani, kuuma njiarwa na njiarwa wîthîrîtwe ûrî kûndû gwetû gwa kwîthitha.

² Mbere ya irîma igîa kuo na mbere ya ûmba nthî, we nîwe Ngai kuuma tene nginya tene.

³ Wîraga andû atîrî, “Cokani mûtheturî!” Nake mûndû nîacokaga mûtheturî kûrîa aaumire.

⁴ Mîaka ngiri îmwe mbere yaku, nîta mûthenya ûmwe tu, nîta îgoro rîrîa rîvîtûku, kana ta kavinda kanini ga ûtukû.

⁵ We ûthiragia andû wa rîmwe ta ûrîa kîroto kîthiraga, mûndû ekariî ta nyaki îrîa îmeraga kîraûko,

⁶ îrîa îmeraga kîraûko na îkaneneva, na kîvwaî îvovaga na îkaûma.

⁷ Tue nîtûcûkangagua nî marakara maku nîtûmakagua nî mang'ûrîka maku.

⁸ We wigîte mavîtia metû mbere yaku, mevia metû marîa marî nthithorî nîûmonaga.

⁹ Ûtûûro wetû nîûthiragua nî marakara maku, ûthiraga ta mîvevû.

¹⁰ Ûtûûro wetû nîwa mîaka mîrongo mûgwanja, kana ethîrwa tûrî na vinya tûgîkinyia mîaka mîrongo înana; nwatî wîcûrîtwe nî mathîna na mînyamaaro; mîaka îo îthiraga na îvenya natue tûgacoka tûkathira.

¹¹ Nîûrîkû ûngîmenya vinya wa marakara maku? Nû wicî guoya îrîa yumanaga na marakara maku?

¹² Kwoguo tûthomithie kûmenya ûtûûro wetû ûrîa wîgana, nîguo tûgîe na ûûgî.

¹³ We Ngai-Mûnene, nîwîkara ûrakarîte nîtue nginya rî? Coka na ûtwîguîre ntha, tue ndungata ciaku.

¹⁴ Twonagie wendo waku ûtathiraga kîraûko wa kîraûko, nîguo twinage tûrî na gîkeno ûtûûrorî wetû wonthe.

¹⁵ Tûma twîthîrwe tûrî na gîkeno mîaka mîîngî wata îrîa twîthîrîtwe tûrî na kîeva.

¹⁶ Tûma ndungata ciaku cione ciîko ciaku cia vinya, na ûtûme njiarwa cietû cione riiri wa vinya waku.

¹⁷ Tûma wega waku we Mwathani Ngai wetû wîkarage natue, na ûtûmage maûndû marîa twîkaga magagîre.