Thaburi 77 - ÎVUKU RÎA ÛVORO MWARO

Kûmîrîrua vîndî ya mathîna

¹ Ngaagîra Ngai mbugîrîrîtie; nîmûkaagîra mbugîrîrîtie na nîambîgucaga.

² Nîmvoyaga Mwathani vîndî ya thîna; mvoyaga mbûkîrîrîtie njara ciakwa ûtukû mûgima ndakûnoga, nwatî ndionaga mûndû ûngînyûmîrîria.

³ Nîciragia ûvoro wa Ngai, ngacaa; rîrîa ngwîciria mûno, nîmbûragwa nî vinya.

⁴ We Ngai, nîûtûmaga mbûre toro ûtukû mûgima; nînîrathînîka mûno ûndû ndangîvota kwaria.

⁵ Nînîciragia ûvoro wa mîthenya îrîa mîvîtûku na ngaririkana mîaka ya tene.

⁶ Ndaraga ngîîciria; nîîciragia na vinya na ngeyûria na ngoro atîrî,

⁷ “Nîkwa Mwathani agûtûtiganîria nginya tene? Nîkwa atagaakenua nî tue rîngî?

⁸ Nîkwa wendo wake ûrîa ûtathiraga ûrî mûthiru? Anga ndakaavingia ciîranîro ciake?

⁹ Nîkwa Ngai arî mûriganîre nî gûtwîguîra ntha? Nîkwa arakarîte nginya agatiga gûtûkirîrîria?”

¹⁰ Nînaacokire ngiuga atîrî, “Ûndû ûrîa ûnthînagia makîria nî atî, Ngai ûrîa ûrî Îgûrû Mûno ndarî na vinya rîngî.”

¹¹ Nîngaaririkana ciîko ciaku, we Ngai-Mûnene; nîngeciria maûndû maku ma magegania marîa wekire tene.

¹² Nîngeciria na vinya ûvoro wa maûndû monthe marîa wîkîte; na nîîcirie ûvoro wa ciîko ciaku cia vinya.

¹³ Maûndû monthe marîa wîkaga we Ngai, nî matheru. Gûtirî ngai nene tawe.

¹⁴ We nîwe Ngai ûrîa ûringaga ciama; nîwonanirie vinya waku kûrî mavûrûri.

¹⁵ Nîwakûûrire andû aku na vinya waku, njiarwa cia Jakovu na Josefu.

¹⁶ Rîrîa manjî maakwonire we Ngai, nîmegwire guoya, na îriarî kûrîa kûriku mûno gûkinaina.

¹⁷ Matu nîmaaurithirie mbura; ngwa nîyagambire kuuma matuurî, na mveni ikîvenia mîena yonthe.

¹⁸ Mûrurumo wa ngwa yaku warî kîvuvûkaniorî, mveni nîciatûmire nthî ng'ima kûgîe na ûtheri; na nthî nîyainainire na îkîthingitha.

¹⁹ We nîwathiîrîre îriarî; nîwavîtûkîrîre îriarî kûrîa kûriku, nwatî makinyo maku mationeka.

²⁰ Watongoririe andû aku ta ûrîa mûrîthi atongoragîria ndîthia, matongoretue nî Musa na Aroni.