Thaburi 79 - ÎVUKU RÎA ÛVORO MWARO

Îvoya nîûndû wa mathîna ma vûrûri

¹ We Ngai, andû a ndûrîrî nîmatharîkîrîte vûrûri waku, nîmagwatîtie hekarû yaku ntheru mûgiro na nî momorete îtûûra rîa Jerusalemu.

² Nîmaatiganîrie mîîrî ya andû aku îrîwe nî nderi, mîîrî ya ndungata ciaku irîwe nî nyamû cia kîthaka.

³ Nîmetûrûrîte nthakame ya andû aku ta manjî Jerusalemu, na gûtirî mûndû ûtigarîte wa kûthika andû acio akuû.

⁴ Andû a ndûrîrî nî maratûnyarara, arîa tûriganîtie nao matûthekagîrîra na magatûnyûrûria.

⁵ We Ngai-Mûnene, nîûrakara nî tue nginya rî? Marakara maku nî mathiî na mbere gwakana ta mwaki nginya rî?

⁶ Îtûrûra marakara maku kûrî andû arîa matagwicî, kûrî mavûrûri monthe marîa matakûgoocaga.

⁷ Nîûndû nîmaûragîte Jakovu, andû aku; na nîmacûkangîtie vûrûri waku viû.

⁸ Ndûgatûverithie nîûndû wa mevia ma methe metû. Twîguîre ntha rîu, nîûndû tûrî athiru mwîvoko viû.

⁹ Tûtethie We Ngai, mûvonokia wetû; tûvonokie na ûtûovere mevia metû, nîûndû wa gîtîîo Kîam rîîtwa rîaku.

¹⁰ Nîndûî gîtûmaga andû a ndûrîrî matûûrie atîrî, “Ngai wenyu arî kû?” Tûtethie twone ûkîverithia andû a mavûrûri, nîûndû nîmeetûrûrire nthakame ya ndungata ciaku.

¹¹ Tiga kîrîro Kîam andû arîa ove gîgûkinyîre, nîûndû wa vinya waku mûnene ûvonokie andû arîa matuîrîrîtwe kûragwa.

¹² We Mwathani, îîrîvîrîrie kûrî ndûrîrî icio maita mûgwanja ma marîa ikûnyararîte namo.

¹³ Natue andû aku, tue ng'ondu cia ndîthia yaku, nî tûtûûra tûgûcokagîria ngatho tene na tene, na tûkûgoocage vîndî cionthe.