Thaburi 40 - ÎVUKU RÎA ÛVORO MWARO

Rwîmbo rwa gûkumia Ngai-Mûnene

¹ Nîneterere Ngai-Mûnene andethie ngirîrîrîtie; nîwanthikîrîrie na akîgua kîrîro gîakwa.

² Nîwandutire îrimarî rîarî na thîna, nîwandutire ndakarî ya gîkuû, nîwanûngamirie îgûrû rîa îthiga, na akîmvotithia gwîkindîria.

³ Nîwanthomithirie kwina rwîmbo rûcerû, rwîmbo rwa gûkumia Ngai wetû. Andû eengî mona ûguo nîmagetigîra, na mevoke Ngai-Mûnene.

⁴ Kûrathimwa nî arîa mevokete Ngai-Mûnene, arîa matarûmagîrîra mîvuanano, kana magwatanîra na arîa magoocaga ngai cia maveeni.

⁵ Nîûtwîkîrîte maûndû meengî ma magegania, we Ngai-Mûnene, Ngai wetû; gûtirî wîngî tawe! Ndingîvota kwaria ûvoro wamo monthe, nîûndû nî meengî mûno!

⁶ We ndwendaga magongoona na matega, ndwîtagia matega ma kûvîvua kana ma kûtheria mevia, nwatî ûmvete matû ngwîgucage,

⁷ kwoguo nînaugire atîrî, “Nie nîrî ava; maûndû marîa mbagîrîrwe nî gwîka marî îvukuurî rîa Watho.

⁸ Nîngenaga ngîka wendi waku, we Ngai wakwa, watho waku ûrî ngororî yakwa.”

⁹ Nîmvecanîte ûvoro mwaro wa ûvonokio, kîûnganorî kînene Kîam andû aku. We Ngai-Mûnene nîwicî, ndianatiga kûvecana ûvoro ûcio.

¹⁰ Ndiathitha ndûmîrîri ya ûvonokio ûrîa wambeere ngororî yakwa, vîndî cionthe nî mbîîraga andû atî we ûrî mûvonokia mwîvokeku. Kîûnganorî Kîam andû aku onthe nîmbaragia ûvoro wa wendo waku ûtathiraga na wîvokeku waku.

¹¹ We Ngai-Mûnene, ndûgatige kûmbîguîra ntha. Wendo waku ûtathiraga na wîvokeku waku irotûûra imenyagîrîra.

Îvoya rîa gwîtia ûtethio

¹² Nthiûrûrûkîrîtue nî mathîna meengî mûno matangîtarîka! Mevia makwa mangunîkîte nginya ngaremwa nî kwona; mengîvîte gûkîra njuîrî cia kîongo gîakwa, nanie nîrî mûthiru vinya.

¹³ Ndethia nîûndû wa kwenda gwaku we Ngai-Mûnene! We Ngai-Mûnene, ûka narua ûndethie!

¹⁴ Andû arîa mageragia kûmbûraga maroconoka na mavîngîcîke, arîa mendaga kûmbîka naaî marovootwa na maconorithue.

¹⁵ Tiga arîa manthekagîrîra, megue kîeva nîûndû wa kûvootwa kwao.

¹⁶ Nwatî arîa onthe makûgoocaga, makene na magûkûngûîre. Andû onthe arîa mendete ûvonokio waku, vîndî cionthe maugage atîrî, “Ngai-Mûnene nî mûnene!”

¹⁷ Nie nîrî mûthîni na ndirî na vinya, nwatî we Mwathani ndûriganagîrwa nînie. We nîwe mûvonokia wakwa na Ngai wakwa; ûka we Ngai wakwa na ndûgekare!