Thaburi 76 - ÎVUKU RÎA ÛVORO MWARO

Ngai, mûvootani

¹ Ngai nîecîkene Juda; rîîtwa rîake nî rînene Isiraeli.

² Mûciî wake ûrî Jerusalemu; atûûraga Kîrîmarî gîa Zayuni.

³ Arî kûu nîwaunangire mîguî ya nthû, ngo ciao na mviû, wana indo ciao cionthe cia mbaara.

⁴ We Ngai, kaî wî riiri-î! Umîte kîrîmarî ûrî na riiri mwîngî, kûrîa wavootere nthû ciaku.

⁵ Arîa marî vinya nîmaacunirwe indo ciao irîa maatavîte, na rîu onthe mamamîte toro wa gîkuû, vinya wao na wara wao warî wa mana.

⁶ Rîrîa wamagûkirie, we Ngai wa Jakovu, mbarathi ciao na arîa mathiîcaga maitwîte nîmaagwîre na magîkua.

⁷ Nwatî we Ngai, wîtigîrîtwe nî andû onthe. Gûtirî mûndû ûngîrûngama mbere yaku rîrîa wî mûrakaru.

⁸ Nîwamenyithanirie îtuîro rîaku ûrî îgûrû; nthî nîyetigîrire na îgîkira,

⁹ rîrîa warûngamire nîguo ûtucanîre, nîguo ûvonokie andû onthe arîa avinyîrîrie gûkû nthî.

¹⁰ Andû arîa arakaru nîmagûkumagia makîria; arîa mataakuîra mbaararî nîmagaakûngûîra irugo ciaku.

¹¹ Vingîriani Ngai-Mûnene, Ngai wenyu maûndû marîa wamwîrîre; mue andû a mavûrûri monthe marîa marî vakuvî reterani Ngai iveo. Ngai nîatûmaga andû onthe mamwîtigîre.

¹² Nîanyivagia athani arîa etîi, na agatûma athamaki a nthî metigîre.