Thaburi 45 - ÎVUKU RÎA ÛVORO MWARO

Rwîmbo rwa Wendo

¹ Ngoro yakwa îcûrîtwe nî ciugo mbaro, ngîtunga rwîmbo rwa kwinîra mûthamaki. Rûrîmî rwakwa rwîkariî ta karamu, ka mûndû wicî kwandîka waro.

² We wî mûthaka gûkîra arûme onthe, ciugo ciaku ciîcûrîte wega wa Ngai. Kwoguo Ngai nîakûrathimîte tene na tene.

³ Îyove rûviû rwaku njovero, we mûthamaki njamba; we wî mûthamaki mûnene na ûrî riiri.

⁴ Thiî ûrî ûnene na nîûkûvootana, ûgitîre ûûma na kîvooto, vinya waku nîûgûkûvotithia kûvootana!

⁵ Mîguî yaku nî mîûgî, nîîtonyaga ngoro cia nthû ciaku; nacio ndûrîrî nîigûcaga rungu rwa magûrû maku.

⁶ Ûthamaki ûrîa Ngai akûvete nîûtûûra tene na tene. We wathaga andû aku na kîvooto;

⁷ nîwendete ûthingu na ûkamena waganu. Kwoguo Ngai, Ngai waku nîakûthuurîte, na nîakûvete gîkeno gûkîra athamaki arîa engî onthe.

⁸ Nguo ciaku irî na mûtararûko wa maguta na mînyamû mînungi waro, aini a nyîmbo magûkenagia marî nyombarî ya ûthamaki îgemetue na mîguongo.

⁹ Erîtu a mûthamaki nî amwe a erîtu arîa magûtûngaga, naguo mwenarî waku wa ûrîo varûngamîte mûthamaki mûndûmûka, ekîrîte mathaga ma thaavu ya Ofiri.

¹⁰ Tanthikîrîria waro ûrîa ngûkwîra, we mwarî wa mûthamaki, riganîrwa nî andû aku na andû a mûciî wenyu,

¹¹ na mûthamaki nîakûgucîrîrua nî ûthaka waku; nîke mwathi waku, kwoguo nwanginya ûmwathîkagîre.

¹² Andû a Turo nîmagaakûretera iveo makîyendithia kûrî we; andû arîa itonga nîmakaageragia kwîyendithia kûrî we.

¹³ Mwarî wa mûthamaki nîaratonya mûciî kwa mûthamaki na nî mûthaka mûno! Nguo yake ndaca îtumîtwe na ndigi cia thaavu.

¹⁴ Avirîtwe kûrî mûthamaki nî ndungata ciake cia erîtu, ekîrîte nguo ya marangi meengî, wanao mavirîtwe kûrî mûthamaki.

¹⁵ Marî na gîkeno na macanjamûkîte nîmakinya kuo, na nîmatonya mûciî wa mûthamaki.

¹⁶ We mûthamaki wakwa, nîûkaagîa na anake eengî, arîa magaatuîka athamaki vuva wa methe maku, na nîûkaamatua athamaki a nthî yonthe.

¹⁷ Nîngaatûma ûririkanagwe nî njiarwa cionthe, na ûtûûre ûkumagua nî andû a ndûrîrî cionthe tene na tene.