Thaburi 89 - ÎVUKU RÎA ÛVORO MWARO

Rwîmbo rwa vîndî ya mathîna vûrûrirî

¹ We Ngai-Mûnene, nîndûûra ngumagia wendo waku ûtathiraga tene na tene; nîndûûra managîrîra wîvokeku waku kûrî njiarwa cionthe tene na tene.

² Nîmbicî atî wendo waku nîûtûûra tene na tene, na wîvokeku waku wîkindîrîtie ta ûrîa îgûrû rîîkindîrîtie.

³ We Ngai nîwaugire atîrî, “Nînthondekete kîrîkanîro na mûndû ûrîa nthuurîte; nînîvîtîte kûrî Daudi, ndungata yakwa atî,

⁴ ‘vîndî cionthe ngaathuuraga mûndû kuuma njiarwarî ciaku arî mûthamaki, na nîngaatûma ûthamaki waku ûtûûre tene na tene.’ ”

⁵ Tiga îgûrû rîkumie maûndû maku ma magegania we Ngai-Mûnene; arîa atheru nîmakumie wîvokeku waku.

⁶ Nîûrîkû ûngîringithanua nawe Ngai-Mûnene kûu îgûrû? Nî kîûmbe kîrîkû Kîam îgûrû kîganene nawe?

⁷ We nîwîtigîrîtwe nî Kîamma Kîam arîa atheru, arîa onthe makûrigicîrîtie nîmagwîtigagîra mûno.

⁸ We Ngai-Mûnene, Ngai mwene vinya wonthe, nîûrîkû ûrî vinya tawe, We Ngai-Mûnene, ûrî mwîvokeku maûndûrî monthe.

⁹ We nîwathaga ndivû cia îria, nîûvoragîria makûmbî ma rîo rîrîa mambarara.

¹⁰ Nîwaringire njoka ya îriarî îrîa îtagwa Rahabu na ûkîmîûraga, nîwanyaganirie nthû ciaku na vinya waku.

¹¹ Îgûrû nî gwaku, nthî wana yo nî yaku, nthî na indo cionthe irîa irî kuo nîwe waciûmbire,

¹² Nîwe waûmbire mwena wa rûgûrû wana mwena wa îveti, kîrîma gîa Taboru na gîa Herimoni nîirakwinîra na gîkeno.

¹³ We ûrî vinya, we ûrî vinya na nîûvootanîte.

¹⁴ Ûthingu na kîvooto nîcio mûcingi wa ûthamaki waku; wendo ûtathiraga na wîvokeku nîcio igûtongoragîria.

¹⁵ Kûrathimwa nî andû arîa makûgoocaga na nyîmbo, ûtûûraga ûmegucagîra ntha we Ngai-Mûnene.

¹⁶ Methagîrwa marî akenu nîwe mûthenya wonthe, na nîmakûgoocaga nîûndû wa ûthingu waku.

¹⁷ Nîûndû we nîwe vinya wao wa magegania; wendo waku nîguo ûtûmaga mavoote nthû ciao.

¹⁸ We Ngai-Mûnene, vinya ûrîa ûtûgitagîra nî waku; we Ûrîa Mûtheru wa Isiraeli nîwe ûtûvete mûthamaki wetû.

Kîrîkanîro kîa Ngai kûrî Daudi.

¹⁹ Vîndî ya tene we nîwarîrie ndungata ciaku irîa ikwîvokete na njîra ya kîoneki ûkiuga atîrî, “Nie nîmveete mûndû ûmwe njamba vinya, nîmûthuurîte kuuma gatagatî ka andû na ngamûva gîtî Kîam ûthamaki.

²⁰ Nîmonete Daudi ndungata yakwa, nîmwamûrîte na ngamwîtîrîria maguta makwa matheru.

²¹ Vinya wakwa ûkethagîrwa nake vîndî cionthe, ûvoti wakwa ûkaamwîkagîra vinya.

²² Nthû ciake itikaamûvoota, andû arîa aganu matikaamûvinyîrîria.

²³ Nîngaacûkangia nthû ciake, na mbûrage arîa mamûmenete.

²⁴ Wîvokeku wakwa na wendo wakwa ûtathiraga ûkethagîrwa nake, nîngaatûmaga avootanage vîndî cionthe.

²⁵ Nîngaatûma ûthamaki wake wîvande, kuuma îriarî kûthiî nginya nyûnjîrî.

²⁶ Daudi nîakaambîra atî, ‘We nîwe vava, Ngai wakwa, Îthiga rîa ûvonokio wakwa.’

²⁷ Nîngaatûma atuîke mwana wakwa wa îrikithathi, mûthamaki mûnene gûkîra athamaki onthe a nthî.

²⁸ Wendo wakwa ûtathiraga nîûtûûra ûmûmenyagîrîra tene na tene, na kîrîkanîro gîakwa nake nî gîtûûra tene na tene.

²⁹ Nîngaatûma njiarwa ciake itûûre ciathanaga tene na tene, na ûthamaki wake ndûkaathira.

³⁰ “Nwatî ethîrwa njiarwa ciake itikaathîkîra watho wakwa, na marege kûrûmîrîra matuîro makwa ma ciira,

³¹ ethîrwa nîmakaarega kûrûmîrîra irîra ciakwa, na marege kwathîkîra maathani makwa,

³² nîngaacoka nîmaverithie nîûndû wa mevia mao; nîngaamariva nîûndû wa mavîtia mao.

³³ Nwatî ndigaatiga kwonia Daudi wendo wakwa ûtathiraga, kana ndega gûtuîka mwîvokeku kûrî ke.

³⁴ Nie ndikaauna kîrîkanîro gîakwa nake, kana ngarûrîra ciugo irîa naaririe na kanyua gakwa.

³⁵ “Nînîvîtîte na rîîtwa rîakwa rîtheru; atî ndikaaveenia Daudi.

³⁶ Njiarwa ciake igaatûûra tene na tene, na ûthamaki wake ûtûûre ta riûa.

³⁷ Ûthamaki wake nîûtûûra tene na tene ta mweri, ta ûrîa mweri ûtûûraga wîvandîte îgûrû.”

Gûcakaya nîûndû wa kûvootwa kwa mûthamaki

³⁸ Nwatî rîu we Ngai wî mûrakaru nî mûthamaki ûrîa ûthuurîte, nîûmûtiganîrîtie na nîûmûregete.

³⁹ Nîûcûkîtie kîrîkanîro kîrîa warûthire na ndungata yaku, na nîûmûrutîte nthûmbî yake na ûkamikia rûkûngûrî.

⁴⁰ Nîwomomorete nthingo cionthe cia îtûûra rîake, nîunangîte kûndû gwake gwa kwîthitha.

⁴¹ Andû arîa onthe mavîtûkagîrîra kuo nîmamûcunaga indo ciake, andû a mavûrûri marîa mariganîtie nao nîmaamûthekagîrîra.

⁴² Nîûvete nthû ciake ûvootani, na nîûtûmîte nthû ciake cionthe ikene.

⁴³ Nîûtûmîte indo ciake cionthe cia mbaara ituîka cia mana, nîûmûrekereretie avootwe arî mbaararî.

⁴⁴ Nîûmûcunîte mûragi wa wathani, na ûkagwîthia ûthamaki wake nthî.

⁴⁵ We nîûmûnyivîrîtie mîaka ya wîthî wake, na ûkamwîcûria gîconoko.

Îvoya nîûndû wa kûvonokua

⁴⁶ We Ngai-Mûnene nîwîthitha nginya tene na tene? Marakara maku nîmatûûra makanîte ta mwaki nginya rî?

⁴⁷ We Mwathani, ririkana ûrîa ûtûûro wakwa ûrî mûnini; ririkana atî andû onthe arîa waûmbire matûûraga kavinda kanini!

⁴⁸ Nî mûndû ûrîkû ûngîtûûra mwoyo na ndakue? Nî mûndû ûrîkû ûngîîrigîrîria gûkua?

⁴⁹ Mwathani, wendo waku ûtathiraga ûrîa warî naguo mbere, ûrîa werîre Daudi na mwîvîtwa ûrî kû?

⁵⁰ We Mwathani, ririkana ûrîa nie, ndungata yaku nîrarumwa, ûrîa nyûmagîrîria irumi cia andû arîa matakûgoocaga.

⁵¹ We Ngai-Mûnene, nthû ciaku irumaga mûthamaki ûrîa ûthuurîte, imûrumagîra wa kûrîa kuonthe avîtûkagîrîra.

⁵² Ngai-Mûnene, ûrokumua tene na tene! Ameni! Ameni!