Thaburi 51 - ÎVUKU RÎA ÛVORO MWARO

Kûvoya nîguo woverwe mevia

¹ Mbîguîra ntha, we Ngai, nîûndû wa wendo waku ûtathiraga. Theria mevia makwa, nîûndû wa ntha ciaku nyîngî!

² Nthambia waganu wakwa wonthe, ûnthambie mevia makwa!

³ Nie nîmbicî mavîtia makwa; vîndî cionthe nîmenyaga mevia makwa.

⁴ We wenga nîwe mbîtîrîtie, na nîmbîkîte maûndû marîa wonaga marî macûku. Kwoguo ûnduîrîrîte na kîvooto; nîûnduîrîrîte ûrîa kwagîrîrîte.

⁵ Nie naaciarirwe nîrî na mavîtia; wana nyanya akîgîa îvu nîguo ngaaciarwa, naarî mwîvia.

⁶ We wendaga ûûma kuuma ngororî; kwoguo mva ûûgî wa ngoro.

⁷ Ntheria, na nî ngûthera; nthambia, na nî ngûcerûva gîkîra îra.

⁸ Mbîcûria gîkeno na ûnjanjamûre; na wana ethîrwa nî ûnthirîtie vinya, nî ngwîcûrwa nî gîkeno rîngî.

⁹ Ndûkarorie mawîvia makwa na ûtherie mawaganu makwa monthe.

¹⁰ Nyûmbîra ngoro ntheru, we Ngai, na ûmbîkîre ngoro njerû na mbathîki.

¹¹ Ndûkamîngate nyume kûrî we; na ndûkarute roho waku mûtheru kûrî nie.

¹² Njokeria gîkeno Kîam ûvovokio waku, na ûmbîkîre wendi wa gûkwathîkîra.

¹³ Nîngaacoka nthomithie andû arîa evia njîra ciaku, na nîmagaagûcokerera.

¹⁴ Mvonokia kuumana na wîvia wa ûragani, we Ngai mûvonokia wakwa, na nîngaakena na manîrîre ûthingu waku kûrî andû.

¹⁵ We Mwathani, mvotithia kwaria, na nîngûgûkumia.

¹⁶ We ndûkenagua nî magongoona, kethîrwa nîûkenagua nîmo, nîngîakûrutîra; we ndûkenagua nî matega ma kûvîvua.

¹⁷ Îgongoona rîakwa kûrî we Ngai, nî ngoro îrî na wînyivia; ndûkaarega ngoro îrî na wînyivia na ûveri.

¹⁸ We Ngai, îka maûndû maro îtûûrarî rîa Zayuni nîûndû wa kwenda gwaku; tuma rîngî nthingo cia îtûûra rîa Jerusalemu.

¹⁹ Nîûgaacoka ûkenue nî magongoona marîa ma ma na matega metû ma kûvîvua; na ndegwa nîigaacoka irutîrwe metharî yaku ya kîgongoona.