Thaburi 81 - ÎVUKU RÎA ÛVORO MWARO

Rwîmbo rwa gûkûngûîra kîrugo

¹ Inîrani Ngai, ûrîa arî ke vinya wetû mugîrîrîtie; kumiani Ngai wa Jakovu mûrî na gîkeno!

² Inani rwîmbo mûkîvûraga tamburini, vûrani inanda na ngita irîa îgambaga waro.

³ Vuvani karumbeta mwanîrîre kîrugo Kîam mweri wacicûka, na kîrugo gîetû vîndî îrîa mweri ûramakia nthinwa.

⁴ Ûcio nîguo watho vûrûrirî wa Isiraeli, watho ûrîa umîte kûrî Ngai wa Jakovu.

⁵ Ngai aaveere andû a Isiraeli watho ûcio, vîndî îrîa aatharîkîre vûrûri wa Misiri. Nînîregua mûgambo wa mûndû ndaicî akiuga atîrî,

⁶ “Nînaamwaûrire mîrigo îrîa mwakuuîte, nînatûmire mwige nthî mîrigo îrîa mwakuuîte ya matuvarî.

⁷ Vîndî îrîa mwarî mathînarî nîmwangaîre na ngîmûvonokia. Naamûcokerie nîîthithîte mûgamborî wa ngwa. Naamûgererie manjîrî ma Meriba.

⁸ Mue andû akwa, thikîrîriani ngîmûkaania! Mue Isiraeli, naarî kethîrwa nwa mûnthikîrîrie!

⁹ Mûtikaagîe na ngai ng'eni gatagatîrî kenyu. Mûtikagooce ngai îngî.

¹⁰ Nie nînie Ngai-Mûnene, Ngai wenyu, ûrîa wamûrutire vûrûri wa Misiri. Athamia tûnyua twenyu na nîngûmûva irio.

¹¹ “Nwatî andû akwa matianthikîrîria; Isiraeli matiambathîkîra.

¹² Kwoguo nînaamarekirie mathiî na mbere na ûremi wao, na ngîreka meke wa ûrîa meendaga.

¹³ Naarî kethîrwa andû akwa nîmaanthikîrîrie; naarî kethîrwa Isiraeli nîmaambathîkîre!

¹⁴ Nînîngîavootire nthû ciao na îvenya, na ngaverithia andû arîa maamathûûrîte.

¹⁵ Andû arîa manthûrîte mangîenamîrîre mbere yakwa nî guoya; na îvera rîao rîngîgaatûûra tene na tene.

¹⁶ Nwatî mue nîngîamûvere irio mbaro cia ngano, na nîngîamûvaithirie na ûûkî kuuma kîthakarî.”