Thaburi 49 - ÎVUKU RÎA ÛVORO MWARO

Mûndû ûrîa wîvokaga ûtonga nî kîrimû

¹ Mue andû onthe, tathikîrîriani ûndû ûyû, thikîrîriani, andû onthe arîa mûtûûraga nthî,

² andû arîa anini na arîa anene, andû arîa itonga na arîa athîni.

³ Nîmbaria ciugo irî ûûgî; meciria makwa methîrwe marî na ûmenyo.

⁴ Ngaathikagîrîria nthimo, na ndaarîrie ûrîa ciugîte ngîvûraga kînanda.

⁵ Ndiîtigagîra vîndî îrîa kûrî thîna, kana rîrîa nthiûrûrûkîrîtue nî nthû ciakwa,

⁶ andû arîa acûku mevokaga ûtonga wao, na metîîaga nîûndû wa ûtonga wao mwîngî.

⁷ Mûndû ndangîvota gwîkûûra ke mwene; kana avota kûrîva Ngai îrîvi rîa ûtûûro wake,

⁸ nîûndû îrîvi rîa ûtûûro wa mûndû nî rînene mûno. Kîrîa angîrîva gîtingîgana,

⁹ kûmûvotithia athiî na mbere na gûtûûra mwoyo, na ndagakue.

¹⁰ Mûndû wa wonthe nîaicî atî wana andû arîa aûgî nî makucaga, mûndû mûritu wana kîrimû nîmakucaga. Onthe matigagîra andû arîa engî ûtonga wao.

¹¹ Mbîrîra nîcio mîciî yao tene na tene; kûrîa matûûraga ûtûûro wao wonthe, wana ethîrwa maarî na mîgûnda yao o ene.

¹² Ûnene wa mûndû ndûngîmûvonokia kuuma kûrî gîkuû, agaakua tu wata ûrîa nyamû ikucaga.

¹³ Ûguo nîguo gwîkîkaga kûrî andû arîa aritu meîtîkîtie, ûcio nîguo mûthiia wa arîa meganagîra na ûtonga wao.

¹⁴ Mekaraga na magakua ta ng'ondu, gîkuû gîgaatuîka mûrîthi wao. Manyûrûrûkaga mbîrîrarî, kûu nîkuo mîîrî yao îkoorera, kwa arîa akuû gûgaatuîka mîciî yao.

¹⁵ Nwatî Ngai nîakaamvonokia; nîakaanduta vinyarî wa gîkuû.

¹⁶ Ndûkamake wona mûndû agîtonga, rîrîa ûtonga wake wathiî na mbere kwongerereka;

¹⁷ nîûndû rîrîa agaakua ndakaathiî na kîndû; ûtonga wake ndûkaarûmanîrîra nake kûu mbîrîrarî.

¹⁸ Wana ethîrwa arî mwîganîre ûtûûrorî, na nîakumagua nîûndû maûndû make nî marathiî waro,

¹⁹ akaathiî kûrîa methe make maathiîre makua, kûrîa matakoona ûtheri rîngî tene na tene.

²⁰ Ûtonga wa mûndû ndûngîmûvonokia kuuma kûrî gîkuû, agaakua tu wata nyamû ikucaga.