Thaburi 71 - ÎVUKU RÎA ÛVORO MWARO

Îvoya rîa mûndû mûkûrû

¹ Mbûkîte kûrî we Ngai-Mûnene nîguo ûngitîre; ndûkareke mvootwe!

² Ndethia na ûmvonokie nîûndû we wî mûthingu, nthikîrîria na ûmvonokie!

³ Tuîka kûndû gwakwa gwa kwîthitha, vandû vagitîre va kûmenyagîrîra, nîûndû we nîwe vandû vakwa va kûûrîra na kûngitîra.

⁴ Ngai wakwa, mvonokia kuuma kûrî andû arîa aganu, kuuma kûrî andû arîa matarî ntha na acûku.

⁵ Nîûndû we Ngai-Mûnene, nîwe kîîrîgîrîro gîakwa; kîîrîgîrîro gîakwa kuuma nîrî mûnini.

⁶ Ndwîre ngwîvokete ûtûûrorî wakwa wonthe, ûtwîre ûngitîrîte kuuma rîrîa naciarirwe. Nîndûûra ngûkumagia tene na tene.

⁷ Ûtûûro wakwa ûtuîkîte kîonereria varî andû eengî, nîûndû we wî mûgitîri wakwa ûrî vinya.

⁸ Ngûkumagia vîndî cionthe, na nganîrîra riiri waku mûthenya wonthe.

⁹ Ndûkande rîu nîrî mûkûrû; ndûkandiganîrie rîu ndarî na vinya.

¹⁰ Nîûndû nthû ciakwa ciaragia naaî îgûrû rîakwa; arîa mekaraga manyoveretie nîmararanîria,

¹¹ na makauga atîrî, “Ngai nîamûtiganîrîtie; tûmûrûmîrîrie na tûmûnyite; nîûndû gûtirî na wa kûmûvonokia.”

¹² We Ngai, ndûgekare kûraca nanie; we Ngai wakwa, ûka na îvenya ûndethie!

¹³ Arîa marantharîkîra marovootwa na mathirue, arîa mendaga kûmbîka naaî nîmegue nthoni na maconorithue.

¹⁴ Nwatî nie nîndûûra ngwîrîgîrîte; na ngûkumagie makîria.

¹⁵ Nîngaaragia ciîko ciaku cia ûthingu; nînganagîrîra ciîko cia ûvonokio waku vîndî cionthe, wana ethîrwa ndingîvota gûitara.

¹⁶ Nîngaanîrîra ciîko ciaku cia vinya, we Mwathani Ngai-Mûnene; nîngaanîrîra atî we wenga tu, nîwe mûthingu.

¹⁷ We Ngai, ûtwîre ûnthomithagia kuuma nîrî mûnini, na managîrîre ciîko ciaku cia magegania.

¹⁸ Rîu nîrî mûkûrû na nîrî na mbuî ndûkandiganîrie, we Ngai, îkaraga nanie nginya rîrîa ngaanîrîra vinya waku kûrî njiarwa cionthe irîa igaaûka.

¹⁹ Ûthingu waku we Ngai, ûkinyîte matuurî, we nîwîkîte maûndû manene. We Ngai, nû wîkariî tawe?

²⁰ We nîûtûmîte mone mathîna na mînyamaaro, nwatî nîûkûnjokeria vinya wakwa rîngî; na ûngirie ndikathiî mbîrîrarî.

²¹ Nîûgûtûma ngîe îgweta gûkîra mbere, na ûnyûmîrîrie rîngî.

²² Nîngaagûkumia ngîvûûraga ngita; nîngaakumia wîvokeku waku, we Ngai wakwa. Nîngaakwinîra nyîmbo na kînanda, we ûrîa Mûtheru wa Isiraeli.

²³ Nîngaaugîrîria na gîkeno ngîkwinîra nyîmbo cia gûgûkumia; nîngaagûkumia nîûndû nîûmvonoketie.

²⁴ Nîngaaragia ûvoro wa ûthingu waku vîndî cionthe, nîûndû arîa meendaga kûmbîka naaî nîavoote na magaconorithua.