Thaburi 39 - ÎVUKU RÎA ÛVORO MWARO

Umbûri wa mûndû mûthînîku

¹ Nînaugire atîrî, “Ngaamenyagîrîra mîthiîre yakwa, nîguo rûrîmî rwakwa rûtigatûme njîvie. Ndikaavingûra kanyua gakwa, rîrîa andû arîa aganu marî vakuvî.”

² Nekariî ta mûndû ûtaicî kwaria na ndiauga ûndû, naakirire kivi nwatî ndianona ûndû mwaro! mathîna makwa nîmoongererekire makîria,

³ na ngîgîa na gwîtanga ngororî yakwa. Wa ûrîa nathiîcaga na mbere gwîciiria, nwaguo naatangîkaga; nînacokire ngiuga atîrî,

⁴ “Ngai-Mûnene, tiga menye mûthiia wakwa, menye rîrîa ngaakua, ndethia kûmenya atî ûtûûro wakwa ûrî vakuvî.”

⁵ Nîmbicî atî, ûtûûro wakwa nî mûkuvî mûno! Ûtûûro wakwa tî ta kîndû mbere yaku. Nama, mûndû wa wonthe nî ta mîvevû.

⁶ Nama, mûndû wonthe nî ta kîruru. Mawîra monthe marîa marutaga nî ma mana; acaragia ûtonga nwatî ndamenyaga ûrîa ûkaarigia nacio akua.

⁷ Rîu Mwathani, mwîvoko wakwa ûrî kû? Mwîvoko wakwa ûrî kûrî we.

⁸ Mvonokia kuuma kûrî mevia makwa monthe, na ndûkareke irimû inthekerera.

⁹ Mbîkariî ta mûndû ûtaicî kwaria, tîmbuga wanarî ûndû, nîûndû we nîwe ûtûmîte nthînîka ûguo.

¹⁰ Tiga kûmverithia rîngî! Nîrî vakuvî kûthirua nî mbaara yaku.

¹¹ Nîûgûkagia andû na ûkamaverithia nîûndû wa mevia mao, nîûcûkangagia kîrîa wendete ta ûrîa kîgunyû gîcûkangagia indo. Nama andû onthe mekariî ta rûkûngi!

¹² Thikîrîria îvoya rîakwa, we Ngai-Mûnene, na ûthikîrîrie kîrîro gîakwa; ndûgakire rîrîa nîrarîra. Nîûndû mbîkariî ta mûgeni wa kavinda kanini, nîrî mwîvîtûkîri ta methe makwa monthe.

¹³ Tiga kûrakara nînie nîguo ngîe na gîkeno kînini, mbere ya ngua na ndiganîre viû.