Thaburi 43 - ÎVUKU RÎA ÛVORO MWARO

Îvoya rîa mûndû arî îthamîriorî

(Thaburi 42 îthiîte na mbere)

¹ We Ngai, nduîra atî ndirî na mavîtia, na ûnjirîrîre kûrî andû arîa matarî na ûûngai; mvonokia kuuma kûrî andû a maveeni na acûku!

² We nîwe ûngitagîra, ûndiganîrîtie nîkî? Nîrathiî na mbere kûthînîka nîkî nîûndû wa kûvinyîrîrua nî nthû ciakwa?

³ Mva ûtheri na ûûma waku indongorie, na injokie Zayuni, kîrîmarî gîaku kîtheru, na hekarûrî yaku, kûrîa ûtûûraga.

⁴ Nîngaacoka nthiî metharî ya kîgongoona ya Ngai, nîngaûka kûrî we Ngai ûrîa ûngenagia mûno. Nîngaakwinîra ngîvûraga kînanda ngîgûkumagia, we Ngai, Ngai wakwa.

⁵ Nîndûî gîtûmîte ngîe na kîeva ûguo? Nîrathînîka ûguo nîkî? Nîmbiga mwîvoko wakwa kûrî Ngai, na rîngî nîngaamûkumia, mûvonokia wakwa na Ngai wakwa.