Thaburi 72 - ÎVUKU RÎA ÛVORO MWARO

Kûvoera mûthamaki

¹ Onagîrîria mûthamaki gûtua ciira na kîvooto, we Ngai; na ûmûgaagîre ûthingu waku,

² nîguo athage andû aku na kîvooto, na athage arîa avinyîrîrie na ûthingu.

³ Vûrûri ûrogîa na ûthiî wa na mbere, na ûgîe na maûndû ma ûthingu.

⁴ Mûthamaki arogitîra kîvooto Kîam arîa avinyîrîrie, atethererie arîa marî na ûvatari, na acûkangie arîa mamavinyagîrîria.

⁵ Arotûûra kavinda karaca ta riûa, na atûûra ta mweri kûrî njiarwa cionthe.

⁶ Mûthamaki arotuîka ta mbura mîgûndarî, ta rûthuthuû rûkiurîra nthî nyûmû.

⁷ Ûthingu ûrothiî na mbere ûtûûrorî wake wonthe, na kûgîe na thayû tene na tene.

⁸ Aroathana kuuma îriarî nginya îriarî, kuuma rûnjîrî rwa Farati nginya mîthiia ya nthî.

⁹ Nthû ciake irîa itûûraga werûrî nîikenamîrîra mbere yake; nthû ciake nîikaîgwîthia nthî rûkûngûrî.

¹⁰ Athamaki a Tarishishi na a icîgîrîra nîmakaaruta gooti kûrî ke, athamaki a Sheba na a Seba nîmakaamûvirîra iveo.

¹¹ Athamaki onthe nî makenamîrîria mothiû mbere yake; mavûrûri monthe nî makaamûtungatîra.

¹² Nîavonokagia mûthîni ûrîa ûmwîtaga, na ngîa îrîa îtarî na wa kûmîtethia.

¹³ Nîegucagîra ntha avatari na arîa matarî na vinya, nîavonokagia mîoyo ya arîa marî na thîna.

¹⁴ Nîamavonokagia kuuma kûrî arîa mamavinyagîrîria na arîa aganu, nîûndû ûtûûro wao ûrî vata mbere yake.

¹⁵ Mûthamaki, ûrotûûratûûra! Arovewa thaavu kuuma Sheba; arovoyagîrwa nî andû vîndî cionthe; Ngai aromûrathimaga vîndî cionthe!

¹⁶ Vûrûrirî kûrogîa na irio nyîngî; irîmarî kûrogîa na irio nyîngî, ta irîa ikûraga Lebanoni. Nao andû maroîcûra matûûrarî, ta nyaki îrî mûgûndarî.

¹⁷ Rîîtwa rîa mûthamaki rîrotûûra rîririkanagwa tene na tene, ngumo yake îrotûûra vîndî rîrîa riûa rîgûtûûra rîaraga. Mavûrûri monthe marovoyaga Ngai amarathime, ta ûrîa arathimîte mûthamaki.

¹⁸ Ngai-Mûnene, Ngai wa Isiraeli arokumua! Nîke wenga tu wîkaga maûndû ma magegania.

¹⁹ Rîîtwa rîake rîrî riiri rîrokumagua tene ne tene! Riiri wake ûroîcûra nthî yonthe. Ameni! Ameni!

²⁰ Ûcio nîguo mûthiia wa mavoya ma Daudi, mûvîcî wa Jesii.