Thaburi 48 - ÎVUKU RÎA ÛVORO MWARO

Zayuni, îtûûra rîa Ngai

¹ Ngai-Mûnene nî mûnene na nîwagîrîrwe nî gûkumua mûno, îtûûrarî rîa Ngai wetû, kîrîmarî gîake kîtheru.

² Zayuni, kîrîma Kîam Ngai, nî kîraca na nî kîthaka; îtûûra rîa mûthamaki mûnene nîrîkenagia andû onthe a nthî.

³ Ngai nîwonanîtie atî nîke ûgitanagîra, îtûûrarî rîrîa ririgîre na nthingo cia vinya.

⁴ Nîûndû athamaki nîmaagomanire vamwe, na nîmathiîte kûtharîkîra Kîrîma gîa Zayuni.

⁵ Nwatî rîrîa maakîonire, nîmaamakire; nîmegwire guoya na makîûra.

⁶ Nîmaambîrîrie gûtetema na makînyitwa nî ruuo, ruuo ta rwa mûndûmûka arî vakuvî gûciara.

⁷ Meekarire ta meri cia Tarishishi, ûrîa cikanagua îriarî nî rûkûngi rûnene.

⁸ Nîtweguire maûndû marîa Ngai ekîte, na rîu nîtwonete tue ene, îtûûrarî rîa Ngai wetû, Ngai-Mûnene, mwene vinya wonthe; Ngai nîatûûra arîgitagîra tene na tene.

⁹ Nîtwîciragia îgûrû rîgiî wendo waku ûtathiraga, tûrî hekarûrî yaku, we Ngai.

¹⁰ Nîûkumagua nî andû a kûndû kuonthe, na ngumo yaku îtambîte nthî yonthe. We wathanaga na kîvooto.

¹¹ Tiga andû a Zayuni makene! Tiga andû a matûûra ma Juda macanjamûke, nîûndû ûtucagîra andû na kîvooto!

¹² Andû a Ngai, thiûrûrûkani îtûûra rîa Zayuni, na mûtare nyomba ndaca cia rîo;

¹³ taîcirieni ûvoro wa nthingo na mûrorie cia kwîgitîra, nîguo mûkeera njiarwa irîa igaaûka atîrî,

¹⁴ “Ûyû nîke Ngai wetû tene na tene; nîatûûra atûtongoragia tene na tene.”