Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Thaburi 73 - ÎVUKU RÎA ÛVORO MWARO


ÎVUKU RÎA KATHATÛ Tha 73—89 Ngai ekaga ûrîa kwagîrîrîte

1 Nama Ngai nî mwaro kûrî andû arîa athingu, nî mwaro kûrî arîa marî ngoro ntheru.

2 Nwatî nie naarî vakuvî gûta mwîvoko; wîtîkio wakwa warî vakuvî kûthira,

3 nîûndû nînegucagîra andû arîa etîi wîru, rîrîa nonire atî andû arîa aganu nwa maûndû maro monaga.

4 Matiîgucaga ruuo; mîîrî yao nî ûgima na marî na vinya.

5 Matinyamarîkaga ta andû arîa engî; matirî na mathîna ta marîa marî na andû arîa engî.

6 Kwoguo mekagîra mwîtîîo ta mûkathî wa ngingo; naguo waganu ûkamakunîkîra ta nguo.

7 Ngoro ciao itherûkaga waganu, na meciria mao mavangaga maûndû ma waganu.

8 Manyûrûragia andû arîa engî na makaria maûndû macûku, nî etîi na mavangaga ûrîa makûvinyîrîria arîa engî.

9 Maragia ûcûku wa Ngai arî îgûrû, na makaathaga andû onthe a gûkû nthî.

10 Kwoguo wana andû a Ngai nîmamarûmagîrîra, na nîmetîkagia maûndû monthe marîa maugaga.

11 Andû arîa acûku maugaga atîrî, “Ngai ndangîmenya; ûrîa ûrî Îgûrû Mûno ndangîmenya ûrîa tûreka.”

12 Ûguo nîguo andû arîa aganu mekariî; marî na indo nyîngî na nwa maragîa ciîngî makîria.

13 Anga nî wîra wa mana kwiga ngoro yakwa îrî ntheru na ngemenyerera ndikevie?

14 Mbîthîrîtwe nîrî na mathîna mûthenya wonthe; na ngaverithagua iraûko cionthe.

15 Kethîrwa nînaririe tao, nînîngîatuîkire mûndû ûtarî wa ma kûrî andû aku.

16 Nînageririe gwîciiria ûvoro ûyû, nwatî warî mûrito mûno,

17 nginya rîrîa naatonyire hekarûrî ya Ngai, nîrîo namenyire ûrîa gûgeekîka kûrî andû arîa aganu.

18 Nama we nîûmaigîte kûndû gûtenderû, na nîûtûmîte magwe na mathire.

19 Macûkangagua wa rîmwe; mathiragua nî imaûndû cia kûmakania.

20 Mekariî ta kîroto kîrîa kîriganagîra wa rîmwe rîrîa mûndû aramûka; rîrîa we Mwathani waûkîra nîmaûraga.

21 Rîrîa naarî mûrakaru na ngîgua ûrûrû ngororî yakwa,

22 naarî kîrimû na ndiamenyaga ûndû, nekariî ta nyamû na ndiakûmenyaga.

23 Kûnarî ûguo, mbîkaraga vakuvî nawe vîndî cionthe, na nîûnyitaga njara yakwa ya ûrîo.

24 We nîûndongoragia na mataaro maku, na mûthiiarî nîûkaanyamûkîra na gîtîîo.

25 Nîûrîkû wîngî nîrî nake îgûrû tiga we? Gûkû nthî gûtirî kîndû mendete tiga we.

26 Mwîrî wakwa na ngoro yakwa nwa ithire vinya, nwatî Ngai nîke vinya wakwa; nîke wenga tu mvatarîtue nîke.

27 Arîa magûtiganagîria nama nîmakaathira; nîûgacûkangia arîa matarî evokeku.

28 Nwatî vakwa nie, nîwaro gwîkara vakuvî na Ngai, nînduîte Mwathani Ngai-Mûnene vandû vakwa va kwîthitha, nîguo managîrîre maûndû monthe marîa ekîte!

©Bible Society of Kenya, 2019

Bible Society of Kenya
ကြှနျုပျတို့နောကျလိုကျပါ:



ကြော်ငြာတွေ