Thaburi 5 - ÎVUKU RÎA ÛVORO MWARO

Îvoya nîûndû wa Ûgitîri

¹ We Ngai-Mûnene tathikîrîria ûrîa nîrauga, na wîgue ûrîa nîracaa.

² Thikîrîria ngîgûkaîra, mûthamaki wakwa na Ngai wakwa! Nîûndû we, nîwe mvoyaga;

³ We Ngai-Mûnene, kîraûko nîwîgucaga mûgambo wakwa, ngûvoyaga kîraûko tene riûa rîkîratha, na ngeterera wendi waku.

⁴ We ûrî Ngai ûtakenagua nî waganu, we ndwîkaranagia na andû arîa aganu.

⁵ We ndwendaga kwona andû arîa etîi, nîûthûûrîte andû onthe arîa mekaga naaî.

⁶ We nîûcûkangagia andû arîa maveenanagia, na nîûreganaga na aûragani na arîa mataragia ûma.

⁷ Nwatî nîûndû wa wendo waku ûtathiraga, nwa ndonye nyombarî yaku, ngûgooce nîrî hekarûrî yaku ntheru, na ngakwînamîrîra na gîtîîo.

⁸ Ngai-Mûnene, nthû ciakwa nî nyîngî! Mvotithia kûvingia wendi waku, na ûnûngarîrie njîra yaku nîguo nîmîrûmîrîre.

⁹ Nthû ciakwa itingîaria ûma; mendaga gûcûkangia andû arîa engî. Ciugo ciao nî cia kînyûrûri na nî nyoroku, nwatî maragia maûndû macûku.

¹⁰ Maverithie nîûndû wa mavîtia mao, we Ngai; na ûtûme macûkangue o ene nî mîvango yao mîcûku. Mengate maume kûrî we nîûndû wa mevia mao meengî, nîûndû nîmareganîte nawe.

¹¹ Nwatî tiga arîa onthe maûragîra kûrî we makene, tiga vîndî cionthe mainage makenete. Gitagîra andû arîa makwendete; makenage nîûndû wa maûndû marîa ûmekîrîte.

¹² We Ngai-Mûnene nîûrathimaga andû arîa athingu, wendo waku ûmagitagîra ta ngo.