Thaburi 42 - ÎVUKU RÎA ÛVORO MWARO

ÎVUKU RÎA KAÎRÎ Tha 42—72 Îvoya rîa mûndû arî îthamîriorî

¹ Wata ûrîa nthwariga înyondagîra manjî ma rûnjî, nwaguo ngoro yakwa îkûnyondagîra, we Ngai wakwa.

² Nînyonderete Ngai, Ngai ûrîa ûtûûraga mwoyo. Ngaakinya gwake rî mone ûthiû wake?

³ Methori makwa nîmo matuîkîte irio ciakwa ûtukû na mûthenya, vîndî cionthe nthû ciakwa imbûragia atîrî, “Ngai waku arî kû?”

⁴ Ngoro yakwa nîthiragwa nî vinya rîrîa naririkana, ûrîa twathiîcaga na andû eengî, naamatongoragia makathiî gûtonya nyombarî ya Ngai, andû maakenete makinaga nyîmbo cia gûkumia Ngai maugîrîrîtie.

⁵ Nîndûî gîtûmîte ngîe na kîeva ûguo ngororî? Nîrathînîka ûguo nîkî? Nîmbiga mwîvoko wakwa kûrî Ngai, na nîngaamûkumia rîngî, ke nîke mûvonokia wakwa na Ngai wakwa.

⁶ Mbîcûrîtwe nî kîeva ngororî yakwa, kwoguo nînîrakûririkana we, Ngai wakwa, nîrî mwena wa Jorodani, nîrî kîrîmarî Kîam Herimoni na Mizari.

⁷ Mathîna manthiûrûrûkîrîtie ta mwîcûro wa manjî, maragamba ta ndurumo cia manjî manyûrûrûkîte mathiîte Jorodani, nîraikanua nî makûmbî ma manjî na ndivû ciamo.

⁸ Ngai-Mûnene akaamonagia wendo wake ûtathiraga îvinda rîa mûthenya, nanie nîmwinagîre rwîmbo rwa kûmûkumia ûtukû, mvoyage Ngai ûrîa ûndûûragia mwoyo.

⁹ Nîmbîra Ngai, mûgitîri wakwa atîrî, “Nîkwa ûriganîrîtwe nînie nîkî? Nîrathiî na mbere kûthînîka nîkî nîûndû wa kûvinyîrîrua nî nthû ciakwa?”

¹⁰ Nînîregua ruuo mûno rîrîa nthû ciakwa iranuma, vîndî cionthe ikîmbûûragia atîrî, “Ngai waku arî kû?”

¹¹ Nîndûî gîtûmîte ngîe na kîeva ûguo? Nîrathînîka ûguo nîkî? Nîmbiga mwîvoko wakwa kûrî Ngai, na nîmûkumie rîngî, mûvonokia wakwa na Ngai wakwa.