Thaburi 78 - ÎVUKU RÎA ÛVORO MWARO

Ngai na andû ake

¹ Andû akwa thikîrîriani ûrîa nîramûthomithia, na mûtege matû mwîgue ûrîa nîramwîra.

² Nî mbaria namue na nthimo, maûndû marîa matwîre marî mathithe kuuma tene,

³ maûndû marîa twîguîte na tûkamamenya; maûndû marîa twerirwe nî methe metû.

⁴ Tûtikaathitha ciana cietû maûndû mau, nîtûkera njiarwa irîa igaaûka ûvoro wîgiî vinya wa Ngai-Mûnene na maûndû manene na ma magegania marîa ekîte.

⁵ Nîwavere andû a Isiraeli mawatho, na njiarwa cia Jakovu akîiva maathani. Nîwerire methe metû mathomithagie ciana ciao mawatho make,

⁶ nîguo ciana irîa igaaciarwa vuvarî ikaamenya mawatho mau, nacio igaacoka ithomithie ciana ciao mawatho mau.

⁷ Na njîra îo nîmakaaiga mwîvoko wao kûrî Ngai, na matikaariganîrwa nî ûrîa ekîte, nwatî nîmakaavingagia maathani make vîndî cionthe.

⁸ Matigekara ûrîa methe mao meekariî; andû aûmû ngoro na mataarî athîki, rûciaro rûtaarî na wîtîkio mûkinyanîru, na rûtaarî rwîvokeku mbere ya Ngai.

⁹ Wana ethîrwa andû a Efiraimu maarî na moota na mîguî, nîmaaûrire nî nthû ciao rîrîa maarî mbaararî.

¹⁰ Matiavingia kîrîkanîro Kîamo na Ngai, na nîmaaregire kwathîkîra watho wake.

¹¹ Nîmaariganîrwe nî ûrîa Ngai eekîte, na ciama irîa moonire akîringa.

¹² Methe mao nîmoonire Ngai akîringa ciama, arî Zoani kûndû kûrîa kwaraganu vûrûrirî wa Misiri.

¹³ Nîwagaanirie îria ûkîmavîtûkîrîria kuo, na agîtûma manjî marûngame ta rûthingo mîena yoîrî.

¹⁴ Ngai aamatongoragia na îtu mûthenya, na ûtukû aamatongoragia na kîmûrî Kîam mwaki.

¹⁵ Nîwatûmire mathiga matûkange kûu werûrî, na akîva andû ake manjî kuuma nthî kûrîa kûriku mûno.

¹⁶ Nîwatûmire tûrûnjî tume îthigarî, na agîtûma manjî manyûrûrûke ta nyûnjî.

¹⁷ Kûnarî ûguo nwa nîmaathiîre na mbere kwîvia, na marî werûrî nîmaareganire na Ngai ûrîa ûrî Îgûrû Mûno.

¹⁸ Nîmaatwire na ngoro ciao magerie Ngai, na njîra ya kûmwîtia irio irîa meeriragîria.

¹⁹ Nîmaarumire Ngai makiugaga atîrî, “Ngai nwa atûretere irio werûrî?

²⁰ Nîma, nîwaringire îthiga, na manjî makiuma makînyûrûrûka ta rûnjî; nwatî rîu nwa atûve irio, na ave andû ake nyama?”

²¹ Kwoguo rîrîa Ngai-Mûnene eegwire makiuga ûguo nîwecûrirwe nî marakara, na nîwavîvirie andû a Jakovu na marakara mekariî ta mwaki, marakara make makîtharîkîra andû a Isiraeli,

²² nîûndû matiarî evokeku kûrî ke, na matietîkîtie atî ke aarî na vinya wa kûmavonokia.

²³ Nwatî Ngai nîwathire matu ma îgûrû, na akîvingûra mîrango ya îgûrû.

²⁴ Nîwamavere maana kuuma îgûrû, nîwamavere irio kuuma îgûrû marîe.

²⁵ Kwoguo nîmaarîre irio cia araika, Ngai nîwamavere irio cia kwîgana.

²⁶ Nîwatûmire rûvuvo rûvurutane kuuma mwena wa îrathîro, vinya wake nîwatûmire rûvuvo rûvurutane kuuma mwena wa îveti;

²⁷ na nîwanyûrûrûkîrie andû ake nyama nyîngî ta rûkûngû, iconi ciarî nyîngî ta mûthanga ûrîa ûrî rûtererî rwa îria.

²⁸ Iconi icio ciagwîre gatagatî ga kûrîa maambîte magema, ikîthiûrûrûkîria magema mao.

²⁹ Kwoguo andû nîmaarîre na makîvaa, Ngai nîwamavere kîrîa meendaga.

³⁰ Nwatî wana mbere ya marîa irio mavaa, wa makîrîcaga,

³¹ Ngai nîwarakarirue nî andû acio, na akîûraga arîa maarî vinya gatagatîrî kao, akîgwîthia anake arîa maarî aro mûno a Isiraeli.

³² Kûnarî ûguo andû acio nîmaathiîre na mbere kwîvia; wana Ngai aringa ciama matiamwîtîkia.

³³ Kwoguo Ngai nîwatûmire mîthenya yao îthira ta mûvevû, na ûtûûro wao ûkîthira wa rîmwe mûthiro.

³⁴ Vîndî îrîa Ngai aûraga andû amwe, acio engî nîmaamûcokagîrîra; nîmeriraga na makamûvoya na kinyi.

³⁵ Nîmaririkanaga atî Ngai nîke ûmagitagîra, Ngai ûrîa ûrî Îgûrû Mûno nîke ûmavonokagia.

³⁶ Nwatî matiaragia maûndû ma ma, maûndû monthe marîa maamwîrire maarî ma maveeni.

³⁷ Matiarî evokeku kûrî Ngai na ngoro ciao, matiavingia kîrîkanîro kîrîa aarîkanîre nao.

³⁸ Nwatî Ngai nîwaeguîrîre andû ake ntha, na akîmarekera mevia mao. Mavinda meengî nîwerigagîrîria kûrakara, na nîwerigagîrîria mang'ûrîka.

³⁹ Ngai nîwaririkanire atî maarî andû tu, mekariî ta rûvuvo rûrîa rûvurutanaga na rûkathira.

⁴⁰ Nîmaareganire na Ngai maita meengî marî werûrî, na maita meengî nîmaamwîguithirie kîeva.

⁴¹ Meekaraga makîgeragia Ngai, na magatûma Ûrîa Mûtheru wa Isiraeli arakare.

⁴² Nîmaariganîrwe nî vinya wake mûnene, makîriganîrwa nî mûthenya ûrîa aamavonokirie kuuma kûrî nthû ciao,

⁴³ rîrîa oonanirie maûndû ma magegania vûrûrirî wa Misiri, na akîringa ciama Zoani, kûndû kûrîa kwaraganu.

⁴⁴ Nîwatûmire manjî magarûrûke magîtuîka nthakame, nîguo andû a Misiri mature manjî ma kûnyua.

⁴⁵ Nîwatûmire Misiri kûgîe ngi nyîngî na ikîmathînia, na ciûra irîa ciacûkangirie vûrûri wao.

⁴⁶ Ngai nîwatûmire ngige irîe mîmera yonthe, na igîcûkangia mîgûnda yao.

⁴⁷ Nîwaurithirie mbura ya mbembe îgîcûkangia mîthavibu yao, na mîkûyû yao îgîcûkangua nî mbaa.

⁴⁸ Nîwatûmire ng'ombe ciao ciûragwe nî mbura ya mbembe, na ng'ondu ciao ikîûragwa nî mveni.

⁴⁹ Marakara ma Ngai nîmaatûmire andû manyitwe nî thîna nyîngî, Ngai aamathiririe nîûndû wa gûtûmbwa nî marûrû, marîa maaûkire ta anjaama a kûmathiria.

⁵⁰ Ngai nîwarekererie marûrû make; ndaarega kûmaûraga, nwatî nîwamaûragire na mîrimû mîcûku.

⁵¹ Nîwaûragire marikithathi monthe ma anake a Misiri, marikithathi ma andû onthe a Misiri.

⁵² Nîwacokire agîtongoria andû ake ta mûrîthi, na akîmavîtûkîrîria werûrî ta ndîthia ya ng'ondu.

⁵³ Aamatongoririe amagitîrîte na matagwîtigîra, nwatî nthû ciao nîciaûrîre îriarî.

⁵⁴ Nîwamavirire vûrûrirî mûtheru, kîrîmarî kîrîa aatavîte na vinya wake.

⁵⁵ Wa ûrîa andû ake maatonyaga vûrûrirî ûcio, nwaguo eengataga andû arîa maatûûraga kuo; nîwagaîre mîvîrîga ya Isiraeli vûrûri ûcio, na agîtûma andû a Isiraeli matûûre magemarî ma andû acio.

⁵⁶ Nwatî andû a Isiraeli nîmaareganire na Ngai mwene vinya wonthe, na makîmûgeria. Nîmaaregire kwathîkîra maathani make,

⁵⁷ makîgarûrûka na magîka maûndû macûku ta methe mao; maathugarire ta ûta ûtarî mûrûngarû.

⁵⁸ Nîwarakarirue nî kûndû kûrîa maagoocagîra ngai cia mîvuanano, na nîweguire wîru nîûndû wa mîvuanano îo maaumîtie.

⁵⁹ Rîrîa Ngai oonire maûndû mau nîwarakarire mûno, kwoguo nîwaregire andû a Isiraeli viû.

⁶⁰ Nîwatiganîrie îgema rîake rîrîa rîarî Shilo, kûrîa aatûûraga gatagatîrî ka andû.

⁶¹ Ngai nîwarekererie Îthandûkû rîake rîa Kîrîkanîro rîtavwe nî nthû, akîrekereria riiri wake njararî cia nthû.

⁶² Nîwarakarire nî andû ake, na akîmarekereria maûragwe nî nthû ciao.

⁶³ Anake ao nîmaaûragîrwe mbaararî, na erîtu ao magîtura anake a kûmavikia.

⁶⁴ Athînjîri-Ngai ao nîmaaûragîrwe mbaararî, na aka ao a ndigwa matiamacakaîra.

⁶⁵ Mwathani nîwacokire akîramûka takwa aaumîte tororî, ta mûndûmûrûme njamba acanjamûrîtwe nî ndivei.

⁶⁶ Nîwengatire nthû ciake, na agîtûma itûûre na gîconoko tene na tene.

⁶⁷ Nwatî nîwaregire njiarwa cia Josefu, na ndaathuura mûvîrîga wa Efiraimu.

⁶⁸ Vandû va ûguo aathuurire mûvîrîga wa Juda, Kîrîma Kîam Zayuni kîrîa endete.

⁶⁹ Nîwatumire hekarû yake kûu kîrîmarî îkariî ta mûciî wake wa îgûrû, nîwatûmire îrûme ta nthî îrîa îtûûraga tene na tene.

⁷⁰ Nîwathuurire Daudi ndungata yake, aamûrutire wîrarî wa kûrîthia ng'ondu.

⁷¹ Aamûrutire wîra wa kûrîthia ng'ondu na twana twa ng'ondu, nîguo atuîke mûthamaki wa Isiraeli, na arîthagie andû a Ngai.

⁷² Daudi nîwamamenyerere na ngoro ntheru, na nîwamatongoririe arî na wara mwîngî.