Thaburi 56 - ÎVUKU RÎA ÛVORO MWARO

Îvoya kûrî Ngai vîndî ya thîna

¹ Mbîguîra ntha, we Ngai, nîûndû nînîratharîkîrwa; nthû ciakwa inyariraga vîndî cionthe.

² Nthû ciakwa intharîkagîra mûthenya mûgima. Andû arîa mararûa nanie nî eengî mûno.

³ We Ngai mwene vinya wonthe, rîrîa nanyitwa nî guoya, nîwe nîîvokaga.

⁴ Nîîvokete Ngai, na nîke ngumagia; nie nîîvokete Ngai na ndiîtigagîra. Mûndû angîmbîka atîa?

⁵ Nthû ciakwa indetagîre thîna vîndî cionthe; vîndî cionthe mavangaga ûrîa mangîmbîka naaî!

⁶ Maûnganaga vamwe methithîte, na magatuîria maûndû monthe marîa nîreka, makîenda kûmbûraga.

⁷ Maverithie, we Ngai, nîûndû wa mavîtia mao; voota andû acio ûrî na marakara!

⁸ We nîwicî ûrîa nthînîkîte; we nîwicî methori makwa monthe marîa ndîrîte. Na kinthî monthe matirî îvukuurî rîaku?

⁹ Rîrîa nagwîtia ûtethio we Ngai, nthû ciakwa nîikaavootwa, Nîmbicî atî Ngai arî mwena wakwa.

¹⁰ Nîîvokete Ngai-Mûnene na nîngumagia ciîranîro ciake.

¹¹ Nîîvokete Ngai na ndiîtigagîra. Mûndû angîmbîka atîa?

¹² We Ngai, nîngaakûrutîra kîrîa naakwîrîre; nîngaakûrutîra matega ma gûgûcokeria ngatho.

¹³ Nîûndû nîûmvonoketie kuuma gîkuûrî, na nîûgirîtie mvootwa. Kwoguo ngethagîrwa nîrî vakuvî na Ngai, nîrî ûtherirî ûrîa waragîra arîa marî mwoyo.