Thaburi 84 - ÎVUKU RÎA ÛVORO MWARO

Wendi wa gwîkara Nyombarî ya Ngai

¹ We Ngai-Mûnene, mwene vinya wonthe, kaî hekarû yaku nî ng'emu-î!

² Nînîrerirîria gûtûûra hekarûrî ya Ngai-Mûnene. Ngoro na mwîrî wakwa wonthe nîcinagîra Ngai ûrîa ûtûûraga mwoyo ikenete.

³ Wana tûconi twa nja nîtûtumîte ciomba cia tuo kuo, na nthûngûrûrû nîitumîte ciomba cia cio, cigaga tûcui twacio vakuvî na metha yaku ya kîgongoona, we Ngai-Mûnene, mwene vinya wonthe, mûthamaki na Ngai wakwa.

⁴ Kûrathimwa nî arîa matûûraga hekarûrî yaku, vîndî cionthe makinaga nyîmbo cia gûgûkumia.

⁵ Kûrathimwa nî arîa magîcaga na vinya kuuma kûrî we, arîa meriragîria kûthiî kûgooca kîrîmarî gîa Zayuni

⁶ Makîvîtûkîrîra Kîamndarî Kîam Baca, nîmatûmaga gûtuîka kûndû gwa kûtherûka manjî; mbura nene nîîtûmaga gwîcûre manjî ma maria.

⁷ Nîmathiîcaga na mbere kûgîa vinya, nîmakoona Ngai ûrîa mûnene gûkîra ngai irîa kûu Zayuni.

⁸ Ngai-Mûnene, Ngai mwene vinya wonthe îgua îvoya rîakwa. We Ngai wa Jakovu nthikîrîria!

⁹ We Ngai, rathima mûthamaki wetû, îguîra ntha mûthamaki ûrîa ûthuurîte.

¹⁰ Gûtinda hekarûrî yaku mûthenya ûmwe, nîwaro gûkîra gûtinda kûndû kwîngî mîthenya ngiri. Nîkava kûrûngama mûromorî wa hekarû ya Ngai wakwa, gûkîra gûtûûra nyombarî cia andû arîa aganu.

¹¹ Ngai-Mûnene, Ngai nî riûa na nî ngo yetû, nîatûrathimaga na agatûva gîtîîo. Ndaimaga andû arîa mekaga ûrîa kwagîrîte indo mbaro.

¹² We Ngai-Mûnene, mwene vinya wonthe, kûrathimwa nî mûndû ûrîa ûkwîvokete.