Thaburi 75 - ÎVUKU RÎA ÛVORO MWARO

Ngai nîke mûtucanîri

¹ Nîtûgûgûkumia we Ngai, nîtûgûgûkumia! Nîtwanagîrîra ûnene wa rîîtwa rîaku, na tûkaaria ûvoro wa maûndû manene marîa wîkîte.

² Ngai arauga atîrî, “Nîmvangîte vîndî ya îtuîro, vîndî îo nîngaatucanîra na kîvooto.

³ Nthî nîkainaiana na indo cionthe irîa irî kuo, nie nînie nyitagîrîra mîcingi yayo.

⁴ Mbîraga andû arîa aganu matigetîîe; na andû arîa aganu matige gwîtûgîria.

⁵ Mûtikeyone takwa mûrî andû a vata mûno, kana mwaragie na mwîtîîo.”

⁶ Îtuîro rîtiumaga mwena wa îrathîro kana wa îthûîro, rîtiumaga mwena wa rûgûrû kana wa îveti;

⁷ Ngai ke mwene nîke mûtucanîri, nîatucagîra amwe atî marî na mavîtia, na agatuîra engî atî matirî na mavîtia.

⁸ Ngai-Mûnene anyitîte gîkombe na njara, gîcûrîte ndivei ndûrû ya marakara make. Nîaramîtûrûra, na andû onthe arîa aganu nîmaramînyua; maramînyua yonthe nginya îtata rîa mûthiia.

⁹ Nwatî nîndûûra ngenagîra tene na tene, na minagîre Ngai wa Jakovu nyîmbo cia kûmûkumia.

¹⁰ Nîakaathiria andû arîa aganu vinya, nwatî nîakoongerera andû arîa athingu vinya.