Thaburi 44 - ÎVUKU RÎA ÛVORO MWARO

Îvoya nîûndû wa ûgitîri

¹ Tue nîtwîguîte na matû metû, we Ngai, methe metû nîmatwîrîte, maûndû marîa wekire vîndî yao, marîa wekire vîndî ya tene:

² ûrîa wengatire andû a ndûrîrî na vinya waku, na ûkiga andû aku mavûrûrirî ma andû acio; ûrîa waverithirie andû a mavûrûri mengî, na ûgîtûma andû aku mekindîrie.

³ Andû aku matiegwatîra vûrûri na mbaara, kana mavootana na vinya wao; nwatî maavootanire na vinya na ûvoti waku, nîwethagîrwa nao vîndî cionthe, nîûndû nîwakenagua nîo.

⁴ We wî mûthamaki wakwa na Ngai wakwa; nîwe ûvotithagia njiarwa cia Jakovu kûvootana.

⁵ Na vinya waku nîûtûvotithagia kûvoota nthû cietû, rîîtwarî rîaku nîtûvootaga arîa matûtharîkagîra.

⁶ Nie ndiîvokaga ûta wakwa, wana rûviû rwakwa rûtingîmvonokia,

⁷ nwatî we nîûtûvonoketie kuuma kûrî nthû cietû, na nîûvootete arîa matûmenete.

⁸ Tûgaagûkumagia vîndî cionthe, na tûgûcokagîrie ngatho tene na tene.

⁹ Nwatî rîu nîûtûtiganîrîtie na ûgatûma tûvootwe; nîûtigîte kûthiîcania na athigari etû a mbaara.

¹⁰ Nîûtûmîte tûre nî nthû cietû, na nîitavîte indo cietû.

¹¹ Nîûtûmîte twîkare ta ng'ondu ithiîte kûthînjwa; na nîûtûnyaganîtie mavûrûrirî marîa mengî.

¹² Nîwendetie andû aku na thogora mûnini mûno, na ndwetia kîndû kînene wamendia.

¹³ Andû arîa tûriganîtie nao nîmarona ûrîa watwîkire, na nîmaratûruma na magatûthekerera.

¹⁴ Nîûtûmîte twirwe nî andû a ndûrîrî; mainainagia ciongo ciao magîtûthekerera.

¹⁵ Mbîthagîrwa vîndî cionthe njonokete; na mbîcûrîtwe nî nthoni nyîngî mûno,

¹⁶ rîrîa ngwîgua ngînyûrûrua na ngîrumwa, nî nthû ciakwa na andû arîa mamenete.

¹⁷ Maûndû mama monthe mekîkîte kûrî tue, wana ethîrwa tûtiriganîrîtwe nîwe, kana tuna kîrîkanîro kîrîa warûthire natue.

¹⁸ Tûtiagûtiganîrîa; kana tûrega kûrûmîrîra njîra ciaku.

¹⁹ Kûnarî ûguo, nîûtûrekereretie kûrî ciathi; nîûtûtiganîrîtie ndumarî ndumanu mûno.

²⁰ Kethîrwa twanatiga gûkûgooca we Ngai wetû, na tûkagooca ngai ya maveeni,

²¹ we Ngai, ûngîrî mûmenyu ûvoro ûcio, nîûndû we nîwicî nthitho ya ngoro cietû.

²² Nwatî vîndî cionthe tûûragagwa nîûndû waku, tûtucagwa ta ng'ondu cia kûthînjwa.

²³ Ûkîra, we Mwathani! Ûmamîte nîkî? Ûkîra! Ndûgatûtiganîrie tene na tene!

²⁴ Wîthithîte kuuma kûrî tue nîkî? Ndûkariganîrwe nî mînyamaaro na mathîna metû?

²⁵ Tûthirîte vinya nginya tûkagwa nthî; tûmamîte nthî mûtheturî tûrî avoote.

²⁶ Ûkîra, ûke ûtûtethie! Tûvonokie nîûndû wa wendo waku ûtathiraga!