Thaburi 37 - ÎVUKU RÎA ÛVORO MWARO

Îîvoke Ngai-Mûnene

¹ Mûtikamakue nî andû arîa aganu; mûtikeguîre wîru arîa mekaga naaî.

² Nîûndû vuva wa îvinda rîtarî îraca, makaaûma ta nyaki; makaavova ta ûrîa mîtî mîthî îvovaga.

³ Îîvokeni Ngai-Mûnene na mwîkage waro, nîguo mûtûûre vûrûrirî ûyû mûrî na thayû.

⁴ Cariani gîkeno kûrî Ngai-Mûnene, nake akaamûvecaga kîrîa mwîriragîria.

⁵ Nengera Ngai-Mûnene ûtûûro waku, mwîvoke na nîagûgûtethia.

⁶ Nîagaatûma ûthingu waku ûkenge ta ûtheri, na wega waku ta riûa rîarîte mûthenya.

⁷ Vorera na weterere Ngai-Mûnene agûtethie; ndûkamakue nî arîa marathiî na mbere na maûndû mao, kana arîa mavangaga mîvango mîcûku na îgakinyanîra.

⁸ Ndûkagîe na marakara kana ûnyitwe nî mang'ûrîka, Mûtigatangîke nîûndû nwagûtûme wîke ûndû mûcûku.

⁹ Andû arîa mekaga maûndû macûku nîmagaacûkangua, nwatî arîa mevokete Ngai-Mûnene nîo makegwatîra nthî.

¹⁰ Andû arîa aganu nîmathiraga vuva wa kavinda kanini; wana mwamacaria mûtingîmoona.

¹¹ Nwatî andû arîa avooreri nîo makeegwatîra nthî, na makenagîre ûtûûro mwaro na thayû.

¹² Andû arîa aganu mavangaga maûndû macûku megiî arîa athingu, na nîmamatembaga nîûndû wa kûmathûûra.

¹³ Nwatî Ngai-Mûnene nîathekagîrîra andû arîa aganu, nîûndû nîecî atî nîmakûthirua vuva wa kavinda kanini.

¹⁴ Andû arîa aganu macomoraga mviû ciao na magakucia mota mao, nîguo maûrage andû arîa athîni na arîa avatari, maûrage andû arîa mekaga maûndû marîa magîrîrîte.

¹⁵ Mviû ciao nîcio ikaamaûraga o ene, na mota mao maunangwe.

¹⁶ Nîkava kanyamû kanini karîa mûndû mûthingu arî nako, gûkîra indo nyîngî cia andû arîa aganu.

¹⁷ Nîûndû Ngai-Mûnene nîakaathiria vinya wa andû arîa aganu, nwatî nîakaagitîra arîa athingu.

¹⁸ Ngai-Mûnene nîamenyagîrîra andû arîa mamwathîkagîra, na îgai rîao rîgaatûûra tene na tene.

¹⁹ Matikaathîna mavinda ma thîna; nîmakethîrwa marî na irio cia kwîgana vîndî ya yûra.

²⁰ Nwatî andû arîa aganu nîmagaakua; nthû cia Ngai-Mûnene nîikaaûma ta maûa ma kîthaka; makaathira ta ndogo.

²¹ Andû arîa aganu mavoyaga kîndû na maticokagia, nwatî andû arîa athingu nîatana na nîmavecanaga indo ciao.

²² Andû arîa arathime nî Ngai-Mûnene nîmakagaa nthî, nwatî arîa arume nîke nîmakaathirua.

²³ Ngai-Mûnene nîke wonagia andû njîra îrîa makûrûmîrîra, na nîagitagîra arîa mamûkenagia.

²⁴ Wana mangîgwa, nîmaûkagîra, nîûndû Ngai-Mûnene nîamanyitagîrîra.

²⁵ Vîndî îmwe naarî mwîthî, na rîu nîrî mûkûrû, nwatî ndianona andû arîa athingu matiganîrîtue nî Ngai-Mûnene kana mona ciana ciao ikîvoya irio.

²⁶ Vîndî cionthe mavecanaga makenete na magakombithania, na ciana ciao nî kîrathimo kûrî o.

²⁷ Ûragîra maûndû macûku na wîkage maûndû marîa maro, nawe nîûgûtûûra vûrûrirî ûyû tene na tene;

²⁸ nîûndû Ngai-Mûnene endaga maûndû marîa magîrîru, na ndatiganagîria andû ake arîa evokeku. Agitagîra andû arîa athingu tene na tene, nwatî nîakaathiria njiarwa cia andû arîa aganu.

²⁹ Andû arîa athingu nîmakaagaa nthî, na matûûre kuo tene na tene.

³⁰ Andû arîa athingu maragia ciugo cia ûûgî, na maragia ciugo cia waragania.

³¹ Nîmaigaga mawatho ma Ngai ngororî ciao; na matiîkaga maûndû mataringanîte na mawatho mau.

³² Andû arîa aganu methithagîra andû arîa athingu, na nîmageragia kûmaûraga;

³³ nwatî Ngai-Mûnene ndakaamarekereria kûrî nthû ciao, kana monekane marî na mavîtia rîrîa magûcirithua.

³⁴ Îîvokeni Ngai-Mûnene na mûrûmagîrîre maathani make; nîakaamûtûgîria na mwîgwatîre vûrûri, na nîmûkoona andû arîa aganu magîcûkangua.

³⁵ Vîndî îmwe nînoonire mûndû mwaganu na ûtarî ntha; etûgîrîtie gûkîra andû onthe ta mûtarakwe wa Lebanoni.

³⁶ Nwatî vuvarî ngîvîtûkîrîra vo, ndaarî vo; naamûcaririe, nwatî ndiamwona.

³⁷ Taroria andû arîa aro, na athingu; andû arîa marî thayû marî njiarwa nyîngî.

³⁸ Nwatî andû arîa evia nîmacûkangagua onthe, na njiarwa ciao ikathirua viû.

³⁹ Ngai-Mûnene nîavonokagia andû arîa athingu, na nîamagitagîra vîndî ya thîna.

⁴⁰ Ngai-Mûnene nîamatethagia na akamavonokia; nîamavonokagia kuuma kûrî andû arîa aganu, nîûndû nîmathiîcaga kûrî ke amagitîre.