Thaburi 66 - ÎVUKU RÎA ÛVORO MWARO

Rwîmbo rwa gûcokia ngatho

¹ Kumiani Ngai mûkenete, mue andû onthe a nthî!

² Inani mûgîkumagia vinya wa rîîtwa rîake; kumiani riiri wake!

³ Îrani Ngai atîrî, “Kaî maûndû marîa wîkaga nî ma magegania-î! Nthû ciaku nîikwînamagîrîra nî gûgwîtigîra irî mbere yaku.

⁴ Andû onthe a nthî nîmakûgoocaga; nîmainaga nyîmbo cia gûgûkumia, nîmainaga magîkumia rîîtwa rîaku.”

⁵ Ûkani mwone ûrîa Ngai ekîte, nîekîte maûndû ma kûgegania gatagatîrî ka andû.

⁶ Aagarûrire îria rîgîtuîka nthî nyûmû; andû nîmaaringire rûnjî na magûrû. Natue tûrî kûu nîtwakenire nîûndû wake.

⁷ Ke athanaga na vinya wake tene na tene, metho make nîmonaga mavûrûri monthe. Andû arîa mareganaga nake matigetûgîrie.

⁸ Mue andû a mavûrûri monthe kumiani Ngai wetû; tiga ngumo yake îguîke.

⁹ Ke nîatwigîte tûrî mwoyo na ndaatûrekereria tûvootwe.

¹⁰ We Ngai, nîûtûthimîte; nîûtûgeretie ta ûrîa sîlûva îtheragua na mwaki.

¹¹ We nîwatûrekererie tûkînyitwa nî mûtego; nîwatûkuuithirie mîrigo mîrito na mîrukuthu yetû.

¹² Nîwatûmire nthû cietû itûkinyange; tûnyamarîte ta andû mavîtûkîrîrîte mwaki na mwîcûrorî wa manjî; nwatî nîûtûretete kûndû kûrî na ûgitîri.

¹³ Nîngaaûka gûkûrutîra matega ma kûvîvua nyombarî yaku; nîngaavingia ûrîa naakwîrîre na mîvîtwa.

¹⁴ Nîngaakûnengera kîrîa naakwîrîre, rîrîa naarî thînarî.

¹⁵ Nîngaakûrutîra matega ma kûvîvua ma nyamû irîa noru, îgongoona rîa matega ma kûvîvua ma ndûrûme, nîngaaruta îtega rîa ndegwa na mbûri.

¹⁶ Mue muonthe mwîtigîrîte Ngai, ûkani mûnthikîrîrie, na nîngûmwîra ûrîa ambîkîte.

¹⁷ Nie nînaamûkaîre mbugîrîrîtie nîguo andethie, na nînaamûkumirie na nyîmbo.

¹⁸ Kethîrwa nînaaregire kûvera mevia makwa, Mwathani ndangîanthikîrîrie.

¹⁹ Nwatî nama Ngai nîwanthikîrîrie; ke nîwîguîte îvoya rîakwa.

²⁰ Ngai arokumua, nîûndû ndaarega îvoya rîakwa, kana athengutia wendo wake ûtathiraga kûrî nie.