Thaburi 57 - ÎVUKU RÎA ÛVORO MWARO

Îvoya rîa gwîtia ûtethio

¹ Mbîguîra ntha, we Ngai, mbîguîra ntha, nîûndû mbûkaga kûrî we nîguo ûngitîre. Ngitagîrwa nî kîruru Kîam mathagu maku, nginya rîrîa kîvuvûkanio Kîam mathîna gîkaathira.

² Ngayagîra Ngai ûrîa ûrî Îgûrû Mûno, Ngai ûrîa ûmvecaga kîrîa kîonthe mvataraga.

³ Nîakaambîtîka arî îgûrû na amvonokie; nîakaavoota arîa mamvinyagîrîria. Ngai nîakaamonia wendo wake ûtathiraga na wîvokeku wake.

⁴ Nie nthiûrûrûkîrîtue nî nthû, arîa makorokerete nyama cia andû ta mînyambû, magego mao mekariî ta matumû na mîguî; nîmî ciao ciîkariî ta mviû ino mbûgî.

⁵ Ûrokumua, we Ngai, ûrî kûu îgûrû mûno, naguo riiri waku wîcûre nthî yonthe.

⁶ Nthû ciakwa ciambîte mûtego nîguo ingwatithie; nanie nîmbîcûrîtwe nî kîeva. Maamînjîrîte îrima varîa mvîtûkagîrîra, nwatî o ene nîo magwîte kuo.

⁷ Ngoro yakwa nîîkindîrîtie, we Ngai; îni, ngoro yakwa nîîkindîrîtie! Nîngaakwinîra na ngûkumie!

⁸ Roho wakwa, ûkîra! Ûkîra we ngita na kînanda! Nîngûkîra mbere ya gûkîe.

⁹ Nîngaagûcokeria ngatho we Mwathani, nîrî gatagatî ka mavûrûri, nîngaakwinîra nyîmbo cia gûgûkumia nîrî gatagatî ka andû.

¹⁰ Wendo waku ûtathiraga ûkinyîte îgûrû; wîvokeku waku ûkinyîte matuurî.

¹¹ Ûrokumua, we Ngai, ûrî kûu îgûrû matuurî, naguo riiri waku wîcûre nthî yonthe.