Thaburi 62 - ÎVUKU RÎA ÛVORO MWARO

Kwîvoka ûgitîri wa Ngai

¹ Mbetererete Ngai wenga tu ngirîrîrîtie; ûvonokio wakwa umaga kûrî ke.

² Nîke wenga ûngitagîra na akamvonokia; nîke ûngitagîra na ndikenyenyeka.

³ Mue muonthe nîmûntharîkîra nginya rî, na ndirî vinya mbîkariî ta rûthingo rwînamîrîrîtie, nie mûndû wîkariî rwirigo rwomomoku?

⁴ Mûvangîte kûnduta vandû va gîtîîo; mûkenaga rîrîa mûkwaria maveeni. Mwaragia ciugo mbaro cia kûrathimana, nwatî ngororî mwîthagîrwa mûkîrumana.

⁵ Mbetererete Ngai wenga tu ngirîrîrîtie; kîîrîgîrîro gîakwa kîrî kûrî ke.

⁶ Nîke tu ûngitagîra na akamvonokia; nîke ûngitagîra na ndikenyenyeka.

⁷ Ûvonokio wakwa na gîtîîo gîakwa ciumaga kûrî Ngai; nîke mûgitîri wakwa ûrîa mûnene, nîîthithaga kûrî ke.

⁸ Îîvokageni Ngai vîndî cionthe, mue andû aya, mûmenyithagieni mathîna menyu monthe, nîûndû nîke vandû vetû va kûûrîra.

⁹ Andû onthe mekariî ta mîvevû tu; andû arîa marî îgweta na arîa matarî îgweta matirî vata. Ûngîmathima ûrito na kîthimi, matirî ûrito; onthe marî vamwe nîavûthû gûkîra mîvevû.

¹⁰ Mûtikaige mwîvoko wenyu varî kûvinyanînîria; mûtikevoke kûgîa na indo na njîra ya gûcuunana na vinya; wana ûtonga wongerereka mûtikaige ngoro cienyu varî guo.

¹¹ Nîmbîguîte mavinda meengî Ngai akiuga atî ûvoti nî wake,

¹² na atî wendo wake ndûthiraga, na arîvaga mûndû kûringana na ciîko ciake.