Thaburi 65 - ÎVUKU RÎA ÛVORO MWARO

Rwîmbo rwa gûcokia ngatho

¹ We Ngai, nîtwagîrîrwe nî gûgûkumia ûrî Zayuni, na tûvingie mîvîtwa yetû kûrî we.

² Nîûndû we nîwîgucaga mavoya metû. Andû onthe nîmagaaûka kûrî we,

³ makîenda kwoverwa mevia mao. Rîrîa mevia metû mengîva mûno; we nîûtwovagîra.

⁴ Kûrathimwa nî arîa ûthuurîte, arîa ûretaga nîguo matûûre hekarûrî yaku. Nîtûgaakenera maûndû maro marîa ma nyomba yaku, irathimo cia hekarû yaku ntheru.

⁵ We nîûcokagia mavoya metû na njîra ya gûtûva ûvootani, na nîwîkaga maûndû ma magegania nîguo ûtûvonokie, we nîwe kîîrîgîrîro Kîam andû onthe a nthî, na Kîam arîa marî mariarî marîa marî kûraca.

⁶ Nîwavandire irîma varîa irî na vinya waku, na ûkîonania ûvoti waku mûnene.

⁷ We nîûvoragîria marurumî ma îria, na înegene rîa makûmbî ma rîo; nîûvoragîria înegene rîa andû.

⁸ Nthî yonthe nîmamakîtue nî maûndû marîa wîkîte. Nîûtûmaga kûgîe na gîkeno kûndû kuonthe, kuuma mûthiia ûmwe wa nthî nginya ûrîa wîngî.

⁹ Nîûmenyagîrîra nthî na ûkamiurithîria mbura; nîûnorithagia mûthetu, we Ngai, rûnjî rwaku rwîcûrîte manjî, na nîûvecaga vûrûri irio, nîûndû ûguo nîguo ûvangîrîte vûrûri.

¹⁰ Nîurithagia mbura nyîngî mîgûndarî îrîa mîvarîrîrie, na gûkaaraga manjî; nîûtotagia mûthetu na mbura, na nîûtûmaga kîrîa kîvande kuo gîkûre.

¹¹ Wega waku nîûvecanaga maketha meengî; kûrîa kuonthe ûvîtûkagîrîra kwîthagîrwa kûrî na indo nyîngî.

¹² Kûndû gwa kûrîthua gwîcûrîte ndîthia ya ng'ondu; irîmarî gwîcûrîte ikeno.

¹³ Mîgûndarî gwîcûrîte ng'ondu; ciandarî gwîcûrîte ngano. Indo cionthe nîirakûngûîra nî gûkena.