Thaburi 38 - ÎVUKU RÎA ÛVORO MWARO

Îvoya rîa mûndû arî na thîna

¹ We Ngai-Mûnene, ndûkangûkie ûrî na marakara; kana ûmverithie ûrî na marûrû!

² Nîûngurarîtie na mîguî yaku; nîûmverithîtie na vinya waku.

³ Marakara maku nîmarambîguithia ruuo rwîngî; mwîrî wakwa wonthe nîûratuura nîûndû wa mevia makwa.

⁴ Mevia makwa nî meengî mûno, manditûvîrîte ta mûrigo na ndingîvota kûmakuua.

⁵ Ironda ciakwa nîiranunga nîûndû nî mboru, nîûndû wa ûrimû wakwa.

⁶ Nguamîrîrîtie nginya ngamama nthî; ndindaga ngîcakaya mûthenya mûgima.

⁷ Mwîrî wakwa wonthe wîcûrîtwe nî ruuo na nîrîmûrwaru mûno.

⁸ Nîrîmûthiru vinya viû na ngaunîkanga; nînîracaa nîûndû wa ruuo na nîrî na thîna ngororî.

⁹ We Mwathani, nîwicî maûndû monthe marîa mendaga; we nîwîgucaga gûcaa gwakwa kuonthe.

¹⁰ Ngoro yakwa îravûûra na vinya, na nîmûthiru vinya, namo metho makwa matirona.

¹¹ Arata na andû arîa tûriganîtie nao matirenda kwona mathîna makwa, na andû a mûciî wakwa matinguvagîrîria.

¹² Andû arîa mendaga kûmbûraga nîmanyambagîra mîtego, arîa mendaga mone thîna mavangaga ûrîa makûnjûkangia, matitiganaga na mîvango ya kûmbûraga.

¹³ Nwatî nie mbîkariî ta gîtaigua, ndiîgucaga, mbîkariî ta mûndû ûtangîvota kwaria, ndiaragia.

¹⁴ Nie mbîkariî ta mûndû ûtegucaga, ta mûndû ûtangîvota kwîyarîrîria.

¹⁵ Nwatî nîngwîvokete we Ngai-Mûnene; na we Ngai-Mûnene, Ngai wakwa nîwe ûkûnjokeria.

¹⁶ Nîrakûvoya tu, ndûkareke nthû ciakwa inthekerera; ndûgatûme ciîtîîa nîûndû wa kûgwa gwakwa.

¹⁷ Nîrî vakuvî kûgwa, na ndithiragwa nî ruuo.

¹⁸ Nînîraumbûra mevia makwa; mevia makwa nî maratûma nthînîke.

¹⁹ Nthû ciakwa irî na ûgima wa mwîrî na irî na vinya; andû arîa mamenaga mana nîo eengî.

²⁰ Acio mambîkaga naaî rîrîa ngûmeka waro, mareganaga nanie nîûndû mbîkaga maûndû marîa maro.

²¹ Ndûkandiganîrie, we Ngai-Mûnene; ndûgekare varaca nanie, we Ngai wakwa.

²² Ûka na îvenya ûndethie, we Ngai-Mûnene, we mûvonokia wakwa!