Thaburi 55 - ÎVUKU RÎA ÛVORO MWARO

Îvoya rîa mûndû acukanîrîrîtwe nî Mûrata

¹ Thikîrîria îvoya rîakwa, we Ngai, ndûkarege kûnthikîrîria ngîkûvoya!

² Nthikîrîria na ûnjokerie; nîrîmûthiru vinya nîûndû wa gwîtanga.

³ Nînîregua guoya nîûndû wa kûmakua nî nthû ciakwa, nîûndû wa kûvinyîrîrua nî andû arîa aganu. Andû arîa aganu nîmanthînagia; nîarakaru nînie na nîmamenete.

⁴ Ngoro yakwa îcûrîtwe nî kîmako, na nînîregua guoya ya gîkuû.

⁵ Nînîrainaina nî guoya nyîngî mûno; nîmbîcûrîtwe nî guoya nyîngî mûno.

⁶ Naarî kethîrwa nîrî na mathagu ta îcîa. Nîngîgûrûka na ngathiî kûvurûka.

⁷ Nîngîgûrûka ngathiî kûndû kûraca, na ngathiî gûtûûra werûrî.

⁸ Nîngîthiî na îvenya na ngacarie vandû varî na ûgitîri, ngauma kûrî rûkûngi rûnene na kîvuvûkanio.

⁹ We Mwathani, cûkangia mîario ya nthû ciakwa! Nînîrona waganu na ngucanio îtûûrarî.

¹⁰ Nthû ciakwa ithiûrûrûkaga îtûûra ûtukû na mûthenya, na igecûria waganu na mathîna kuo.

¹¹ Îtûûrarî kuonthe nî gûcûkangie; kûndû kuonthe gwîcûrîtwe nî kûvinyanîrîria na kûveenania.

¹² Kethîrwa nî nthû yakwa îranyûrûria nînîngîaûmîrîria; kethîrwa nî nthû yakwa îranîtîîra nîngîithitha ndîkamone.

¹³ Nwatî rîu nîwe, mûnyanyawa, mûrata wakwa, mûrata wakwa mûnene.

¹⁴ Nîtwamenyerete kwaranagîria ta arata tûrî vamwe, na twathiîcaga vamwe kûgooca nyombarî ya Ngai.

¹⁵ Nthû ciakwa irokua itakinyîtie; marothiî kwa arîa akuû marî mwoyo, nîûndû mecûrîtwe nî waganu ngororî ciao.

¹⁶ Nwatî nînîrakaîra Ngai, na Ngai-Mûnene nîakûmvonokia.

¹⁷ Nîmûkayagîra na ngamûrîrîra kîraûko, mûthenya na ûtukû, na akegua mûgambo wakwa.

¹⁸ Nîakûmvonokia nîrî na thayû kuuma mbaararî îrîa nîrarûa, nîûndû nthû ciakwa nî nyîngî.

¹⁹ Ngai ûrîa ûtûûraga athanaga kuuma tene, nîakûmbîgua na amavoote; nîûndû nîaregu kûgarûrûka, na matimwîtigagîra.

²⁰ Mûnyanyawa nîatharîkîrîte arata ake; nîaunîte kîrîkanîro gîake nao.

²¹ Ciugo ciao cianyorokete gûkîra kîrimû Kîam îriia, nwatî ngoro ciao mecûrîtwe nî rûmena; ciugo ciao cianyorokete ta maguta, nwatî ciatemaga ta mviû ino mbûgî.

²² Virîra Ngai-Mûnene mathîna maku, na nîagûkûmenyerera; ndangîrekereria andû arîa athingu mavootwe.

²³ Nwatî, we Ngai, nîûgaikia aûragani acio na veenania mbîrîrarî, matigaakinyia nuthu ya ûtûûro wao. Nwatî nie, ngakwîvokaga we Ngai.